ਏਡਜ਼ ਤੋਂ ਪਰਹੇਜ਼ ਜ਼ਰੂਰੀ

ਏਡਜ਼ ਤੋਂ ਪਰਹੇਜ਼ ਜ਼ਰੂਰੀ 

- ਰਜਵਿੰਦਰ ਪਾਲ ਸ਼ਰਮਾ

ਸਮੇਂ ਦੇ ਬਦਲਣ ਨਾਲ ਜੀਵਨ ਸ਼ੈਲੀ ਵਿੱਚ ਆ ਰਹੇ ਬਦਲਾਅ ਕਰਕੇ ਸ਼ਰੀਰ ਦੀ ਰੋਗਾਣੂਆਂ ਨਾਲ ਲੜਨ ਦੀ ਸ਼ਕਤੀ ਵਿੱਚ ਗਿਰਾਵਟ ਆਈ ਹੈ ਜਿਸਦਾ ਮੁੱਖ ਕਾਰਣ ਰੋਜ਼ਾਨਾ ਜ਼ਿੰਦਗੀ ਵਿੱਚੋਂ ਸੰਤੁਲਿਤ ਭੋਜਨ ਦੀ ਅਣਹੋਂਦ ਅਤੇ ਸ਼ਰੀਰਕ ਕਸਰਤ ਦਾ ਮਨਫੀ ਹੋਣਾ ਹੈ। ਸੰਤੁਲਿਤ ਭੋਜਨ ਅਜਿਹਾ ਭੋਜ਼ਨ ਹੈ ਜਿਸ ਵਿੱਚ ਸ਼ਰੀਰ ਨੂੰ ਲੋੜ ਅਨੁਸਾਰ ਸਾਰੇ ਪੌਸ਼ਟਿਕ ਤੱਤ ਮੌਜੂਦ ਹੁੰਦੇ ਹਨ।ਸੰਤੁਲਿਤ ਭੋਜਨ ਅਤੇ ਸ਼ਰੀਰਕ ਕਸਰਤ ਦਾ ਕੰਮ ਕੇਵਲ ਸਰੀਰ ਨੂੰ ਰਿਸਟ ਪੁਸ਼ਟ ਰੱਖਣਾ ਨਹੀਂ ਸਗੋਂ ਨਵੇਂ ਸੈੱਲਾਂ ਨੂੰ ਬਣਨ ਵਿੱਚ ਮਦਦ ਕਰਨਾ ਅਤੇ ਸ਼ਰੀਰ ਦਾ ਸੰਤੁਲਨ ਬਣਾਈ ਰੱਖਣ ਲਈ ਵੀ ਜ਼ਰੂਰੀ ਹੈ। ਮਨੁੱਖੀ ਜੀਵਨ ਸ਼ੈਲੀ ਵਿੱਚ ਵਧ ਰਹੀ ਭੱਜ ਦੌੜ ਅਤੇ ਸਮੇਂ ਦੀ ਕਮੀਂ ਨੇ ਮਨੁੱਖ ਨੂੰ ਬਿਮਾਰ ਹੋਣ ਲਈ ਸਮਾਂ ਕੱਢਣ ਲਈ ਮਜ਼ਬੂਰ ਕਰ ਦਿੱਤਾ ਹੈ।

