ਦੇਸ਼ ਵਿੱਚ ਕੋਰੋਨਾ ਫਿਰ ਫੈਲਣ ਲੱਗਾ: ਮਹਾਰਾਸ਼ਟਰ-ਕਰਨਾਟਕ ਵਿੱਚ ਚਿੰਤਾ

ਦੇਸ਼ ਵਿੱਚ ਕੋਰੋਨਾ ਫਿਰ ਫੈਲਣ ਲੱਗਾ: ਮਹਾਰਾਸ਼ਟਰ-ਕਰਨਾਟਕ ਵਿੱਚ ਚਿੰਤਾ

 ਸਰਕਾਰਾਂ ਨੇ ਜਾਰੀ ਕੀਤੀਆਂ ਐਡਵਾਈਜ਼ਰੀਆਂ

ਦੇਸ਼ ਵਿੱਚ ਕੋਰੋਨਾ ਦੇ ਮਾਮਲਿਆਂ ਵਿੱਚ ਫਿਰ ਵਾਧਾ ਆ ਰਿਹਾ ਹੈ। ਮਹਾਰਾਸ਼ਟਰ, ਕਰਨਾਟਕ, ਕੇਰਲ, ਦਿੱਲੀ, ਉੱਤਰਾਖੰਡ, ਹਰਿਆਣਾ, ਉੱਤਰ ਪ੍ਰਦੇਸ਼ ਅਤੇ ਆਂਧਰਾ ਪ੍ਰਦੇਸ਼ ਸਮੇਤ ਕਈ ਰਾਜਾਂ ਵਿੱਚ ਨਵੇਂ ਕੇਸ ਸਾਹਮਣੇ ਆ ਰਹੇ ਹਨ। ਕੇਂਦਰ ਅਤੇ ਰਾਜ ਸਰਕਾਰਾਂ ਨੇ ਹਸਪਤਾਲਾਂ ਨੂੰ ਚੌਕਸ ਰਹਿਣ ਅਤੇ ਤਿਆਰੀਆਂ ਪੂਰੀਆਂ ਕਰਨ ਦੇ ਹੁਕਮ ਦਿੱਤੇ ਹਨ। ਹਾਲਾਂਕਿ, ਸਰਕਾਰਾਂ ਦਾ ਕਹਿਣਾ ਹੈ ਕਿ ਜ਼ਿਆਦਾਤਰ ਕੇਸ ਹਲਕੇ ਹਨ ਅਤੇ ਘਬਰਾਉਣ ਦੀ ਲੋੜ ਨਹੀਂ।

ਮੁੱਖ ਰਾਜਾਂ ਵਿੱਚ ਹਾਲਾਤ

ਮਹਾਰਾਸ਼ਟਰ: ਮਈ ਮਹੀਨੇ ਵਿੱਚ ਸਿਰਫ਼ ਮੁੰਬਈ ਵਿੱਚ 95 ਕੋਰੋਨਾ ਕੇਸ ਸਾਹਮਣੇ ਆਏ ਹਨ, ਜਦਕਿ ਪੂਰੇ ਰਾਜ ਵਿੱਚ ਜਨਵਰੀ ਤੋਂ ਹੁਣ ਤੱਕ 106 ਕੇਸ ਦਰਜ ਹੋਏ ਹਨ। ਠਾਣੇ ਵਿੱਚ ਵੀ 8 ਨਵੇਂ ਮਰੀਜ਼ ਮਿਲੇ ਹਨ ਅਤੇ ਇੱਕ ਮੌਤ ਹੋਈ ਹੈ। ਹਸਪਤਾਲਾਂ ਨੂੰ ਆਕਸੀਜਨ, ਬਿਸਤਰੇ, ਦਵਾਈਆਂ ਅਤੇ ਟੀਕਿਆਂ ਦੀ ਉਪਲਬਧਤਾ ਯਕੀਨੀ ਬਣਾਉਣ ਲਈ ਕਿਹਾ ਗਿਆ ਹੈ।

