ਇੱਕ ਮੰਦਰ, ਇੱਕ ਖੂਹ ਅਤੇ ਇੱਕ ਸ਼ਮਸ਼ਾਨਘਾਟ ਹੋਵੇ : ਮੋਹਨ ਭਾਗਵਤ

ਅਲੀਗੜ੍ਹ 'ਚ ਦਿੱਤਾ ਸਮਾਜਿਕ ਏਕਤਾ ਦਾ ਸੁਨੇਹਾ

ਅਲੀਗੜ੍ਹ, 21 ਅਪ੍ਰੈਲ 2025:

ਰਾਸ਼ਟਰੀ ਸਵੈਮ ਸੇਵਕ ਸੰਘ (RSS) ਦੇ ਸਰਸੰਘਚਾਲਕ ਮੋਹਨ ਭਾਗਵਤ ਆਪਣੇ ਪੰਜ ਦਿਨਾਂ ਦੌਰੇ 'ਤੇ ਅਲੀਗੜ੍ਹ ਪਹੁੰਚੇ ਹੋਏ ਹਨ। ਉਨ੍ਹਾਂ ਨੇ ਇਥੇ ਵੱਖ-ਵੱਖ ਸ਼ਾਖਾਵਾਂ ਨੂੰ ਸੰਬੋਧਨ ਕਰਦਿਆਂ ਹਿੰਦੂ ਸਮਾਜ ਵਿੱਚ ਸਮਰਸਤਾ ਅਤੇ ਏਕਤਾ ਨੂੰ ਮਜ਼ਬੂਤ ਕਰਨ ਦੀ ਅਪੀਲ ਕੀਤੀ। ਉਨ੍ਹਾਂ ਨੇ “ਇੱਕ ਮੰਦਰ, ਇੱਕ ਖੂਹ ਅਤੇ ਇੱਕ ਸ਼ਮਸ਼ਾਨਘਾਟ” ਵਾਲੇ ਆਦਰਸ਼ ਨੂੰ ਅਪਣਾਉਣ ਦੀ ਗੱਲ ਕਹਿੰਦੇ ਹੋਏ ਸਮਾਜਿਕ ਸਦਭਾਵਨਾ ਵੱਲ ਕਦਮ ਵਧਾਉਣ ਦਾ ਸੁਨੇਹਾ ਦਿੱਤਾ।

ਸਾਸਨੀ ਗੇਟ ਇਲਾਕੇ ਦੇ ਇੰਟਰ ਕਾਲਜ ਅਤੇ ਪੰਚਨ ਨਗਰੀ ਪਾਰਕ 'ਚ ਆਯੋਜਿਤ ਸ਼ਾਖਾਵਾਂ ਵਿੱਚ ਸੰਘ ਦੇ ਵਲੰਟੀਅਰਾਂ ਨੂੰ ਸੰਬੋਧਨ ਕਰਦਿਆਂ ਭਾਗਵਤ ਨੇ ਕਿਹਾ ਕਿ ਹਿੰਦੂ ਸਮਾਜ ਵਿੱਚ ਸਕਾਰਾਤਮਕ ਬਦਲਾਅ ਲਿਆਉਣ ਲਈ 'ਸਦਭਾਵਨਾ' ਸਭ ਤੋਂ ਵੱਡਾ ਹਥਿਆਰ ਹੈ।

ਸੰਸਕਾਰਾਂ ਦੀ ਮਹੱਤਤਾ 'ਤੇ ਜ਼ੋਰ

ਆਰਐਸਐਸ ਦੇ ਸੂਤਰਾਂ ਅਨੁਸਾਰ, ਭਾਗਵਤ ਨੇ "ਸੰਸਕਾਰ" ਨੂੰ ਹਿੰਦੂ ਸਮਾਜ ਦੀ ਮੂਲ ਨੀਂਹ ਕਰਾਰ ਦਿੱਤਾ। ਉਨ੍ਹਾਂ ਆਹਵਾਨ ਕੀਤਾ ਕਿ RSS ਦੇ ਮੈਂਬਰ ਸੱਭਿਆਚਾਰਕ ਕਦਰਾਂ-ਕੀਮਤਾਂ, ਪਰੰਪਰਾਵਾਂ ਅਤੇ ਨੈਤਿਕ ਮੂਲਯਾਂ 'ਤੇ ਆਧਾਰਤ ਇੱਕ ਸੰਘਠਿਤ ਤੇ ਮਜ਼ਬੂਤ ​​ਸਮਾਜ ਦੀ ਰਚਨਾ ਕਰਨ ਦੀ ਦਿਸਾ ਵਿੱਚ ਕੰਮ ਕਰਨ।

