ਖਬਰ ਇੱਕ ਪੰਜਾਬੀ ਟਰੱਕ ਡ੍ਰਾਈਵਰ ਦੀ ਹੈ, ਜਿਸ ਨੇ ਬਹੁਤ ਹੀ ਚੰਗਾ ਕੰਮ ਕੀਤਾ ਜਿਸ ਕਾਰਨ ਉਸ ਦੀ ਹਰ ਪਾਸਿਓਂ ਤਾਰੀਫ਼ ਹੋ ਰਹੀ ਹੈ। 34 ਸਾਲਾ ਦਲਜੀਤ ਸੋਹੀ ਕੈਲਗਰੀ 'ਚ ਰਹਿੰਦਾ ਹੈ ਅਤੇ ਇੱਕ ਐਬਟਸਫੋਰਡ-ਅਧਾਰਤ ਟਰੱਕਿੰਗ ਕੰਪਨੀ- ਟ੍ਰਿਪਲ ਏਟ ਟ੍ਰਾਂਸਪੋਰਟ ਲਈ ਟਰੱਕ ਚਲਾਉਂਦਾ ਹੈ। ਇਹ ਕੰਪਨੀ ਪੱਛਮੀ ਕੈਨੇਡਾ ਵਿੱਚ ਲੰਬੀ ਦੂਰੀ ਦੇ ਰੂਟਾਂ 'ਚ ਮਾਹਰ ਹੈ। ਦਰਅਸਲ ਕੈਲਗਰੀ ਤੋਂ ਐਬਟਸਫੋਰਡ ਦੀ ਯਾਤਰਾ ਦੌਰਾਨ, ਦਲਜੀਤ ਸੋਹੀ ਨੇ ਬੀਸੀ ਦੇ ਕੂਟੇਨੇ ਖੇਤਰ ਦੇ ਇੱਕ ਕਸਬੇ ਗੋਲਡਨ 'ਚ ਇੱਕ ਸੰਖੇਪ ਕੌਫੀ ਸਟਾਪ ਕੀਤਾ, ਜਦੋਂ ਉਹ ਆਪਣੇ ਟਰੱਕ ਵੱਲ ਵਾਪਸ ਜਾ ਰਿਹਾ ਸੀ, ਤਾਂ ਉਸ ਨੇ ਦੇਖਿਆ ਕਿ ਪਾਰਕਿੰਗ 'ਚ ਇੱਕ ਔਰਤ ਦਾ ਪਰਸ ਡਿੱਗ ਗਿਆ ਹੈ, ਜਿਸ ਦਾ ਉਸ ਔਰਤ ਨੂੰ ਪਤਾ ਨਹੀਂ ਲੱਗਿਆ। ਇਹ ਦੇਖਦੇ ਹੀ ਦਲਜੀਤ ਸੋਹੀ ਤੁਰੰਤ ਮਦਦ ਲਈ ਅੱਗੇ ਆਇਆ।
ਸੋਹੀ ਨੇ ਤੁਰੰਤ ਉਸ ਔਰਤ ਦਾ ਪਰਸ ਚੁੱਕਿਆ ਕਿਉਂਕਿ ਉਸ ਨੂੰ ਉਮੀਦ ਸੀ ਕਿ ਪਰਸ 'ਚ ਫੋਨ ਜ਼ਰੂਰ ਹੋਵੇਗਾ ਪਰ ਪਰਸ 'ਚ ਫੌਨ ਦੀ ਬਜਾਏ ਪੈਸੇ, ਆਈਡੀ, ਦਸਤਾਵੇਜ਼ ਅਤੇ ਇੱਕ ਸੋਨੇ ਦੀ ਚੇਨ ਸੀ। ਬਿਨਾਂ ਕਿਸੇ ਸੰਪਰਕ ਦੇ, ਸੋਹੀ ਨੇ ਪਰਸ ਵਾਪਸ ਕਰਨ ਦੀ ਉਮੀਦ 'ਚ ਉਸਦਾ ਪਿੱਛਾ ਕਰਨ ਦਾ ਫੈਸਲਾ ਕੀਤਾ। ਦੱਸਦਈਏ ਕਿ ਸੋਹੀ ਨੇ ਉਸ ਔਰਤ ਦਾ ਤਿੰਨ ਘੰਟੇ ਤੱਕ ਪਿੱਛਾ ਕੀਤਾ। ਉਹ ਔਰਤ ਆਪਣੇ ਪਰਿਵਾਰ ਨੂੰ ਮਿਲਣ ਲਈ ਸੈਲਮਨ ਆਰਮ ਜਾ ਰਹੀ ਸੀ। ਔਰਤ ਨੇ ਦੇਖ ਲਿਆ ਸੀ ਕਿ ਇੱਕ ਟਰੱਕ ਉਸ ਦਾ ਪਿੱਛਾ ਕਰ ਰਿਹਾ ਹੈ ਪਰ ਉਹ ਸਥਿਤੀ ਤੋਂ ਅਣਜਾਣ ਸੀ ਅਤੇ ਇੱਕ ਟਰੱਕ ਨੂੰ ਉਸਦੇ ਮਗਰ ਆਉਂਦਿਆਂ ਦੇਖ ਕੇ ਉਹ ਚਿੰਤਤ ਹੋ ਗਈ ਸੀ। ਸੋਹੀ ਨੇ ਉਸ ਔਰਤ ਨੂੰ ਕਈ ਹਿੰਟ ਦੇਣ ਦੀ ਵੀ ਕੋਸ਼ਿਸ਼ ਕੀਤੀ ਪਰ ਔਰਤ ਸਮਝ ਨਹੀਂ ਪਾਈ।
ਆਖਰਕਾਰ ਜਦੋਂ ਉਹ ਔਰਤ ਸਿਕਾਮੌਸ ਦੇ ਇੱਕ ਗੈਸ ਸਟੇਸ਼ਨ 'ਤੇ ਰੁਕੀ, ਸੋਹੀ ਨੇ ਉਸ ਕੋਲ ਪਹੁੰਚ ਕੇ ਪਰਸ ਵਾਪਸ ਕਰ ਦਿੱਤਾ। ਸ਼ੁਕਰਗੁਜ਼ਾਰ ਹੋ ਕੇ ਔਰਤ ਨੇ ਉਸਨੂੰ $500 ਨਕਦ ਇਨਾਮ ਦੀ ਪੇਸ਼ਕਸ਼ ਕੀਤੀ, ਪਰ ਸੋਹੀ ਨੇ ਇਨਕਾਰ ਕਰ ਦਿੱਤਾ। ਸੋਹੀ ਨੇ ਉਸ ਔਰਤ ਨੂੰ ਆਪਣਾ ਨਾਮ ਵੀ ਨਹੀਂ ਦੱਸਿਆ ਪਰ ਔਰਤ ਨੇ ਟਰੱਕ 'ਤੇ ਟ੍ਰੇਲਰ ਨੰਬਰ ਦੀ ਵਰਤੋਂ ਕਰਕੇ ਉਸਨੂੰ ਟਰੈਕ ਕੀਤਾ ਅਤੇ ਟ੍ਰਿਪਲ ਏਟ ਟ੍ਰਾਂਸਪੋਰਟ 'ਤੇ ਪਹੁੰਚ ਗਈ। ਉਸ ਔਰਤ ਨੇ ਸੋਹੀ ਨੂੰ ਧੰਨਵਾਦ ਪ੍ਰਗਟ ਕਰਨ ਲਈ ਇੱਕ ਆਈਫੋਨ ਅਤੇ ਇੱਕ ਨੋਟ ਭੇਜਿਆ। ਟ੍ਰਿਪਲ ਏਟ ਟਰਾਂਸਪੋਰਟ ਦੇ ਸੁਰੱਖਿਆ ਅਤੇ ਪਾਲਣਾ ਸੁਪਰਵਾਈਜ਼ਰ ਪਲਵਿੰਦਰ ਸਿੰਘ ਨੇ ਕਿਹਾ ਕਿ ਦਲਜੀਤ ਸੋਹੀ ਨੇ ਜੋ ਕੀਤਾ ਉਸ ਤੋਂ ਹਰ ਕੋਈ ਬਹੁਤ ਖੁਸ਼ ਸੀ।
ਸੋਹੀ, ਜੋ ਕਿ 2021 ਤੋਂ ਕੰਪਨੀ ਦੇ ਨਾਲ ਹੈ, ਨੇ ਕੰਮ 'ਤੇ ਕਿਸੇ ਨੂੰ ਵੀ ਨਹੀਂ ਦੱਸਿਆ ਕਿ ਕੀ ਹੋਇਆ ਹੈ, ਇੱਥੋਂ ਤੱਕ ਕਿ ਉਸਦੇ ਪਰਿਵਾਰ ਨੂੰ ਵੀ ਨਹੀਂ ਦੱਸਿਆ। ਟ੍ਰਿਪਲ ਏਟ ਟ੍ਰਾਂਸਪੋਰਟ ਦੇ ਐੱਚਆਰ ਮੈਨੇਜਰ ਹਰਪ੍ਰੀਤ ਸੱਭਰਵਾਲ ਨੇ ਸੋਹੀ ਦੀ ਨਿਮਰਤਾ ਦੀ ਸ਼ਲਾਘਾ ਕੀਤੀ। ਕੰਪਨੀ ਨੇ ਬਾਅਦ 'ਚ ਸੋਹੀ ਦੇ ਇਸ ਨੇਕ ਕੰਮ ਦੀ ਸ਼ਲਾਘਾ ਕਰਨ ਲਈ ਆਪਣੇ ਐਬਟਸਫੋਰਡ ਦਫਤਰ 'ਚ ਇੱਕ ਹੈਰਾਨੀਜਨਕ ਸਮਾਗਮ ਦਾ ਆਯੋਜਨ ਕੀਤਾ। ਦੱਸਦਈਏ ਕਿ ਹੁਣ ਦਲਜੀਤ ਸੋਹੀ ਨੂੰ ਟਰੱਕਲੋਡ ਕੈਰੀਅਰਜ਼ ਐਸੋਸੀਏਸ਼ਨ ਦੇ "ਹਾਈਵੇ ਐਂਜਲ ਐਵਾਰਡ" ਲਈ ਨਾਮਜ਼ਦ ਕੀਤਾ ਗਿਆ ਹੈ। ਐਸੋਸੀਏਸ਼ਨ ਦੇ ਅਨੁਸਾਰ, ਪ੍ਰੋਗਰਾਮ 1997 ਤੋਂ ਨੌਕਰੀ 'ਤੇ ਹੁੰਦੇ ਹੋਏ "ਨਿਰਸਵਾਰਥ" ਦੂਜਿਆਂ ਦੀ ਮਦਦ ਕਰਨ ਵਾਲੇ ਡ੍ਰਾਈਵਰਾਂ ਨੂੰ ਮਾਨਤਾ ਦੇ ਰਿਹਾ ਹੈ। ਸੋਹੀ ਦਾ ਕਹਿਣਾ ਹੈ ਕਿ ਉਸ ਨੇ ਪ੍ਰਸ਼ੰਸਾ ਲਈ ਕੋਈ ਮਦਦ ਨਹੀਂ ਕੀਤੀ ਪਰ ਮਾਨਤਾ ਪ੍ਰਾਪਤ ਕਰਕੇ ਉਹ ਬਹੁਤ ਖੁਸ਼ ਹੈ।