Green card in America : ਅਮਰੀਕਾ 'ਚ ਗ੍ਰੀਨ ਕਾਰਡ ਲਈ 'ਫ਼ਿਲਮੀ' ਸਾਜ਼ਿਸ਼: 11 ਭਾਰਤੀਆਂ ਨੇ ਰਚੀ ਨਕਲੀ ਡਕੈਤੀ ਦੀ ਕਹਾਣੀ
ਹੁਣ ਪਹੁੰਚੇ ਜੇਲ੍ਹ
ਬੋਸਟਨ: 14 ਮਾਰਚ, 2026
ਅਮਰੀਕਾ ਵਿੱਚ ਪੱਕੇ ਹੋਣ (ਗ੍ਰੀਨ ਕਾਰਡ) ਦੇ ਲਾਲਚ ਵਿੱਚ 11 ਭਾਰਤੀ ਨਾਗਰਿਕਾਂ ਵੱਲੋਂ ਰਚੀ ਗਈ ਇੱਕ ਬੇਹੱਦ ਚਲਾਕ ਸਾਜ਼ਿਸ਼ ਦਾ ਪਰਦਾਫਾਸ਼ ਹੋਇਆ ਹੈ। ਇਨ੍ਹਾਂ ਵਿਅਕਤੀਆਂ 'ਤੇ ਦੋਸ਼ ਹੈ ਕਿ ਉਨ੍ਹਾਂ ਨੇ ਅਮਰੀਕੀ ਵੀਜ਼ਾ ਨਿਯਮਾਂ ਦਾ ਨਜਾਇਜ਼ ਫਾਇਦਾ ਉਠਾਉਣ ਲਈ ਸੁਵਿਧਾ ਸਟੋਰਾਂ 'ਤੇ ਹਥਿਆਰਬੰਦ ਡਕੈਤੀਆਂ ਦਾ ਝੂਠਾ ਨਾਟਕ ਰਚਿਆ। ਅਮਰੀਕੀ ਅਧਿਕਾਰੀਆਂ ਨੇ ਇਸ ਵੱਡੇ ਵੀਜ਼ਾ ਧੋਖਾਧੜੀ ਮਾਮਲੇ ਵਿੱਚ ਦੋਸ਼ ਦਾਇਰ ਕਰਦਿਆਂ ਸਾਰਿਆਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ।
ਕੀ ਸੀ 'ਯੂ ਵੀਜ਼ਾ' ਦੇ ਪਿੱਛੇ ਦੀ ਚਲਾਕੀ?
ਇਸ ਪੂਰੀ ਸਾਜ਼ਿਸ਼ ਦਾ ਮੁੱਖ ਮਕਸਦ 'ਯੂ ਵੀਜ਼ਾ' (U Visa) ਪ੍ਰਾਪਤ ਕਰਨਾ ਸੀ। ਅਮਰੀਕੀ ਕਾਨੂੰਨ ਅਨੁਸਾਰ, ਇਹ ਵੀਜ਼ਾ ਉਨ੍ਹਾਂ ਪ੍ਰਵਾਸੀਆਂ ਨੂੰ ਦਿੱਤਾ ਜਾਂਦਾ ਹੈ ਜੋ ਕਿਸੇ ਗੰਭੀਰ ਅਪਰਾਧ ਦਾ ਸ਼ਿਕਾਰ ਹੋਏ ਹੋਣ ਅਤੇ ਪੁਲਿਸ ਦੀ ਜਾਂਚ ਵਿੱਚ ਮਦਦ ਕਰਨ। 'ਯੂ ਵੀਜ਼ਾ' ਮਿਲਣ ਤੋਂ ਬਾਅਦ ਅਮਰੀਕਾ ਵਿੱਚ ਕੰਮ ਕਰਨ ਦੀ ਇਜਾਜ਼ਤ ਮਿਲ ਜਾਂਦੀ ਹੈ ਅਤੇ ਕੁਝ ਸਾਲਾਂ ਵਿੱਚ ਗ੍ਰੀਨ ਕਾਰਡ ਦਾ ਰਸਤਾ ਸਾਫ਼ ਹੋ ਜਾਂਦਾ ਹੈ। ਮੁਲਜ਼ਮਾਂ ਨੇ ਇਸੇ ਕਾਨੂੰਨ ਨੂੰ ਹਥਿਆਰ ਬਣਾ ਕੇ ਖੁਦ ਨੂੰ 'ਪੀੜਤ' ਦਿਖਾਉਣ ਦੀ ਯੋਜਨਾ ਬਣਾਈ ਸੀ।
ਕਿਵੇਂ ਖੇਡਿਆ ਗਿਆ ਡਕੈਤੀ ਦਾ 'ਡਰਾਮਾ'?
