ਸਰਕਾਰੀ ਦਫਤਰ ਨਾਲ ਰਾਬਤਾ ਬਣਾ ਕੇ 20 ਲੱਖ ਦੀ ਠੱਗੀ

2000 ਟਨ ਕਣਕ ਤੇ ਝੋਨਾ ਦੇਣ ਦਾ ਵਾਅਦਾ ਕਰਕੇ ਪੈਸੇ ਲੈ ਕੇ ਗਾਇਬ

ਚੰਡੀਗੜ੍ਹ : ਮੁਹਾਲੀ ਜ਼ਿਲ੍ਹੇ ਦੇ ਖਰੜ ਵਿੱਚ ਇੱਕ ਸਰਕਾਰੀ ਏਜੰਸੀ ਦੇ ਫਰਜ਼ੀ ਮੁਲਾਜ਼ਮ ਨੇ ਸਰਕਾਰੀ ਚੌਲਾਂ ਦਾ ਸਟਾਕ ਜਲਦੀ ਉਪਲਬਧ ਕਰਵਾਉਣ ਦਾ ਲਾਲਚ ਦੇ ਕੇ ਇੱਕ ਵਪਾਰੀ ਨਾਲ 20 ਲੱਖ ਰੁਪਏ ਦੀ ਠੱਗੀ ਮਾਰੀ ਹੈ। ਇਸ ਮਾਮਲੇ ਵਿੱਚ ਐਸਐਸਪੀ ਮੁਹਾਲੀ ਦੀਪਕ ਪਾਰੀਕ ਦੇ ਹੁਕਮਾਂ ’ਤੇ ਖਰੜ ਸਦਰ ਪੁਲੀਸ ਨੇ ਇੱਕ ਔਰਤ ਸਮੇਤ ਚਾਰ ਮੁਲਜ਼ਮਾਂ ਖ਼ਿਲਾਫ਼ ਕੇਸ ਦਰਜ ਕੀਤਾ ਹੈ।

ਸੁਭਾਸ਼ ਚੰਦ ਗੋਇਲ ਵਾਸੀ ਹਰਿਆਣਾ ਜੋ ਕਿ ਗੋਇਲ ਇੰਡਸਟਰੀਜ਼ ਨਰਵਾਣਾ ਦੇ ਮਾਲਕ ਹਨ, ਨੇ ਪੁਲਸ ਨੂੰ ਦਿੱਤੀ ਸ਼ਿਕਾਇਤ 'ਚ ਦੱਸਿਆ ਕਿ ਉਹ ਝੋਨੇ ਅਤੇ ਕਣਕ ਦੀ ਖਰੀਦ ਦੇ ਸਬੰਧ 'ਚ ਸਰਕਾਰੀ ਖੇਤੀਬਾੜੀ ਵਿਭਾਗ ਦੇ ਦਫਤਰ ਗਿਆ ਸੀ। ਉਥੇ ਮੌਜੂਦ ਅਧਿਕਾਰੀਆਂ ਨੇ ਉਨ੍ਹਾਂ ਨੂੰ ਸਟਾਕ ਖਤਮ ਹੋਣ ਦੀ ਗੱਲ ਕਹਿ ਕੇ ਕੁਝ ਦਿਨਾਂ ਬਾਅਦ ਆਉਣ ਲਈ ਕਿਹਾ।ਸ਼ਿਕਾਇਤ ਅਨੁਸਾਰ ਦੋ ਦਿਨ ਬਾਅਦ ਅਨਮੋਲ ਨਾਂ ਦੇ ਵਿਅਕਤੀ ਨੇ ਸੁਭਾਸ਼ ਨੂੰ ਫੋਨ ਕਰਕੇ ਸਰਕਾਰੀ ਐਗਰੀਫੈੱਡ ਕੰਪਨੀ ਦਾ ਮੁਲਾਜ਼ਮ ਹੋਣ ਦਾ ਦਾਅਵਾ ਕੀਤਾ ਅਤੇ ਉਸ ਨੂੰ ਝੋਨੇ ਅਤੇ ਕਣਕ ਦਾ ਸਟਾਕ ਦਿਵਾਉਣ ਦਾ ਵਾਅਦਾ ਕੀਤਾ।