ਕਰਨਾਟਕ: 2025 ਵਿੱਚ ਹੁਣ ਤੱਕ 38 ਸਰਗਰਮ ਕੇਸ ਹਨ, ਜਿਨ੍ਹਾਂ ਵਿੱਚੋਂ 32 ਕੇਵਲ ਬੈਂਗਲੁਰੂ ਵਿੱਚ ਹਨ। ਹਾਲ ਹੀ ਵਿੱਚ ਇੱਕ 84 ਸਾਲਾ ਵਿਅਕਤੀ ਦੀ ਮੌਤ ਹੋਈ ਹੈ ਅਤੇ ਇੱਕ 9 ਮਹੀਨੇ ਦਾ ਬੱਚਾ ਵੀ ਸੰਕਰਮਿਤ ਪਾਇਆ ਗਿਆ ਹੈ, ਪਰ ਉਸਦੀ ਹਾਲਤ ਸਥਿਰ ਹੈ। ਸਿਹਤ ਵਿਭਾਗ ਨੇ ਖਾਸ ਕਰਕੇ ਗਰਭਵਤੀ ਮਹਿਲਾਵਾਂ, ਬੱਚਿਆਂ ਅਤੇ ਬੁਜ਼ੁਰਗਾਂ ਲਈ ਮਾਸਕ ਅਤੇ ਸੈਨਿਟਾਈਜ਼ਰ ਵਰਤਣ ਦੀ ਸਲਾਹ ਦਿੱਤੀ ਹੈ।

ਕੇਰਲ: ਮਈ ਮਹੀਨੇ ਵਿੱਚ 273 ਨਵੇਂ ਕੇਸ ਸਾਹਮਣੇ ਆਏ ਹਨ, ਜੋ ਦੇਸ਼ ਵਿੱਚ ਸਭ ਤੋਂ ਵੱਧ ਹਨ। ਹਸਪਤਾਲਾਂ ਵਿੱਚ ਮਾਸਕ ਲਾਜ਼ਮੀ ਕਰ ਦਿੱਤੇ ਗਏ ਹਨ ਅਤੇ ਲੱਛਣ ਵਾਲਿਆਂ ਨੂੰ ਟੈਸਟ ਕਰਵਾਉਣ ਦੀ ਸਲਾਹ ਦਿੱਤੀ ਜਾ ਰਹੀ ਹੈ।

ਦਿੱਲੀ: 23 ਨਵੇਂ ਕੇਸ ਆਉਣ ਤੋਂ ਬਾਅਦ ਸਿਹਤ ਵਿਭਾਗ ਨੇ ਹਸਪਤਾਲਾਂ ਨੂੰ ਤਿਆਰ ਰਹਿਣ ਅਤੇ ਬਿਸਤਰੇ, ਆਕਸੀਜਨ, ਦਵਾਈਆਂ ਅਤੇ ਟੀਕਿਆਂ ਦੀ ਉਪਲਬਧਤਾ ਯਕੀਨੀ ਬਣਾਉਣ ਲਈ ਕਿਹਾ ਹੈ। ਸਾਰੇ ਮਰੀਜ਼ ਘਰ ਵਿੱਚ ਹੀ ਇਲਾਜ ਅਧੀਨ ਹਨ ਅਤੇ ਹਾਲਤ ਸਥਿਰ ਹੈ।

ਹਰਿਆਣਾ: 23 ਮਈ ਤੱਕ 4 ਕੇਸ ਸਾਹਮਣੇ ਆਏ ਹਨ (2 ਗੁਰੂਗ੍ਰਾਮ, 2 ਫਰੀਦਾਬਾਦ)। ਕਿਸੇ ਵੀ ਮਰੀਜ਼ ਦਾ ਵਿਦੇਸ਼ ਯਾਤਰਾ ਇਤਿਹਾਸ ਨਹੀਂ ਹੈ।

ਉੱਤਰ ਪ੍ਰਦੇਸ਼: ਨੋਇਡਾ ਵਿੱਚ 55 ਸਾਲਾ ਔਰਤ ਅਤੇ ਗਾਜ਼ੀਆਬਾਦ ਵਿੱਚ 4 ਲੋਕ ਕੋਰੋਨਾ ਪਾਜ਼ੀਟਿਵ ਪਾਏ ਗਏ ਹਨ। ਸਾਰੇ ਘਰ ਵਿੱਚ ਕੁਆਰੰਟੀਨ ਹਨ।

