ਪੰਚਕੂਲਾ ਵਿਚ ਅੱਧੀ ਰਾਤ ਨੂੰ 3 ਨੌਜਵਾਨਾਂ ’ਤੇ ਛੁਰੇ ਨਾਲ ਹਮਲਾ

ਪੰਚਕੂਲਾ, 14 ਜੁਲਾਈ, ਹ.ਬ. : ਪੰਚਕੂਲਾ ਦੇ ਪਿੰਡ ਬੁੱਢਣਪੁਰ ’ਚ ਰਾਤ ਕਰੀਬ 12 ਵਜੇ ਤਿੰਨ ਨੌਜਵਾਨਾਂ ’ਤੇ ਤੇਜ਼ਧਾਰ ਹਥਿਆਰਾਂ ਨਾਲ ਹਮਲਾ ਕੀਤਾ ਗਿਆ। ਹਮਲੇ ਵਿੱਚ ਤਿੰਨੋਂ ਨੌਜਵਾਨ ਜ਼ਖ਼ਮੀ ਹੋ ਗਏ। ਤਿੰਨੋਂ ਸੈਕਟਰ-6 ਦੇ ਹਸਪਤਾਲ ਵਿੱਚ ਜ਼ੇਰੇ ਇਲਾਜ ਹਨ। ਤਿੰਨਾਂ ਦੀ ਪਛਾਣ ਰਵੀ, ਕਾਸ਼ੀ ਅਤੇ ਗੌਤਮ ਵਾਸੀ ਪਿੰਡ ਬੁੱਢਣਪੁਰ ਵਜੋਂ ਹੋਈ ਹੈ। ਚਸ਼ਮਦੀਦਾਂ ਨੇ ਦੱਸਿਆ ਕਿ ਤਿੰਨੋਂ ਨੌਜਵਾਨ ਗੁਰਦੁਆਰੇ ਕੋਲ ਖੜ੍ਹੇ ਸਨ। ਅਚਾਨਕ 18 ਤੋਂ 20 ਹਮਲਾਵਰ ਇੱਥੇ ਪਹੁੰਚ ਗਏ ਅਤੇ ਉਨ੍ਹਾਂ ’ਤੇ ਹਮਲਾ ਕਰ ਦਿੱਤਾ। ਇਸ ਵਿੱਚ ਗੌਤਮ ਦੀ ਬਾਂਹ ਵਿੱਚ, ਕਾਸ਼ੀ ਨੂੰ ਪੱਟ ਵਿੱਚ ਅਤੇ ਰਵੀ ਨੂੰ ਸਿਰ ਵਿੱਚ ਸੱਟ ਲੱਗੀ ਹੈ। ਜਦੋਂ ਤਿੰਨੋਂ ਜ਼ਖਮੀ ਹਾਲਤ ਵਿਚ ਸਨ ਤਾਂ ਲੋਕਾਂ ਨੇ ਡਾਇਲ 112 ’ਤੇ ਮਦਦ ਲਈ ਫੋਨ ਕੀਤਾ ਸੀ। ਪਰ ਐਂਬੂਲੈਂਸ ਬਹੁਤ ਦੇਰ ਨਾਲ ਪਹੁੰਚੀ। ਇਸ ਕਾਰਨ ਜ਼ਖਮੀ ਨੌਜਵਾਨਾਂ ਨੂੰ ਆਟੋ ਰਾਹੀਂ ਹੀ ਹਸਪਤਾਲ ਪਹੁੰਚਾਇਆ ਗਿਆ ਤਾਂ ਜੋ ਸਮੇਂ ਸਿਰ ਇਲਾਜ ਕਰਵਾਇਆ ਜਾ ਸਕੇ। ਘਟਨਾ ਦੀ ਸੂਚਨਾ ਮਿਲਦੇ ਹੀ ਪੰਚਕੂਲਾ ਪੁਲਸ ਮੌਕੇ ’ਤੇ ਪਹੁੰਚ ਗਈ। ਉਸ ਦੇ ਨਾਲ ਕ੍ਰਾਈਮ ਬ੍ਰਾਂਚ ਦੀ ਟੀਮ ਵੀ ਮੌਜੂਦ ਸੀ। ਹਮਲੇ ਦੇ ਕਾਰਨਾਂ ਦਾ ਅਜੇ ਪਤਾ ਨਹੀਂ ਲੱਗ ਸਕਿਆ ਹੈ। ਅਪਰਾਧ ਸ਼ਾਖਾ ਮਾਮਲੇ ਦੀ ਜਾਂਚ ਕਰ ਰਹੀ ਹੈ