12 ਮਈ 2024 ਨੂੰ ਸੁਭਾਸ਼ ਨੂੰ ਮੁਹਾਲੀ ਦੇ ਇੱਕ ਹੋਟਲ ਵਿੱਚ ਬੁਲਾਇਆ ਗਿਆ, ਜਿੱਥੇ ਅਨਮੋਲ ਦੇ ਨਾਲ ਇੱਕ ਹੋਰ ਵਿਅਕਤੀ ਵੀ ਮੌਜੂਦ ਸੀ। ਇੱਕ ਸਰਕਾਰੀ ਏਜੰਸੀ ਦੇ ਮੁਲਾਜ਼ਮ ਹੋਣ ਦਾ ਦਾਅਵਾ ਕਰ ਰਹੇ ਇਨ੍ਹਾਂ ਲੋਕਾਂ ਨੇ 10-12 ਦਿਨਾਂ ਵਿੱਚ 2000 ਟਨ ਚੌਲ ਮਿਲਣ ਦਾ ਵਾਅਦਾ ਕੀਤਾ ਸੀ।

20 ਲੱਖ ਰੁਪਏ ਲੈ ਕੇ ਫਰਾਰ ਹੋ ਗਿਆ

ਸੁਭਾਸ਼ ਅਨੁਸਾਰ ਸਟਾਕ ਦੇਣ ਦੇ ਬਦਲੇ 20 ਲੱਖ ਰੁਪਏ ਦੀ ਮੰਗ ਕੀਤੀ ਗਈ ਸੀ। 16 ਜੂਨ ਨੂੰ ਸੁਭਾਸ਼ ਨੇ ਕੁਰਾਲੀ ਵਿੱਚ ਅਨਮੋਲ ਦੀ ਮਾਸੀ ਟੀਨਾ ਨੂੰ 20 ਲੱਖ ਰੁਪਏ ਦਿੱਤੇ। ਟੀਨਾ ਨੇ 15 ਲੱਖ ਰੁਪਏ ਆਪਣੇ ਕੋਲ ਰੱਖੇ, ਜਦਕਿ 5 ਲੱਖ ਰੁਪਏ ਲੈ ਕੇ ਸੈਕਟਰ-86 ਮੋਹਾਲੀ ਸਥਿਤ ਅਨਮੋਲ ਨੂੰ ਦੇ ਦਿੱਤੇ। ਇਸ ਤੋਂ ਬਾਅਦ ਜਦੋਂ ਸੁਭਾਸ਼ ਚੌਲ ਖਰੀਦਣ ਆਇਆ ਤਾਂ ਉਸ ਨੂੰ ਪਤਾ ਲੱਗਾ ਕਿ ਸਟਾਕ ਨਹੀਂ ਆਇਆ।

ਪੁਲਿਸ ਨੇ ਮਾਮਲਾ ਦਰਜ ਕਰ ਲਿਆ ਹੈ

ਸੁਭਾਸ਼ ਨੇ ਮੁਲਜ਼ਮਾਂ ਨਾਲ ਸੰਪਰਕ ਕਰਨ ਦੀ ਕੋਸ਼ਿਸ਼ ਕੀਤੀ ਤਾਂ ਉਹ ਟਾਲ-ਮਟੋਲ ਕਰਨ ਲੱਗੇ। ਅਖੀਰ ਸੁਭਾਸ਼ ਨੇ ਪੁਲਿਸ ਕੋਲ ਸ਼ਿਕਾਇਤ ਦਰਜ ਕਰਵਾਈ। ਪੁਲੀਸ ਨੇ ਪਿੰਡ ਬਡਾਲੀ ਅੱਲਾਹ ਸਿੰਘ, ਫਤਿਹਗੜ੍ਹ ਸਾਹਿਬ ਵਾਸੀ ਅਨਮੋਲ ਉਰਫ਼ ਆਸ਼ੂ ਸ਼ਰਮਾ, ਸੁਖਜਿੰਦਰ ਸਿੰਘ, ਬੱਬਲ ਸ਼ਾਰਦਾ ਅਤੇ ਕੁਰਾਲੀ ਵਾਸੀ ਅਨਮੋਲ ਦੀ ਮਾਸੀ ਟੀਨਾ ਖ਼ਿਲਾਫ਼ ਕੇਸ ਦਰਜ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।