ਉਨ੍ਹਾਂ ਕਿਹਾ ਕਿ RSS ਦੇ ਸੇਵਕਾਂ ਨੂੰ ਸਮਾਜ ਦੇ ਹਰ ਵਰਗ ਤੱਕ ਪਹੁੰਚ ਕਰਨੀ ਚਾਹੀਦੀ ਹੈ ਅਤੇ ਆਪਣੇ ਘਰਾਂ ਵਿੱਚ ਉਨ੍ਹਾਂ ਨੂੰ ਸੱਦਾ ਦੇ ਕੇ ਏਕਤਾ ਅਤੇ ਭਰਾਵਾ ਭਾਵ ਦਾ ਸੰਦੇਸ਼ ਫੈਲਾਉਣਾ ਚਾਹੀਦਾ ਹੈ।

ਪਰਿਵਾਰਿਕ ਮੂਲ ਯੂਨਿਟ ਦੇ ਤੌਰ 'ਤੇ 'ਪਰਿਵਾਰ'

ਮੋਹਨ ਭਾਗਵਤ ਨੇ ‘ਪਰਿਵਾਰ’ ਨੂੰ ਸਮਾਜ ਦੀ ਮੂਲ ਇਕਾਈ ਕਰਾਰ ਦਿੰਦੇ ਹੋਏ ਕਿਹਾ ਕਿ ਇਹ ਸੰਸਕਾਰਾਂ ਦੀ ਬੁਨਿਆਦ 'ਤੇ ਮਜ਼ਬੂਤ ਬਣਦਾ ਹੈ। ਉਨ੍ਹਾਂ ਨੇ ਤਿਉਹਾਰਾਂ ਨੂੰ ਸਮੂਹਕ ਢੰਗ ਨਾਲ ਮਨਾਉਣ ਦੀ ਸਲਾਹ ਦਿੰਦਿਆਂ ਕਿਹਾ ਕਿ ਇਹ ਰਾਸ਼ਟਰਵਾਦ ਅਤੇ ਸਮਾਜਿਕ ਏਕਤਾ ਨੂੰ ਮਜ਼ਬੂਤ ਕਰਨ ਦਾ ਵਧੀਆ ਮਾਧਿਅਮ ਹੈ।

ਉਨ੍ਹਾਂ ਨੇ ਇਹ ਵੀ ਦੱਸਿਆ ਕਿ ਉਨ੍ਹਾਂ ਦਾ ਇਹ ਦੌਰਾ 17 ਅਪ੍ਰੈਲ ਤੋਂ ਸ਼ੁਰੂ ਹੋਇਆ ਸੀ ਅਤੇ ਇਸ ਦੌਰਾਨ ਉਹ ਬ੍ਰਿਜ ਖੇਤਰ ਦੇ ਤਹਿਤ ਆਉਣ ਵਾਲੇ ਸਾਰੇ ਜ਼ਿਲ੍ਹਿਆਂ ਦੇ ਆਰਐਸਐਸ ਪ੍ਰਚਾਰਕਾਂ ਨਾਲ ਰੋਜ਼ਾਨਾ ਮਿਲ ਕੇ ਵਿਚਾਰ-ਵਟਾਂਦਰਾ ਕਰ ਰਹੇ ਹਨ।

ਇਸ ਪੂਰੇ ਦੌਰੇ ਵਿੱਚ ਉਨ੍ਹਾਂ ਵੱਲੋਂ RSS ਦੇ ਅਹਿਮ ਮੰਤਵ – ਸੰਸਕਾਰ, ਸਮਰਸਤਾ ਅਤੇ ਰਾਸ਼ਟਰ ਪ੍ਰੇਮ – ਨੂੰ ਜਮੀਨੀ ਪੱਧਰ 'ਤੇ ਲਾਗੂ ਕਰਨ ਵੱਲ ਵਿਸ਼ੇਸ਼ ਧਿਆਨ ਦਿੱਤਾ ਜਾ ਰਿਹਾ ਹੈ।