ਉਤਰਾਖੰਡ: 2 ਕੇਸ ਰਿਸ਼ੀਕੇਸ਼ ਏਮਜ਼ ਵਿੱਚ ਦਾਖਲ ਹਨ, ਦੋਵੇਂ ਬਾਹਰੋਂ ਆਏ ਹਨ ਅਤੇ ਹਾਲਤ ਹਲਕੀ ਹੈ।

ਆਂਧਰਾ ਪ੍ਰਦੇਸ਼: 4 ਨਵੇਂ ਕੇਸ ਮਿਲੇ ਹਨ।

ਨਵੇਂ ਵੇਰੀਐਂਟ ਅਤੇ ਖਤਰਾ

INSACOG ਦੇ ਅਨੁਸਾਰ, ਭਾਰਤ ਵਿੱਚ ਕੋਰੋਨਾ ਦੇ ਨਵੇਂ ਵੇਰੀਐਂਟ NB.1.8.1 ਦਾ ਇੱਕ ਕੇਸ ਅਤੇ LF.7 ਦੇ ਚਾਰ ਕੇਸ ਮਿਲੇ ਹਨ। ਇਹ ਦੋਵੇਂ ਵੇਰੀਐਂਟ WHO ਵੱਲੋਂ ‘Variants Under Monitoring’ ਵਜੋਂ ਦਰਜ ਹਨ। ਹਾਲਾਂਕਿ, ਵੱਡਾ ਖਤਰਾ ਨਹੀਂ ਦੱਸਿਆ ਗਿਆ, ਪਰ ਇਹ ਵੇਰੀਐਂਟ ਚੀਨ, ਸਿੰਗਾਪੁਰ, ਹਾਂਗਕਾਂਗ ਅਤੇ ਅਮਰੀਕਾ ਵਿੱਚ ਵੀ ਮਿਲ ਰਹੇ ਹਨ।

ਸਰਕਾਰਾਂ ਦੀ ਤਿਆਰੀ ਅਤੇ ਐਡਵਾਈਜ਼ਰੀ

ਹਸਪਤਾਲਾਂ ਨੂੰ ਆਕਸੀਜਨ, ਬਿਸਤਰੇ, ਟੈਸਟਿੰਗ ਕਿੱਟਾਂ ਅਤੇ ਟੀਕਿਆਂ ਦੀ ਉਪਲਬਧਤਾ ਯਕੀਨੀ ਬਣਾਉਣ ਲਈ ਕਿਹਾ ਗਿਆ ਹੈ।

ਖਾਸ ਕਰਕੇ ਬਜ਼ੁਰਗ, ਗਰਭਵਤੀ ਮਹਿਲਾਵਾਂ, ਬੱਚਿਆਂ ਅਤੇ ਪੂਰਵ-ਬੀਮਾਰੀਆਂ ਵਾਲਿਆਂ ਲਈ ਮਾਸਕ ਅਤੇ ਸੈਨਿਟਾਈਜ਼ਰ ਦੀ ਵਰਤੋਂ ਦੀ ਸਲਾਹ।

ਜਿਨ੍ਹਾਂ ਨੂੰ ਜ਼ੁਕਾਮ ਜਾਂ ਖੰਘ ਦੇ ਲੱਛਣ ਹਨ, ਉਹਨਾਂ ਨੂੰ ਟੈਸਟ ਕਰਵਾਉਣ ਦੀ ਸਲਾਹ।

ਸਥਿਤੀ ‘ਹਲਕੀ, ਪਰ ਚੌਕਸੀ ਜ਼ਰੂਰੀ’

ਜਿਆਦਾਤਰ ਨਵੇਂ ਕੇਸ ਹਲਕੇ ਹਨ, ਮਰੀਜ਼ ਘਰ ਵਿੱਚ ਹੀ ਆਈਸੋਲੇਟ ਕਰ ਰਹੇ ਹਨ ਅਤੇ ਹਸਪਤਾਲ ਵਿੱਚ ਦਾਖਲ ਹੋਣ ਵਾਲਿਆਂ ਦੀ ਗਿਣਤੀ ਘੱਟ ਹੈ। ਸਰਕਾਰਾਂ ਨੇ ਲੋਕਾਂ ਨੂੰ ਘਬਰਾਉਣ ਦੀ ਲੋੜ ਨਹੀਂ ਦੱਸੀ, ਪਰ ਸਾਵਧਾਨ ਰਹਿਣ ਅਤੇ ਸਿਹਤ ਵਿਭਾਗ ਦੀਆਂ ਹਦਾਇਤਾਂ ਦੀ ਪਾਲਣਾ ਕਰਨ ਦੀ ਅਪੀਲ ਕੀਤੀ ਹੈ।