ਅਮਰੀਕਾ ਦਾ ਵੀਜ਼ਾ ਹੋ ਗਿਆ ਮਹਿੰਗਾ, ਹੁਣ ਕਿੰਨੇ ਵਾਧੂ ਪੈਸੇ ਦੇਣੇ ਪੈਣਗੇ ?

 ਅਮਰੀਕਾ ਦਾ ਵੀਜ਼ਾ ਪ੍ਰਾਪਤ ਕਰਨ ਦੇ ਚਾਹਵਾਨ ਭਾਰਤੀਆਂ ਲਈ ਇੱਕ ਨਵੀਂ ਖ਼ਬਰ ਹੈ। ਹੁਣ ਅਮਰੀਕਾ ਦਾ ਵੀਜ਼ਾ ਹੋਰ ਮਹਿੰਗਾ ਹੋ ਗਿਆ ਹੈ। ਵਨ ਬਿਗ ਬਿਊਟੀਫੁੱਲ ਐਕਟ ਤਹਿਤ ਇੱਕ ਨਵਾਂ ਆਰਡਰ ਲਾਗੂ ਹੋਣ ਜਾ ਰਿਹਾ ਹੈ, ਜਿਸ ਤੋਂ ਬਾਅਦ ਅਮਰੀਕਾ ਦਾ ਵੀਜ਼ਾ ਪ੍ਰਾਪਤ ਕਰਨ ਲਈ ਵਾਧੂ ਪੈਸੇ ਦੇਣੇ ਪੈਣਗੇ।

ਕਿੰਨਾ ਵਾਧਾ ਹੋਇਆ ਅਤੇ ਕਦੋਂ ਲਾਗੂ ਹੋਵੇਗਾ?

ਟਰੰਪ ਸਰਕਾਰ ਨੇ ਸਾਰੇ ਗੈਰ-ਪ੍ਰਵਾਸੀ ਵੀਜ਼ਿਆਂ ਲਈ $250 (ਲਗਭਗ 21,546 ਰੁਪਏ) ਦੀ ਇੱਕ ਨਵੀਂ ਵੀਜ਼ਾ ਇੰਟੈਗਰੀ ਫੀਸ ਪੇਸ਼ ਕੀਤੀ ਹੈ। ਇਹ ਫੀਸ ਮੌਜੂਦਾ ਵੀਜ਼ਾ ਫੀਸ ਤੋਂ $185 (ਲਗਭਗ 15,944 ਰੁਪਏ) ਵਾਧੂ ਹੋਵੇਗੀ। ਇਹ ਨਵਾਂ ਪ੍ਰਬੰਧ ਅਮਰੀਕੀ ਸੰਸਦ ਵਿੱਚ ਹਾਲ ਹੀ ਵਿੱਚ ਪਾਸ ਕੀਤੇ ਗਏ ਵਨ ਬਿਗ ਬਿਊਟੀਫੁੱਲ ਐਕਟ ਦਾ ਹਿੱਸਾ ਹੈ, ਜੋ ਕਿ ਅਗਲੇ ਵਿੱਤੀ ਸਾਲ ਤੋਂ ਲਾਗੂ ਹੋਵੇਗਾ।

ਕਿਨ੍ਹਾਂ ਨੂੰ ਮਿਲੇਗੀ ਫੀਸ ਵਾਪਸ ਅਤੇ ਕਿਹੜੇ ਵੀਜ਼ੇ ਹੋਣਗੇ ਪ੍ਰਭਾਵਿਤ?

ਨਵੇਂ ਹੁਕਮ ਅਨੁਸਾਰ, ਜਿਹੜੇ ਬਿਨੈਕਾਰ ਵੀਜ਼ਾ ਪ੍ਰਾਪਤ ਕਰਨ ਤੋਂ ਬਾਅਦ ਅਮਰੀਕੀ ਨਿਯਮਾਂ ਦੀ ਪੂਰੀ ਤਰ੍ਹਾਂ ਪਾਲਣਾ ਕਰਦੇ ਹਨ ਅਤੇ ਸਮੇਂ ਸਿਰ ਅਮਰੀਕਾ ਛੱਡ ਦਿੰਦੇ ਹਨ, ਉਨ੍ਹਾਂ ਨੂੰ ਇਹ ਵਾਧੂ ਫੀਸ ਵਾਪਸ ਕਰ ਦਿੱਤੀ ਜਾਵੇਗੀ। ਇਹ ਫੈਸਲਾ ਭਾਰਤ ਸਮੇਤ ਉਨ੍ਹਾਂ ਸਾਰੇ ਦੇਸ਼ਾਂ ਨੂੰ ਪ੍ਰਭਾਵਿਤ ਕਰੇਗਾ, ਜਿਨ੍ਹਾਂ ਦੇ ਲੋਕ ਪੜ੍ਹਾਈ, ਨੌਕਰੀ ਜਾਂ ਟੂਰਿਸਟ ਵੀਜ਼ਾ 'ਤੇ ਅਮਰੀਕਾ ਆਉਂਦੇ ਹਨ। ਇਸ ਦੇ ਨਾਲ ਹੀ ਅਮਰੀਕਾ ਦੇ ਇਸ ਨਵੇਂ ਹੁਕਮ ਨਾਲ ਲੋਕਾਂ 'ਤੇ ਆਰਥਿਕ ਬੋਝ ਵੀ ਪਵੇਗਾ।