ਚਾਰਜਸ਼ੀਟ ਅਨੁਸਾਰ, ਇਸ ਸਾਜ਼ਿਸ਼ ਦਾ ਮੁੱਖ ਸੂਤਰਧਾਰ 'ਰਾਮਬਾਈ' ਨਾਮ ਦਾ ਵਿਅਕਤੀ ਸੀ। ਯੋਜਨਾ ਦੇ ਤਹਿਤ:
ਸੀਸੀਟੀਵੀ ਕੈਮਰਿਆਂ ਦੇ ਸਾਹਮਣੇ ਇੱਕ ਨਕਲੀ ਲੁਟੇਰਾ ਬੰਦੂਕ ਦੀ ਨੋਕ 'ਤੇ ਸਟੋਰ ਕਲਰਕ (ਮੁਲਜ਼ਮ) ਨੂੰ ਧਮਕਾਉਂਦਾ ਅਤੇ ਪੈਸੇ ਲੈ ਕੇ ਭੱਜ ਜਾਂਦਾ ਸੀ।
ਲੁਟੇਰੇ ਦੇ ਜਾਣ ਤੋਂ ਬਾਅਦ, ਕਲਰਕ ਜਾਣਬੁੱਝ ਕੇ ਪੁਲਿਸ ਨੂੰ ਫ਼ੋਨ ਕਰਦਾ ਤਾਂ ਜੋ ਅਪਰਾਧ ਨੂੰ ਅਸਲੀ ਦਿਖਾਇਆ ਜਾ ਸਕੇ।
ਜਾਂਚ ਵਿੱਚ ਪਤਾ ਲੱਗਾ ਕਿ ਕਲਰਕਾਂ ਨੇ ਇਸ ਯੋਜਨਾ ਵਿੱਚ ਸ਼ਾਮਲ ਹੋਣ ਲਈ ਰਾਮਬਾਈ ਨੂੰ ਪੈਸੇ ਦਿੱਤੇ ਸਨ, ਜਦਕਿ ਰਾਮਬਾਈ ਨੇ ਸਟੋਰ ਮਾਲਕਾਂ ਨੂੰ ਉਨ੍ਹਾਂ ਦੇ ਸਟੋਰ ਵਰਤਣ ਲਈ ਰਿਸ਼ਵਤ ਦਿੱਤੀ ਸੀ।
ਗ੍ਰਿਫ਼ਤਾਰ ਕੀਤੇ ਗਏ ਮੁਲਜ਼ਮ
ਇਸ ਮਾਮਲੇ ਵਿੱਚ ਜਿਤੇਂਦਰ ਕੁਮਾਰ ਪਟੇਲ, ਮਹੇਸ਼ ਕੁਮਾਰ ਪਟੇਲ, ਸੰਜੇ ਕੁਮਾਰ ਪਟੇਲ, ਰਮੇਸ਼ਭਾਈ ਪਟੇਲ ਸਮੇਤ 11 ਲੋਕਾਂ ਨੂੰ ਨਾਮਜ਼ਦ ਕੀਤਾ ਗਿਆ ਹੈ। ਇਹ ਸਾਰੇ ਮੈਸੇਚਿਉਸੇਟਸ, ਕੈਂਟਕੀ ਅਤੇ ਓਹੀਓ ਵਰਗੇ ਰਾਜਾਂ ਵਿੱਚ ਗੈਰ-ਕਾਨੂੰਨੀ ਤੌਰ 'ਤੇ ਰਹਿ ਰਹੇ ਸਨ। ਇਨ੍ਹਾਂ ਵਿੱਚੋਂ ਇੱਕ ਮਹਿਲਾ, ਦੀਪਿਕਾਬੇਨ ਪਟੇਲ ਨੂੰ ਪਹਿਲਾਂ ਹੀ ਭਾਰਤ ਡਿਪੋਰਟ ਕੀਤਾ ਜਾ ਚੁੱਕਾ ਹੈ।
ਸਜ਼ਾ ਦੀ ਤਿਆਰੀ
ਵੀਜ਼ਾ ਧੋਖਾਧੜੀ ਦੀ ਇਸ ਸਾਜ਼ਿਸ਼ ਲਈ ਮੁਲਜ਼ਮਾਂ ਨੂੰ 5 ਸਾਲ ਤੱਕ ਦੀ ਕੈਦ ਅਤੇ 250,000 ਅਮਰੀਕੀ ਡਾਲਰ (ਲਗਭਗ 2 ਕਰੋੜ ਰੁਪਏ) ਦਾ ਜੁਰਮਾਨਾ ਹੋ ਸਕਦਾ ਹੈ। ਅਮਰੀਕੀ ਸਰਕਾਰੀ ਵਕੀਲਾਂ ਨੇ ਸਪੱਸ਼ਟ ਕੀਤਾ ਹੈ ਕਿ ਇਮੀਗ੍ਰੇਸ਼ਨ ਪ੍ਰਣਾਲੀ ਨਾਲ ਅਜਿਹੀ ਖੇਡ ਖੇਡਣ ਵਾਲਿਆਂ ਨੂੰ ਬਖਸ਼ਿਆ ਨਹੀਂ ਜਾਵੇਗਾ।