ਟਰੰਪ ਦੀ ਵੱਡੀ ਕਾਰਵਾਈ, ਇੰਮੀਗ੍ਰੇਸ਼ਨ ਮਾਮਲੇ ’ਚ ਨਾਮਜ਼ਦ ਜੱਜ ਗ੍ਰਿਫ਼ਤਾਰ

ਵਿਸਕੌਨਸਿਨ : ਇੰਮੀਗ੍ਰੇਸ਼ਨ ਨੀਤੀਆਂ ਦੇ ਮੁੱਦੇ ’ਤੇ ਟਰੰਪ ਸਰਕਾਰ ਦੀ ਹਾਂ ਵਿਚ ਹਾਂ ਮਿਲਾਉਣ ਤੋਂ ਨਾਂਹ ਕਰਨ ਵਾਲੇ ਜੱਜਾਂ ਦੀ ਗ੍ਰਿਫ਼ਤਾਰੀ ਦਾ ਸਿਲਸਿਲਾ ਸ਼ੁਰੂ ਹੋ ਚੁੱਕਾ ਹੈ ਅਤੇ ਫੈਡਰਲ ਜਿਊਰੀ ਵੱਲੋਂ ਮਿਲਵੌਕੀ ਕਾਊਂਟੀ ਸਰਕਟ ਦੀ ਜੱਜ ਹਾਨਾਹ ਡਗਨ ਵਿਰੁੱਧ ਮੰਗਲਵਾਰ ਨੂੰ ਦੋਸ਼ ਆਇਦ ਕਰ ਦਿਤੇ ਗਏ। ਡੈਮੋਕ੍ਰੈਟਿਕ ਪਾਰਟੀ ਨੇ ਦੋਸ਼ ਲਾਇਆ ਹੈ ਕਿ ਟਰੰਪ ਸਰਕਾਰ ਹਾਨਾਹ ਡਗਨ ਵਿਰੁੱਧ ਕਾਰਵਾਈ ਰਾਹੀਂ ਹੋਰਨਾਂ ਨੂੰ ਡਰਾਉਣਾ ਚਾਹੁੰਦੀ ਹੈ। ਡਗਨ ਵਿਰੁੁੱਧ ਦੋਸ਼ ਹੈ ਕਿ ਉਨ੍ਹਾਂ ਨੇ ਮੈਕਸੀਕੋ ਨਾਲ ਸਬੰਧਤ ਗੈਰਕਾਨੂੰਨੀ ਪ੍ਰਵਾਸੀ ਨੂੰ ਇੰਮੀਗ੍ਰੇਸ਼ਨ ਅਤੇ ਕਸਟਮਜ਼ ਐਨਫੋਰਸਮੈਂਟ ਵਾਲਿਆਂ ਦੀ ਗ੍ਰਿਫ਼ਤਾਰੀ ਤੋਂ ਬਚਾਉਣ ਲਈ ਫਰਾਰ ਹੋਣ ਦਾ ਰਾਹ ਮੁਹੱਈਆ ਕਰਵਾਇਆ।

ਫੈਡਰਲ ਗਰੈਂਡ ਜਿਊਰੀ ਨੇ ਹਾਨਾਹ ਡਗਨ ਵਿਰੁੱਧ ਦੋਸ਼ ਆਇਦ ਕੀਤੇ

ਮੈਕਸੀਕੋ ਨਾਲ ਸਬੰਧਤ ਗੈਰਕਾਨੂੰਨੀ ਪ੍ਰਵਾਸੀ ਨੂੰ 2013 ਵਿਚ ਡਿਪੋਰਟ ਕਰ ਦਿਤਾ ਗਿਆ ਪਰ ਉਹ ਕਿਸੇ ਤਰੀਕੇ ਮੁੜ ਅਮਰੀਕਾ ਦਾਖਲ ਹੋਣ ਵਿਚ ਸਫ਼ਲ ਰਿਹਾ। ਐਫ਼.ਬੀ.ਆਈ. ਵੱਲੋਂ ਦਾਖਲ ਹਲਫ਼ਨਾਮੇ ਮੁਤਾਬਕ ਆਈਸ ਏਜੰਟਾਂ ਦੀ ਅਦਾਲਤ ਵਿਚ ਮੌਜੂਦਗੀ ਤੋਂ ਹਾਨਾਹ ਡਗਨ ਬੇਹੱਦ ਗੁੱਸੇ ਵਿਚ ਸੀ ਅਤੇ ਉਠ ਕੇ ਆਪਣੇ ਚੈਂਬਰ ਵਿਚ ਚਲੀ ਗਈ। ਵਿਸਕੌਨਸਿਨ ਦੀ ਸੁਪਰੀਮ ਕੋਰਟ ਅਪ੍ਰੈਲ ਵਿਚ ਹਾਨਾਹ ਡਗਨ ਨੂੰ ਮੁਅੱਤਲ ਕਰ ਚੁੱਕੀ ਹੈ ਜਿਥੇ ਉਹ 2016 ਤੋਂ ਜੱਜ ਦੀਆਂ ਸੇਵਾਵਾਂ ਨਿਭਾਅ ਰਹੇ ਸਨ। ਪਹਿਲੀ ਵਾਰ ਹਾਨਾਹ ਡਗਨ 65 ਫ਼ੀ ਸਦੀ ਵੋਟਾਂ ਨਾਲ ਜੱਜ ਚੁਣੇ ਗਏ ਜਦਕਿ ਦੂਜੀ ਵਾਰ ਕੋਈ ਵਿਰੋਧੀ ਨਾ ਹੋਣ ਕਾਰਨ ਬਿਨਾਂ ਮੁਕਾਬਲਾ ਚੁਣ ਲਿਆ ਗਿਆ। ਸਿਰਫ਼ ਹਾਨਾਹ ਡਗਨ ਵਿਰੁੱਧ ਹੀ ਕਾਰਵਾਈ ਨਹੀਂ ਕੀਤੀ ਜਾ ਰਹੀ ਸਗੋਂ ਬੋਸਟਨ ਦੀ ਮਿਊਂਸਪਲ ਅਦਾਲਤ ਵਿਚ ਜੱਜ ਦੀਆਂ ਸੇਵਾਵਾਂ ਨਿਭਾਅ ਰਹੀ ਸ਼ੈਲੀ ਜੋਸਫ਼ ਦੀ ਅਦਾਲਤ ਵਿਚ ਪੇਸ਼ੀ 9 ਜੂਨ ਨੂੰ ਹੋਣੀ ਹੈ ਅਤੇ ਉਨ੍ਹਾਂ ਨੂੰ ਅਹੁਦੇ ਤੋਂ ਹਟਾਇਆ ਜਾ ਸਕਦਾ ਹੈ। ਮੈਸਾਚਿਊਸੈਟਸ ਕਮਿਸ਼ਨ ਆਨ ਜੁਡੀਸ਼ੀਅਲ ਕੰਡਕਟ ਵੱਲੋਂ ਕੀਤੀ ਘੋਖ ਦੇ ਆਧਾਰ ’ਤੇ ਸ਼ੈਲੀ ