ਪੁਲਿਸ ਨਾਲ ਮੁਕਾਬਲੇ ਦੌਰਾਨ ਤਸਕਰ ਦੀ ਹੋਈ ਮੌਤ

ਪਾਲੀ, 17 ਅਕਤੂਬਰ, ਨਿਰਮਲ : ਪੁਲਿਸ ਅਤੇ ਤਸਕਰਾਂ ਵਿਚਾਲੇ ਹੋਏ ਮੁਕਾਬਲੇ ’ਚ ਇੱਕ ਤਸਕਰ ਦੀ ਮੌਤ ਹੋ ਗਈ। ਇਸ ਦੌਰਾਨ ਤਸਕਰਾਂ ਨੇ ਰਾਜਸਮੰਦ ਦੇ ਡੀਐਸਟੀ (ਜ਼ਿਲ੍ਹਾ ਵਿਸ਼ੇਸ਼ ਟੀਮ) ’ਤੇ ਲਗਾਤਾਰ ਗੋਲੀਬਾਰੀ ਕੀਤੀ। ਡੀਐਸਟੀ ਟੀਮ ਵੱਲੋਂ ਕੀਤੀ ਜਵਾਬੀ ਗੋਲੀਬਾਰੀ ਵਿੱਚ ਤਸਕਰ ਨੂੰ ਗੋਲੀ ਮਾਰ ਦਿੱਤੀ ਗਈ। ਇੱਕ ਤਸਕਰ ਮੌਕੇ ਤੋਂ ਫਰਾਰ ਹੋ ਗਿਆ।

ਇਹ ਘਟਨਾ ਪਾਲੀ ਜ਼ਿਲੇ ਦੇ ਖਿਨਵਾੜਾ ਥਾਣਾ ਖੇਤਰ ਦੇ ਦੀਵਾਰ ਨਲ ’ਚ ਸੋਮਵਾਰ ਰਾਤ ਕਰੀਬ 11:30 ਵਜੇ ਵਾਪਰੀ। ਇਹ ਇਲਾਕਾ ਪਾਲੀ-ਰਾਜਸਮੰਦ ਸਰਹੱਦ ਦੇ ਨਾਲ ਲੱਗਦਾ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਤਸਕਰ ਨੇ ਸੜਕ ਦੇ ਵਿਚਕਾਰ ਖੜ੍ਹੀ ਟੀਮ ’ਤੇ ਗੋਲੀਆਂ ਚਲਾ ਦਿੱਤੀਆਂ ਸਨ। ਇਸ ਤੋਂ ਪਹਿਲਾਂ ਪੈਂਚਰ ਹੋਈ ਇਨੋਵਾ ਨੂੰ ਰਾਜਸਮੰਦ ਤੋਂ ਪਾਲੀ ਬਾਰਡਰ ਤੱਕ ਕਰੀਬ 4 ਕਿਲੋਮੀਟਰ ਤੱਕ ਚਲਾਇਆ ਗਿਆ ਸੀ। ਘਟਨਾ ਦੀ ਸੂਚਨਾ ਮਿਲਦੇ ਹੀ ਪਾਲੀ ਪੁਲਸ ਵੀ ਮੌਕੇ ’ਤੇ ਪਹੁੰਚ ਗਈ ਅਤੇ ਪੂਰੇ ਇਲਾਕੇ ਨੂੰ ਸੀਲ ਕਰ ਦਿੱਤਾ ਗਿਆ।

ਜਾਣਕਾਰੀ ਅਨੁਸਾਰ ਰਾਜਸਮੰਦ ਡੀਐਸਟੀ ਟੀਮ ਨੂੰ ਸੂਚਨਾ ਮਿਲੀ ਸੀ ਕਿ ਦੋ ਤਸਕਰ ਇੱਕ ਇਨੋਵਾ ਗੱਡੀ ਵਿੱਚ ਡੋਡਾ-ਭੁੱਕੀ ਲੈ ਕੇ ਜਾ ਰਹੇ ਹਨ। ਇਸ ’ਤੇ ਡੀਐਸਟੀ ਟੀਮ ਦੇ ਇੰਚਾਰਜ ਕੇਸਰਾਮ ਦੀ ਅਗਵਾਈ ਹੇਠ ਨਾਕਾਬੰਦੀ ਕੀਤੀ ਗਈ। ਜਿਵੇਂ ਹੀ ਤਸਕਰਾਂ ਦੀ ਇਨੋਵਾ ਰਾਜਸਮੰਦ ਪਹੁੰਚੀ ਤਾਂ ਉਨ੍ਹਾਂ ਨੂੰ ਰੋਕਣ ਦੀ ਕੋਸ਼ਿਸ਼ ਕੀਤੀ ਗਈ ਪਰ ਉਹ ਫਰਾਰ ਹੋ ਕੇ ਪਾਲੀ ਵੱਲ ਚਲੇ ਗਏ ਤਾਂ ਟੀਮ ਨੇ ਉਨ੍ਹਾਂ ਦਾ ਪਿੱਛਾ ਕਰਨਾ ਸ਼ੁਰੂ ਕਰ ਦਿੱਤਾ।

ਇੱਥੇ ਨਾਕਾਬੰਦੀ ਦੌਰਾਨ ਤਸਕਰਾਂ ਦੀ ਕਾਰ ਦੇ ਤਿੰਨ ਟਾਇਰ ਪੈਂਚਰ ਹੋ ਗਏ। ਪਰ ਇਸ ਤੋਂ ਬਾਅਦ ਵੀ ਦੋਵੇਂ ਤਸਕਰ ਪੈਂਚਰ ਹੋਈ ਗੱਡੀ ਨੂੰ ਰਾਜਸਮੰਦ ਤੋਂ ਪਾਲੀ ਬਾਰਡਰ ਤੱਕ ਚਾਰ ਕਿਲੋਮੀਟਰ ਤੱਕ ਭਜਾ ਕੇ ਲੈ ਗਏ। ਇਸ ਦੌਰਾਨ ਤਸਕਰਾਂ ਨੇ ਡੀਐਸਟੀ ਟੀਮ ’ਤੇ ਫਾਇਰਿੰਗ ਸ਼ੁਰੂ ਕਰ ਦਿੱਤੀ।