ਕੈਨੇਡਾ ਬਾਰਡਰ ਸਰਵਿਸਿਜ਼ ਏਜੰਸੀ ਅਤੇ ਆਰਸੀਐੱਮਪੀ ਨੇ ਪੁਆਇੰਟ ਐਡਵਰਡ, ਓਨਟਾਰੀਓ 'ਚ ਬਲੂ ਵਾਟਰ ਬ੍ਰਿਜ ਐਂਟਰੀ ਪੁਆਇੰਟ 'ਤੇ ਦੋ ਹਾਲੀਆ ਘਟਨਾਵਾਂ ਦੌਰਾਨ ਲਗਭਗ 419 ਕਿਲੋ ਸ਼ੱਕੀ ਕੋਕੀਨ ਜ਼ਬਤ ਕੀਤੀ। ਇਨ੍ਹਾਂ ਨਸ਼ੀਲੇ ਪਦਾਰਥਾਂ ਦੀ ਅੰਦਾਜ਼ਨ ਬਾਜ਼ਾਰੀ ਕੀਮਤ $11 ਮਿਲੀਅਨ ਹੈ। ਸੀਬੀਐੱਸਏ ਦੇ ਨੈਸ਼ਨਲ ਟਾਰਗੇਟਿੰਗ ਸੈਂਟਰ ਨੇ ਦੋ ਵਪਾਰਕ ਸ਼ਿਪਮੈਂਟਾਂ ਦੀ ਪਛਾਣ ਕੀਤੀ ਜਿਨ੍ਹਾਂ 'ਚ ਸੰਭਾਵਤ ਤੌਰ 'ਤੇ ਅਮਰੀਕਾ ਤੋਂ ਕੈਨੇਡਾ ਲਈ ਨਸ਼ੀਲੇ ਪਦਾਰਥ ਸਨ ਅਤੇ 27 ਫਰਵਰੀ, 2025 ਨੂੰ, ਸੰਯੁਕਤ ਰਾਜ ਤੋਂ ਆ ਰਹੇ ਇੱਕ ਵਪਾਰਕ ਟਰੱਕ ਨੂੰ ਸੈਕੰਡਰੀ ਜਾਂਚ ਲਈ ਭੇਜਿਆ ਗਿਆ। ਟ੍ਰੇਲਰ ਦੀ ਜਾਂਚ ਦੌਰਾਨ, ਸਰਹੱਦੀ ਸੇਵਾਵਾਂ ਦੇ ਅਧਿਕਾਰੀਆਂ ਨੇ ਚਾਰ ਡਫਲ ਬੈਗ ਜ਼ਬਤ ਕੀਤੇ ਜਿਨ੍ਹਾਂ 'ਚ ਲਗਭਗ 86 ਕਿਲੋਗ੍ਰਾਮ ਸ਼ੱਕੀ ਕੋਕੀਨ ਸੀ ਜਿਸਦੀ ਅੰਦਾਜ਼ਨ ਕੀਮਤ $2.3 ਮਿਲੀਅਨ ਹੈ। ਆਰਸੀਐੱਮਪੀ ਨੇ ਇਨਿਸਫਿਲ ਦੇ 34 ਸਾਲਾ ਪਵਨਦੀਪ ਢਿੱਲੋਂ 'ਤੇ ਇੱਕ ਨਿਯੰਤਰਿਤ ਪਦਾਰਥ ਦੀ ਦਰਾਮਦ ਅਤੇ ਤਸਕਰੀ ਦੇ ਉਦੇਸ਼ ਲਈ ਇੱਕ ਨਿਯੰਤਰਿਤ ਪਦਾਰਥ ਰੱਖਣ ਦਾ ਦੋਸ਼ ਲਗਾਇਆ।
6 ਮਾਰਚ, 2025 ਨੂੰ, ਸੀਬੀਐੱਸਏ ਨੇ ਅਮਰੀਕਾ ਤੋਂ ਆ ਰਹੇ ਇੱਕ ਹੋਰ ਟਰਾਂਸਪੋਰਟ ਟਰੱਕ ਦਾ ਹਵਾਲਾ ਦਿੱਤਾ ਅਤੇ ਸਰਹੱਦੀ ਸੇਵਾਵਾਂ ਦੇ ਅਧਿਕਾਰੀਆਂ ਨੇ ਵਪਾਰਕ ਲੋਡ ਦੇ ਟ੍ਰੇਲਰ 'ਚੋਂ 333 ਕਿਲੋਗ੍ਰਾਮ ਸ਼ੱਕੀ ਕੋਕੀਨ ਜਿਸਦੀ ਅੰਦਾਜ਼ਨ ਕੀਮਤ $9 ਮਿਲੀਅਨ ਹੈ, ਉਹ ਜ਼ਬਤ ਕੀਤੀ। ਆਰਸੀਐੱਮਪੀ ਨੇ ਬਰੈਂਪਟਨ ਦੇ 23 ਸਾਲਾ ਰਵਿੰਦਰਬੀਰ ਸਿੰਘ 'ਤੇ ਇੱਕ ਨਿਯੰਤਰਿਤ ਪਦਾਰਥ ਦੀ ਦਰਾਮਦ ਅਤੇ ਤਸਕਰੀ ਦੇ ਉਦੇਸ਼ ਲਈ ਇੱਕ ਨਿਯੰਤਰਿਤ ਪਦਾਰਥ ਰੱਖਣ ਦਾ ਦੋਸ਼ ਲਗਾਇਆ। ਦੱਖਣੀ ਓਨਟਾਰੀਓ ਖੇਤਰ ਲਈ ਸੀਐੱਸਬੀਏ ਦੇ ਕਾਰਜਕਾਰੀ ਖੇਤਰੀ ਡਾਇਰੈਕਟਰ ਜਨਰਲ ਮਾਈਕਲ ਪ੍ਰੋਸੀਆ ਨੇ ਇੱਕ ਬਿਆਨ 'ਚ ਕਿਹਾ ਕਿ ਉਹ ਆਪਣੇ ਸਰਹੱਦੀ ਸੇਵਾਵਾਂ ਦੇ ਅਧਿਕਾਰੀਆਂ, ਖੁਫੀਆ ਟੀਮ, ਨੈਸ਼ਨਲ ਟਾਰਗੇਟਿੰਗ ਸੈਂਟਰ ਅਤੇ ਆਰਸੀਐਮਪੀ ਭਾਈਵਾਲਾਂ ਦਾ ਧੰਨਵਾਦ ਕਰਦੇ ਹਨ ਜੋ ਦੇਸ਼ 'ਚ ਗੈਰ-ਕਾਨੂੰਨੀ ਨਸ਼ੀਲੇ ਪਦਾਰਥਾਂ ਦਾ ਪਤਾ ਲਗਾਉਣ ਅਤੇ ਉਨ੍ਹਾਂ ਨੂੰ ਦਾਖਲ ਹੋਣ ਤੋਂ ਰੋਕਣ ਲਈ ਹਮੇਸ਼ਾ ਚੌਕਸ ਰਹੇ ਹਨ।
2025 ਦੀ ਸ਼ੁਰੂਆਤ ਤੋਂ ਲੈ ਕੇ, ਦੱਖਣੀ ਓਨਟਾਰੀਓ ਖੇਤਰ 'ਚ ਸੀਬੀਐੱਸਏ ਨੇ ਸੰਯੁਕਤ ਰਾਜ ਤੋਂ ਆ ਰਹੇ $68 ਮਿਲੀਅਨ ਤੋਂ ਵੱਧ ਮੁੱਲ ਦੇ ਨਸ਼ੀਲੇ ਪਦਾਰਥ ਜ਼ਬਤ ਕੀਤੇ ਹਨ। ਕੈਨੇਡਾ ਸਰਹੱਦ 'ਤੇ ਸੁਰੱਖਿਆ ਵਧਾਉਣ ਅਤੇ ਇਮੀਗ੍ਰੇਸ਼ਨ ਪ੍ਰਣਾਲੀ ਨੂੰ ਮਜ਼ਬੂਤ ਕਰਨ ਲਈ 1.3 ਬਿਲੀਅਨ ਡਾਲਰ ਦਾ ਨਿਵੇਸ਼ ਕਰ ਰਿਹਾ ਹੈ। ਕੈਨੇਡਾ ਦੀ ਸਰਹੱਦੀ ਯੋਜਨਾ ਦੇ ਹਿੱਸੇ ਵਜੋਂ, ਸੀਬੀਐੱਸਏ ਨੇ ਆਪ੍ਰੇਸ਼ਨ ਬਲਿਜ਼ਾਰਡ ਸ਼ੁਰੂ ਕੀਤਾ ਹੈ, ਜੋ ਕਿ ਇੱਕ ਨਿਸ਼ਾਨਾਬੱਧ, ਦੇਸ਼-ਵਿਦੇਸ਼ ਪਹਿਲਕਦਮੀ ਹੈ ਜਿਸਦਾ ਉਦੇਸ਼ ਕੈਨੇਡਾ 'ਚ ਆਉਣ ਅਤੇ ਜਾਣ ਵਾਲੇ ਗੈਰ-ਕਾਨੂੰਨੀ ਤਸਕਰੀ ਨੂੰ ਰੋਕਣਾ ਹੈ, ਜਿਸ 'ਚ ਫੈਂਟਾਨਿਲ ਅਤੇ ਹੋਰ ਸਿੰਥੈਟਿਕ ਨਸ਼ੀਲੇ ਪਦਾਰਥਾਂ 'ਤੇ ਧਿਆਨ ਕੇਂਦਰਿਤ ਕੀਤਾ ਗਿਆ ਹੈ। ਪ੍ਰਕਾਸ਼ਨ ਦੇ ਸਮੇਂ, ਕਥਿਤ ਤਸਕਰੀ ਦੇ ਦੋਸ਼ਾਂ ਦਾ ਸਾਹਮਣਾ ਕਰ ਰਹੇ ਦੋਵੇਂ ਡਰਾਈਵਰਾਂ ਨੂੰ ਆਰਸੀਐੱਮਪੀ ਦੀ ਹਿਰਾਸਤ 'ਚ ਤਬਦੀਲ ਕਰ ਦਿੱਤਾ ਗਿਆ ਹੈ। ਦੋਵੇਂ ਮਾਮਲੇ ਇਸ ਵੇਲੇ ਓਨਟਾਰੀਓ ਕੋਰਟ ਆਫ਼ ਜਸਟਿਸ ਅਧੀਨ ਵਿਚਾਰੇ ਜਾ ਰਹੇ ਹਨ।