ਹਸਪਤਾਲ ਵਿੱਚ ਜਾਂਦੇ ਹਾਂ ਤਾਂ ਮਰੀਜ਼ਾਂ ਦੀ ਭੀੜ ਹੈ ਜਿਸ ਤੋਂ ਦੇਖ ਕਿ ਪਤਾ ਲੱਗਦਾ ਹੈ ਕਿ ਸਾਡੇ ਆਲੇ ਦੁਆਲੇ ਕਿੰਨੇ ਹਸਪਤਾਲ ਹਨ ਅਤੇ ਸਾਰੇ ਹੀ ਹਸਪਤਾਲ ਮਰੀਜ਼ਾਂ ਨਾਲ ਭਰੇ ਪਏ ਹਨ ਜਿਥੇ ਆਪਣੀ ਵਾਰੀ ਉਡੀਕਣ ਲਈ ਲੰਮੀਆਂ ਕਤਾਰਾਂ ਵਿੱਚ ਖੜ੍ਹਣਾ ਪੈਂਦਾ ਹੈ।ਬਿਮਾਰੀ ਕੋਈ ਵੀ ਹੋਵੇ ਜਦੋਂ ਵਧ ਜਾਂਦੀ ਹੈ ਤਾਂ ਲਾਇਲਾਜ ਹੋ ਜਾਂਦੀ ਹੈ,ਬਚਾਅ ਇਸ ਵਿੱਚ ਹੀ ਹੈ ਕਿ ਇਸ ਤੋਂ ਬਚਿਆ ਜਾਵੇ ਸਿਆਣੇ ਕਹਿੰਦੇ ਹਨ ਕਿ ਇਲਾਜ਼ ਨਾਲੋਂ ਪਰਹੇਜ਼ ਚੰਗਾ।ਐੱਚ ਆਈ ਵੀ ਏਡਜ਼ ਇੱਕ ਅਜਿਹੀ ਬਿਮਾਰੀ ਹੈ ਜਿਸ ਤੋਂ ਲੱਗਭਗ ਅਸੀਂ ਸਾਰੇ ਜਾਣਦੇ ਹਾਂ ਕੁੱਝ ਲੋਕ ਤਾਂ ਇਸਦਾ ਨਾਮ ਲੈਣਾ ਵੀ ਪਸੰਦ ਨਹੀਂ ਕਰਦੇ।ਏਡਜ਼ (AIDS) ਜਿਸਦਾ ਪੂਰਾ ਨਾਮ ਏਕਵਾਇਰਡ ਇਮਿਊਨੋ ਡੈਂਫੀਸੈਂਸੀ ਸਿੰਡਰੋਮ ਹੈ ਇੱਕ ਭਿਆਨਕ ਬਿਮਾਰੀ ਨਹੀਂ ਸਗੋਂ ਬਿਮਾਰੀਆਂ ਦਾ ਸਮੂਹ ਹੈ ਜ਼ੋ ਐੱਚ ਆਈ ਵੀ (HIV- ਜਿਸਨੂੰ ਹਿਊਮਨ ਇਮਿਊਨੋ ਵਾਇਰਸ) ਦੁਆਰਾ ਹੁੰਦਾ ਹੈ ਜੋ ਕਿ ਇੱਕ ਤਰ੍ਹਾਂ ਦਾ ਵਾਇਰਸ ਹੈ। ਏਡਜ਼ ਦੀ ਬਿਮਾਰੀ ਹੋਣ ਦੇ ਮੁੱਖ ਕਾਰਣਾਂ ਵਿੱਚ ਅਸੁਰੱਖਿਅਤ ਯੌਨ ਸਬੰਧ,ਦੁੱਧ ਰਾਹੀਂ ਮਾਂ ਤੋਂ ਬੱਚੇ ਨੂੰ,ਇੱਕੋ ਸਿਰੰਜ ਵਰਤਣ ਨਾਲ ਅਤੇ ਏਡਜ਼ ਪ੍ਰਭਾਵਿਤ ਵਿਅਕਤੀ ਤੋਂ ਕਿਸੇ ਤੰਦਰੁਸਤ ਵਿਅਕਤੀ ਨੂੰ ਖ਼ੂਨ ਚੜ੍ਹਾਉਣ ਨਾਲ ਫੈਲ ਸਕਦਾ ਹੈ। ਏਡਜ਼ ਦੇ ਮੁੱਖ ਲੱਛਣਾਂ ਵਿੱਚ ਭਾਰ ਘਟਣਾ,ਵਾਰ ਵਾਰ ਬੁਖ਼ਾਰ ਚੜ੍ਹਣਾ ਅਤੇ ਗਲੇ ਦੀਆਂ ਲਿੱਫ ਨੋਡ ਤੇ ਸੋਜ਼ ਆ ਜਾਣਾ ਸ਼ਾਮਿਲ ਹਨ। ਏਡਜ਼ ਦੀ ਬਿਮਾਰੀ ਪ੍ਰਤੀ ਸਮਾਜ਼ ਵਿੱਚ ਫ਼ੈਲੇ ਵਹਿਮ ਭਰਮ ਇਸ ਬਿਮਾਰੀ ਤੋਂ ਪੀੜ੍ਹਤ ਵਿਅਕਤੀਆਂ ਲਈ ਸਮਾਜ਼ ਵਿੱਚ ਨਿਰਾਸ਼ਾ ਪੈਦਾ ਕਰਦੇ ਹਨ। ਸਾਨੂੰ ਇਹ ਸਮਝਣਾ ਹੋਵੇਗਾ ਕਿ ਏਡਜ਼ ਕੋਈ ਛੂਤ ਦੀ ਬਿਮਾਰੀ ਨਹੀਂ ਜ਼ੋ ਇੱਕ ਵਿਅਕਤੀ ਤੋਂ ਦੂਜੇ ਵਿਅਕਤੀ ਨੂੰ ਇਕੱਠੇ ਰਹਿਣ,ਖਾਣ ਪੀਣ ਜਾਂ ਹੱਥ ਫੈਲਾਉਣ ਨਾਲ ਹੋ ਸਕਦੀ ਹੈ। ਦਫ਼ਤਰਾਂ ਅਤੇ ਆਂਢ ਗੁਆਂਢ ਵਿੱਚ ਜ਼ੇਕਰ ਕੋਈ ਵਿਅਕਤੀ ਏਡਜ਼ ਨਾਲ ਪੀੜਤ ਵਿਅਕਤੀ ਪਾਇਆ ਜਾਂਦਾ ਹੈ ਤਾਂ ਉਸ ਨਾਲ ਭੇਦਭਾਵ ਨਹੀਂ ਸਗੋਂ ਇਲਾਜ਼ ਕਰਵਾਉਣ ਲਈ ਉਤਸ਼ਾਹਿਤ ਕਰਨਾ ਚਾਹੀਦਾ ਹੈ। ਸਮਾਂ ਪਾ ਕੇ ਵਿਅਕਤੀ ਠੀਕ ਹੋਣ ਵੱਲ ਵੱਧ ਸਕਦਾ ਹੈ।1986 ਤੋਂ ਹਰ ਸਾਲ 01 ਦਸੰਬਰ ਨੂੰ ਏਡਜ਼ ਪ੍ਰਤੀ ਜਾਗਰੂਕਤਾ ਫੈਲਾਉਣ ਲਈ ਵਿਸ਼ਵ ਏਡਜ਼ ਦਿਵਸ ਮਨਾਇਆ ਜਾਂਦਾ ਹੈ। ਨੈਸ਼ਨਲ ਏਡਜ਼ ਕੰਟਰੋਲ ਆਰਗੇਨਾਈਜੇਸਨ,ਸਿਹਤ ਵਿਭਾਗ, ਸਿੱਖਿਆ ਸੰਸਥਾਵਾਂ ਅਤੇ ਗੈਰ ਸਰਕਾਰੀ ਸੰਸਥਾਵਾਂ ਵੀ ਏਡਜ਼ ਪ੍ਰਤੀ ਜਾਗਰੂਕ ਕਰਨ ਲਈ ਕੈਂਪ ਅਤੇ ਸੈਮੀਨਾਰ ਦਾ ਆਯੋਜਨ ਕਰਦੇ ਹਨ। ਏਡਜ਼ ਤੋਂ ਬਚਣ ਲਈ ਪਰਹੇਜ਼ ਲਈ ਸਭ ਤੋਂ ਜ਼ਰੂਰੀ ਹੈ ਪ੍ਰੰਤੂ ਜ਼ੇਕਰ ਕਦੇ ਕੋਈ ਪੀੜਤ ਵੀ ਹੋ ਜਾਵੇ ਤਾਂ ਇਲਾਜ਼ ਕਰਵਾਉਣ ਤੋਂ ਕਦੇ ਵੀ ਪਿੱਛੇ ਨਹੀਂ ਹਟਣਾ ਚਾਹੀਦਾ।

ਏਡਜ਼ ਵੀ ਦੂਜੀਆਂ ਬਿਮਾਰੀਆਂ ਦੇ ਵਾਂਗ ਇੱਕ ਪ੍ਰਕਾਰ ਦੀ ਬਿਮਾਰੀ ਹੈ ਇਸਦੇ ਪੀੜ੍ਹਤ ਨੂੰ ਵੀ ਸਨਮਾਨ ਨਾਲ ਜਿਉਣ ਦਾ ਅਧਿਕਾਰ ਹੈ।

                     ਰਜਵਿੰਦਰ ਪਾਲ ਸ਼ਰਮਾ 

                     ਪਿੰਡ ਕਾਲਝਰਾਣੀ 

                     ਡਾਕਖਾਨਾ ਚੱਕ ਅਤਰ ਸਿੰਘ ਵਾਲਾ 

                     ਤਹਿ ਅਤੇ ਜ਼ਿਲ੍ਹਾ ਬਠਿੰਡਾ 

                     7087367969