ਸਟਾਕ ਮਾਰਕੀਟ ‘ਚ ਧਮਾਕੇਦਾਰ ਸ਼ੁਰੂਆਤ: ਸੈਂਸੈਕਸ ਚੜ੍ਹਿਆ

ਸਟਾਕ ਮਾਰਕੀਟ ‘ਚ ਧਮਾਕੇਦਾਰ ਸ਼ੁਰੂਆਤ: ਸੈਂਸੈਕਸ 1500 ਅੰਕਾਂ ਚੜ੍ਹਿਆ

ਨਿਫਟੀ ਵੀ ਮਜ਼ਬੂਤ

ਨਵੀਂ ਦਿੱਲੀ, 15 ਅਪ੍ਰੈਲ 2025 – ਤਿੰਨ ਦਿਨ ਦੀ ਛੁੱਟੀ ਤੋਂ ਬਾਅਦ ਸ਼ੇਅਰ ਬਾਜ਼ਾਰ 'ਚ ਅੱਜ ਜ਼ਬਰਦਸਤ ਜੋਸ਼ ਦੇਖਣ ਨੂੰ ਮਿਲਿਆ। ਬੰਬੇ ਸਟਾਕ ਐਕਸਚੇਂਜ (BSE) ਦਾ ਸੈਂਸੈਕਸ 1500 ਅੰਕਾਂ ਤੋਂ ਵੱਧ ਚੜ੍ਹਿਆ, ਜਦਕਿ ਨੈਸ਼ਨਲ ਸਟਾਕ ਐਕਸਚੇਂਜ (NSE) ਦਾ ਨਿਫਟੀ ਵੀ 480 ਅੰਕਾਂ ਦੀ ਤੀਬਰ ਉਛਾਲ ਨਾਲ ਕਾਰੋਬਾਰ ਕਰ ਰਿਹਾ ਹੈ।

ਕੀ ਹੈ ਇਸ ਤੇਜ਼ੀ ਦਾ ਕਾਰਨ?

ਅਮਰੀਕਾ ਵੱਲੋਂ ਟੈਰਿਫ ਵਿੱਚ ਦਿੱਤੀ ਗਈ ਰਾਹਤ, ਖਾਸ ਤੌਰ ‘ਤੇ ਟਰੰਪ ਸਰਕਾਰ ਵੱਲੋਂ 90 ਦਿਨ ਲਈ ਨਵੇਂ ਟੈਰਿਫਾਂ 'ਤੇ ਰੋਕ ਅਤੇ ਇਲੈਕਟ੍ਰਾਨਿਕ ਉਤਪਾਦਾਂ 'ਤੇ ਟੈਕਸ ਘਟਾਉਣ ਦੇ ਸੰਕੇਤ – ਇਹਨਾਂ ਸਭ ਕਾਰਨਾਂ ਨੇ ਗਲੋਬਲ ਮਾਰਕੀਟਾਂ ਨੂੰ ਉਤਸ਼ਾਹਿਤ ਕੀਤਾ ਹੈ।

ਉਸ ਤੋਂ ਇਲਾਵਾ, ਯੂਰਪੀਅਨ ਯੂਨੀਅਨ ਨੇ ਵੀ ਅਮਰੀਕਾ ਤੋਂ ਆਉਣ ਵਾਲੇ ਕੁਝ ਉਤਪਾਦਾਂ 'ਤੇ ਟੈਰਿਫ ਲਗਾਉਣ 'ਤੇ ਅਸਥਾਈ ਰੋਕ ਲਾਈ ਹੈ, ਜਿਸ ਨਾਲ ਵਪਾਰ ਯੁੱਧ ਦੇ ਖਤਰੇ 'ਚ ਕਮੀ ਆਈ ਹੈ।

ਐਸ਼ੀਆਈ ਮਾਰਕੀਟਾਂ ਦੀ ਭੀ ਭੂਮਿਕਾ

ਭਾਰਤ ਦੇ ਨਾਲ ਨਾਲ, ਜਪਾਨ ਦਾ ਨਿੱਕੇਈ 225, ਦੱਖਣੀ ਕੋਰੀਆ ਦਾ ਕੋਸਪੀ, ਅਤੇ ਤਾਈਵਾਨ ਦਾ TAIEX ਇੰਡੈਕਸ ਵੀ ਅੱਜ ਮਜ਼ਬੂਤੀ ਨਾਲ ਖੁਲ੍ਹੇ ਹਨ। ਹਾਲਾਂਕਿ, ਚੀਨ ਦੇ ਸ਼ੰਘਾਈ ਇੰਡੈਕਸ 'ਚ ਥੋੜ੍ਹੀ ਗਿਰਾਵਟ ਦਰਜ ਕੀਤੀ ਗਈ।

6.44 ਲੱਖ ਕਰੋੜ ਦਾ ਮੂਲਧਨ ਵਾਧਾ

ਸਿਰਫ਼ ਇੱਕ ਦਿਨ 'ਚ, BSE 'ਤੇ ਸੂਚੀਬੱਧ ਕੰਪਨੀਆਂ ਦੇ ਮਾਰਕੀਟ ਕੈਪ ਵਿੱਚ 6.44 ਲੱਖ ਕਰੋੜ ਰੁਪਏ ਦਾ ਵਾਧਾ ਹੋਇਆ। ਹਾਲਾਂਕਿ ਕੁਝ ਕੰਪਨੀਆਂ, ਜਿਵੇਂ ਕਿ ਏਸ਼ੀਅਨ ਪੇਂਟਸ, ਕੋਟਕ ਬੈਂਕ, ਆਈਟੀਸੀ, ਨੈਸਲੇ, ਅਤੇ ਹਿੰਦੁਸਤਾਨ ਯੂਨੀਲੀਵਰ ਦੇ ਸ਼ੇਅਰਾਂ ਵਿੱਚ ਹਲਕੀ ਗਿਰਾਵਟ ਵੀ ਦਰਜ ਕੀਤੀ ਗਈ।