Ajit Pawar plane crash: ਬੇਟੇ ਰੋਹਿਤ ਪਵਾਰ ਨੇ ਮੌਤ ਨੂੰ ਦੱਸਿਆ 'ਗਹਿਰੀ ਸਾਜ਼ਿਸ਼'
ਬੰਬ ਧਮਾਕੇ ਦਾ ਦਾਅਵਾ: ਰੋਹਿਤ ਪਵਾਰ ਅਨੁਸਾਰ ਜਹਾਜ਼ ਦੇ ਕ੍ਰੈਸ਼ ਹੋਣ ਦੇ ਸਮੇਂ ਕਈ ਧਮਾਕੇ ਹੋਏ ਸਨ, ਜੋ ਸਧਾਰਨ ਹਾਦਸੇ ਵਿੱਚ ਨਹੀਂ ਹੁੰਦੇ। ਉਨ੍ਹਾਂ ਨੇ 'ਬਲੈਕ ਬਾਕਸ' ਦੀ ਭਰੋਸੇਯੋਗਤਾ 'ਤੇ ਵੀ ਸਵਾਲ ਚੁੱਕੇ ਹਨ।
ਕੇਂਦਰੀ ਮੰਤਰੀ ਦੇ ਅਸਤੀਫ਼ੇ ਦੀ ਕੀਤੀ ਮੰਗ
ਮੁੰਬਈ: 21 ਫਰਵਰੀ, 2026
ਮਹਾਰਾਸ਼ਟਰ ਦੇ ਸਾਬਕਾ ਉਪ-ਮੁੱਖ ਮੰਤਰੀ ਅਜੀਤ ਪਵਾਰ ਦੀ 28 ਜਨਵਰੀ ਨੂੰ ਹੋਈ ਜਹਾਜ਼ ਹਾਦਸੇ ਵਿੱਚ ਮੌਤ ਦੇ ਮਾਮਲੇ ਨੇ ਹੁਣ ਨਵਾਂ ਮੋੜ ਲੈ ਲਿਆ ਹੈ। ਸ਼ਨੀਵਾਰ ਨੂੰ ਇੱਕ ਪ੍ਰੈੱਸ ਕਾਨਫਰੰਸ ਦੌਰਾਨ ਉਨ੍ਹਾਂ ਦੇ ਬੇਟੇ ਰੋਹਿਤ ਪਵਾਰ ਨੇ ਇਸ ਹਾਦਸੇ ਨੂੰ ਸਿਰਫ਼ ਇੱਕ ਦੁਰਘਟਨਾ ਮੰਨਣ ਤੋਂ ਇਨਕਾਰ ਕਰਦਿਆਂ ਇਸ ਨੂੰ ਇੱਕ 'ਗਹਿਰੀ ਸਾਜ਼ਿਸ਼' ਕਰਾਰ ਦਿੱਤਾ ਹੈ। ਰੋਹਿਤ ਪਵਾਰ ਨੇ ਜਾਂਚ ਵਿੱਚ ਤਕਨੀਕੀ ਖਾਮੀਆਂ ਅਤੇ ਲਾਪਰਵਾਹੀ ਦੇ ਦੋਸ਼ ਲਾਉਂਦਿਆਂ ਕੇਂਦਰੀ ਨਾਗਰਿਕ ਹਵਾਨਬਾਜ਼ੀ ਮੰਤਰੀ ਰਾਮ ਮੋਹਨ ਨਾਇਡੂ ਦੇ ਅਸਤੀਫ਼ੇ ਦੀ ਮੰਗ ਕੀਤੀ ਹੈ।
ਰੋਹਿਤ ਪਵਾਰ ਦੇ ਵੱਡੇ ਖੁਲਾਸੇ ਅਤੇ ਸਵਾਲ
ਰੋਹਿਤ ਪਵਾਰ ਨੇ ਆਪਣੀ ਨਿੱਜੀ ਜਾਂਚ ਦਾ ਹਵਾਲਾ ਦਿੰਦਿਆਂ ਕਈ ਚੌਂਕਾਉਣ ਵਾਲੇ ਦਾਅਵੇ ਕੀਤੇ ਹਨ:
ਬੰਬ ਧਮਾਕੇ ਦਾ ਦਾਅਵਾ: ਰੋਹਿਤ ਪਵਾਰ ਅਨੁਸਾਰ ਜਹਾਜ਼ ਦੇ ਕ੍ਰੈਸ਼ ਹੋਣ ਦੇ ਸਮੇਂ ਕਈ ਧਮਾਕੇ ਹੋਏ ਸਨ, ਜੋ ਸਧਾਰਨ ਹਾਦਸੇ ਵਿੱਚ ਨਹੀਂ ਹੁੰਦੇ। ਉਨ੍ਹਾਂ ਨੇ 'ਬਲੈਕ ਬਾਕਸ' ਦੀ ਭਰੋਸੇਯੋਗਤਾ 'ਤੇ ਵੀ ਸਵਾਲ ਚੁੱਕੇ ਹਨ।
ਪੈਟਰੋਲ ਦੇ ਕੈਨ: ਉਨ੍ਹਾਂ ਦੋਸ਼ ਲਾਇਆ ਕਿ ਜਹਾਜ਼ ਵਿੱਚ ਸਮਾਨ ਰੱਖਣ ਵਾਲੀ ਥਾਂ 'ਤੇ ਤੇਲ ਦੇ ਵਾਧੂ ਕੈਨ ਰੱਖੇ ਗਏ ਸਨ, ਜਿਸ ਕਾਰਨ ਅੱਗ ਬੇਕਾਬੂ ਹੋਈ।
ਕੰਪਨੀ 'ਤੇ ਸਵਾਲ: ਉਨ੍ਹਾਂ ਦਾਅਵਾ ਕੀਤਾ ਕਿ ਜਹਾਜ਼ ਚਲਾਉਣ ਵਾਲੀ ਕੰਪਨੀ 'VSR ਵੈਂਚਰਸ' ਨੂੰ ਸੱਤਾਧਾਰੀ ਧਿਰਾਂ ਦੀ ਸਰਪ੍ਰਸਤੀ ਹਾਸਲ ਹੈ ਅਤੇ DGCA ਦੇ ਕੁਝ ਅਧਿਕਾਰੀ ਤੱਥਾਂ ਨੂੰ ਦਬਾ ਕੇ ਕੰਪਨੀ ਨੂੰ 'ਕਲੀਨ ਚਿੱਟ' ਦੇਣ ਦੀ ਕੋਸ਼ਿਸ਼ ਕਰ ਰਹੇ ਹਨ।
ਪ੍ਰਧਾਨ ਮੰਤਰੀ ਅਤੇ ਗ੍ਰਹਿ ਮੰਤਰੀ ਤੋਂ ਇਨਸਾਫ਼ ਦੀ ਮੰਗ
ਰੋਹਿਤ ਪਵਾਰ ਨੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅਤੇ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਨੂੰ ਅਪੀਲ ਕੀਤੀ ਹੈ ਕਿ ਉਹ ਖੁਦ ਇਸ ਮਾਮਲੇ ਵਿੱਚ ਦਖਲ ਦੇਣ। ਉਨ੍ਹਾਂ ਕਿਹਾ ਕਿ ਉਹ ਪ੍ਰਧਾਨ ਮੰਤਰੀ ਨੂੰ ਇਸ ਸਬੰਧੀ ਈਮੇਲ ਰਾਹੀਂ ਪੱਤਰ ਲਿਖਣਗੇ। ਇਸ ਦੇ ਨਾਲ ਹੀ ਉਨ੍ਹਾਂ ਨੇ ਵਿਰੋਧੀ ਧਿਰ ਦੇ ਨੇਤਾ ਰਾਹੁਲ ਗਾਂਧੀ ਨੂੰ ਵੀ ਇਸ ਮੁੱਦੇ ਨੂੰ ਸੰਸਦ ਵਿੱਚ ਉਠਾਉਣ ਦੀ ਬੇਨਤੀ ਕੀਤੀ ਹੈ।
ਕੀ ਸੀ ਘਟਨਾ?
ਜ਼ਿਕਰਯੋਗ ਹੈ ਕਿ 28 ਜਨਵਰੀ, 2026 ਨੂੰ ਬਾਰਾਮਤੀ ਏਅਰਸਟ੍ਰਿਪ 'ਤੇ ਲੈਂਡਿੰਗ ਦੌਰਾਨ ਅਜੀਤ ਪਵਾਰ ਦਾ 'ਲੀਅਰਜੇਟ 45' ਚਾਰਟਰ ਜਹਾਜ਼ ਹਾਦਸਾਗ੍ਰਸਤ ਹੋ ਗਿਆ ਸੀ। ਇਸ ਦੁਖਦਾਈ ਹਾਦਸੇ ਵਿੱਚ ਅਜੀਤ ਪਵਾਰ ਸਮੇਤ ਕੁੱਲ 5 ਲੋਕਾਂ (ਚਾਲਕ ਦਲ ਅਤੇ ਸੁਰੱਖਿਆ ਕਰਮਚਾਰੀ) ਦੀ ਜਾਨ ਚਲੀ ਗਈ ਸੀ। ਅਜੀਤ ਪਵਾਰ ਦੀ ਪਤਨੀ ਸੁਨੇਤਰਾ ਪਵਾਰ ਪਹਿਲਾਂ ਹੀ ਇਸ ਮਾਮਲੇ ਦੀ CBI ਜਾਂਚ ਦੀ ਮੰਗ ਕਰ ਚੁੱਕੇ ਹਨ।