ਆਪਸ 'ਚ ਕੋਰਟ ਵਿਚ ਹੀ ਭਿੜ ਗਏ ਦੋ ਜੱਜ

ਅਹਿਮਦਾਬਾਦ : ਗੁਜਰਾਤ ਹਾਈਕੋਰਟ 'ਚ ਸੁਣਵਾਈ ਦੌਰਾਨ ਆਪਸ 'ਚ ਭਿੜਨ 'ਤੇ ਜੱਜ ਨੇ ਦੂਜੇ ਜੱਜ ਤੋਂ ਮੁਆਫੀ ਮੰਗ ਲਈ ਹੈ। ਸੋਮਵਾਰ ਨੂੰ ਕੋਰਟ ਰੂਮ ਦੇ ਅੰਦਰ ਜਸਟਿਸ ਬੀਰੇਨ ਵੈਸ਼ਨਵ ਅਤੇ ਮੌਨਾ ਭੱਟ ਵਿਚਕਾਰ ਬਹਿਸ ਹੋਈ। ਇਹ ਵੀਡੀਓ ਹਾਈ ਕੋਰਟ ਦੇ ਯੂ-ਟਿਊਬ ਚੈਨਲ ਰਾਹੀਂ ਲਾਈਵ ਸਟ੍ਰੀਮਿੰਗ ਰਾਹੀਂ ਲੋਕਾਂ ਤੱਕ ਪਹੁੰਚੀ ਅਤੇ ਫਿਰ ਕੁਝ ਹੀ ਸਮੇਂ ਵਿੱਚ ਵਾਇਰਲ ਹੋ ਗਈ। ਹਾਲਾਂਕਿ, ਬਾਅਦ ਵਿੱਚ ਇਸਨੂੰ ਯੂਟਿਊਬ ਤੋਂ ਹਟਾ ਦਿੱਤਾ ਗਿਆ ਸੀ।

ਜਸਟਿਸ ਬੀਰੇਨ ਵੈਸ਼ਨਵ ਨੇ ਕਿਹਾ ਕਿ ਸੋਮਵਾਰ ਨੂੰ ਅਦਾਲਤ 'ਚ ਜੋ ਹੋਇਆ ਉਸ 'ਤੇ ਉਨ੍ਹਾਂ ਨੂੰ ਅਫ਼ਸੋਸ ਹੈ। ਮੰਗਲਵਾਰ ਨੂੰ ਦੁਸਹਿਰੇ ਕਾਰਨ ਅਦਾਲਤ ਬੰਦ ਸੀ । ਬੈਂਚ ਦੇ ਸੀਨੀਅਰ ਜੱਜ ਵੈਸ਼ਨਵ ਦੀ 23 ਅਕਤੂਬਰ ਨੂੰ ਜੱਜ ਮੌਨਾ ਭੱਟ ਨਾਲ ਗਰਮਾ-ਗਰਮ ਬਹਿਸ ਹੋਈ ਸੀ। ਇਹ ਘਟਨਾ ਉਦੋਂ ਵਾਪਰੀ ਜਦੋਂ ਜਸਟਿਸ ਵੈਸ਼ਨਵ ਇੱਕ ਕੇਸ ਵਿੱਚ ਆਦੇਸ਼ ਦੇ ਰਹੇ ਸਨ ਅਤੇ ਜਸਟਿਸ ਭੱਟ ਇਸ ਨਾਲ ਸਹਿਮਤ ਨਹੀਂ ਸਨ।

ਸੈਸ਼ਨ ਸ਼ੁਰੂ ਹੁੰਦੇ ਹੀ ਜਸਟਿਸ ਮੌਨਾ ਭੱਟ ਦੀ ਮੌਜੂਦਗੀ 'ਚ ਜਸਟਿਸ ਵੈਸ਼ਨਵ ਨੇ ਕਿਹਾ, "ਸੋਮਵਾਰ ਨੂੰ ਜੋ ਹੋਇਆ ਉਹ ਨਹੀਂ ਹੋਣਾ ਚਾਹੀਦਾ ਸੀ, ਮੈਂ ਗਲਤ ਸੀ। ਇਸ ਲਈ ਮੈਂ ਮੁਆਫੀ ਮੰਗਦਾ ਹਾਂ ਅਤੇ ਅਸੀਂ ਨਵਾਂ ਸੈਸ਼ਨ ਸ਼ੁਰੂ ਕਰਦੇ ਹਾਂ। "ਜਸਟਿਸ ਵੈਸ਼ਨਵ ਅਤੇ ਭੱਟ ਦੀ ਬੈਂਚ ਦੇ ਸੋਮਵਾਰ ਦੇ ਸੈਸ਼ਨ ਦੀ ਵੀਡੀਓ ਨੂੰ ਗੁਜਰਾਤ ਹਾਈ ਕੋਰਟ ਦੇ ਅਧਿਕਾਰਤ ਯੂਟਿਊਬ ਪੇਜ ਤੋਂ ਹਟਾ ਦਿੱਤਾ ਗਿਆ ਸੀ, ਪਰ ਸੋਸ਼ਲ ਮੀਡੀਆ 'ਤੇ ਪ੍ਰਸਾਰਿਤ ਇੱਕ ਕਥਿਤ ਵੀਡੀਓ ਵਿੱਚ, ਜਸਟਿਸ ਭੱਟ ਨੂੰ ਜਸਟਿਸ ਵੈਸ਼ਨਵ ਨਾਲ ਗੱਲ ਕਰਦੇ ਦੇਖਿਆ ਗਿਆ ਸੀ।