ਅਮਰੀਕਾ ਦੋ ਤਰ੍ਹਾਂ ਦੇ ਵੀਜ਼ੇ ਦਿੰਦਾ ਹੈ

ਅਮਰੀਕਾ ਦੂਜੇ ਦੇਸ਼ਾਂ ਤੋਂ ਆਉਣ ਵਾਲੇ ਲੋਕਾਂ ਨੂੰ ਮੁੱਖ ਤੌਰ 'ਤੇ ਦੋ ਤਰ੍ਹਾਂ ਦੇ ਵੀਜ਼ੇ ਦਿੰਦਾ ਹੈ:

ਗੈਰ-ਪ੍ਰਵਾਸੀ ਵੀਜ਼ਾ (Non-Immigrant Visa): ਇਹ ਵੀਜ਼ਾ ਅਸਥਾਈ ਠਹਿਰਨ ਲਈ ਦਿੱਤਾ ਜਾਂਦਾ ਹੈ, ਜਿਵੇਂ ਕਿ ਸੈਰ-ਸਪਾਟਾ (B-1/B-2), ਕਾਰੋਬਾਰ, ਅਧਿਐਨ (F-1), ਨੌਕਰੀ (H-1B), ਐਕਸਚੇਂਜ ਪ੍ਰੋਗਰਾਮ (J-1), ਅਤੇ ਖੇਤੀਬਾੜੀ ਜਾਂ ਗੈਰ-ਖੇਤੀਬਾੜੀ ਕੰਮ (H-2A/H-2B) ਲਈ। ਵਾਧਾ ਇਸੇ ਵੀਜ਼ਾ ਦੀ ਫੀਸ ਵਿੱਚ ਹੋਇਆ ਹੈ।

ਪ੍ਰਵਾਸੀ ਵੀਜ਼ਾ (Immigrant Visa): ਇਹ ਵੀਜ਼ਾ ਉਨ੍ਹਾਂ ਲੋਕਾਂ ਨੂੰ ਦਿੱਤਾ ਜਾਂਦਾ ਹੈ ਜੋ ਅਮਰੀਕਾ ਵਿੱਚ ਸਥਾਈ ਤੌਰ 'ਤੇ ਰਹਿਣਾ ਚਾਹੁੰਦੇ ਹਨ ਜਾਂ ਸਥਾਈ ਤੌਰ 'ਤੇ ਕਾਰੋਬਾਰ ਕਰਨਾ ਚਾਹੁੰਦੇ ਹਨ। ਇਸ ਵਿੱਚ ਪਰਿਵਾਰ ਅਧਾਰਤ ਵੀਜ਼ਾ (ਅਮਰੀਕੀ ਨਾਗਰਿਕ ਦੇ ਰਿਸ਼ਤੇਦਾਰਾਂ ਲਈ) ਅਤੇ ਰੁਜ਼ਗਾਰ ਅਧਾਰਤ ਵੀਜ਼ਾ (ਨਿਵੇਸ਼ ਦੇ ਆਧਾਰ 'ਤੇ) ਸ਼ਾਮਲ ਹਨ। ਇਸ ਤੋਂ ਇਲਾਵਾ, ਹਰ ਸਾਲ 55,000 ਵੀਜ਼ੇ ਲਾਟਰੀ ਰਾਹੀਂ ਵੀ ਦਿੱਤੇ ਜਾਂਦੇ ਹਨ।

ਵੀਜ਼ਾ ਸੰਬੰਧੀ ਜਾਣਕਾਰੀ ਲਈ ਕਿੱਥੇ ਸੰਪਰਕ ਕਰੀਏ?

ਅਮਰੀਕੀ ਵੀਜ਼ਾ ਲਈ ਲੋਕ ਭਾਰਤ ਵਿੱਚ ਅਮਰੀਕੀ ਦੂਤਾਵਾਸ ਨਾਲ ਸੰਪਰਕ ਕਰ ਸਕਦੇ ਹਨ। ਤੁਸੀਂ ਦੂਤਾਵਾਸ ਦੀ ਅਧਿਕਾਰਤ ਵੈੱਬਸਾਈਟ https://in.usembassy.gov/visas/ ਜਾਂ https://ceac.state.gov/CEAC/ 'ਤੇ ਵੀਜ਼ਾ ਸਥਿਤੀ ਦੀ ਜਾਂਚ ਕਰ ਸਕਦੇ ਹੋ। ਭਾਰਤੀ ਵੀਜ਼ਾ ਸੰਬੰਧੀ ਸਵਾਲਾਂ ਦੇ ਹੱਲ ਲਈ support-india@usvisascheduling.com 'ਤੇ ਈਮੇਲ ਰਾਹੀਂ ਵੀ ਸੰਪਰਕ ਕੀਤਾ ਜਾ ਸਕਦਾ ਹੈ।