ਟੋਰਾਂਟੋ ਵਿਖੇ ਟਰੱਕ ਅਤੇ ਕਾਰ ਦੀ ਹੈਰਾਨਕੁੰਨ ਟੱਕਰ

ਟੋਰਾਂਟੋ, 30 ਮਈ (ਵਿਸ਼ੇਸ਼ ਪ੍ਰਤੀਨਿਧ) : ਟੋਰਾਂਟੋ ਵਿਖੇ ਇਕ ਟਰੱਕ ਵੱਲੋਂ ਕਾਰ ਨੂੰ ਟੱਕਰ ਮਾਰਨ ਅਤੇ ਮਹਿਲਾ ਡਰਾਈਵਰ ਦੇ ਮੁਸ਼ਕਲ ਨਾਲ ਬਾਹਰ ਨਿਕਲਣ ਦੀ ਘਟਨਾ ਨਾਲ ਸਬੰਧਤ ਵੀਡੀਓ ਬੇਹੱਦ ਵਾਇਰਲ ਹੋ ਰਹੀ ਹੈ। ਹਾਦਸਾ ਡੈਵਨਪੋਰਟ ਰੋਡ ਦੇ ਦੱਖਣ ਵੱਲ ਐਵੇਨਿਊ ਰੋਡ ’ਤੇ ਬੁੱਧਵਾਰ ਬਾਅਦ ਦੁਪਹਿਰ ਵਾਪਰਿਆ।

ਛਾਲ ਮਾਰ ਕੇ ਬਾਹਰ ਨਿਕਲੀ ਕਾਰ ਦੀ ਡਰਾਈਵਰ

ਵੀਡੀਓ ਵਿਚ ਦੇਖਿਆ ਜਾ ਸਕਦਾ ਹੈ ਕਿ ਟਰੱਕ ਰੁਕਣ ਦਾ ਨਾਂ ਨਹੀਂ ਲੈ ਰਿਹਾ ਜਦਕਿ ਕਾਰ ਉਸ ਦੀ ਮਾਰ ਹੇਠ ਆ ਚੁੱਕੀ ਹੈ। ਆਪਣੀ ਜਾਨ ਖਤਰੇ ਵਿਚ ਦੇਖ ਕੇ ਕਾਰ ਚਲਾ ਰਹੀ ਔਰਤ ਛਾਲ ਮਾਰ ਕੇ ਬਾਹਰ ਆ ਜਾਂਦੀ ਹੈ ਅਤੇ ਇਸੇ ਦੌਰਾਨ ਟਰੱਕ ਵੀ ਰੁਕ ਜਾਂਦਾ ਹੈ। ਫਿਲਹਾਲ ਹਾਦਸੇ ਦੇ ਕਾਰਨਾਂ ਬਾਰੇ ਪਤਾ ਨਹੀਂ ਲੱਗ ਸਕਿਆ ਅਤੇ ਪੁਲਿਸ ਵੱਲੋਂ ਪੜਤਾਲ ਕੀਤੀ ਜਾ ਰਹੀ ਹੈ। ਸਿਟੀ ਦੀ ਰਿਪੋਰਟ ਮੁਤਾਬਕ ਇਸ ਇਲਾਕੇ ਵਿਚੋਂ ਰੋਜ਼ਾਨਾ ਤਕਰੀਬਨ 30 ਹਜ਼ਾਰ ਗੱਡੀਆਂ ਲੰਘਦੀਆਂ ਹਨ ਅਤੇ 2014 ਤੋਂ ਹੁਣ ਤੱਕ 977 ਹਾਦਸੇ ਦਰਜ ਕੀਤੇ ਗਏ।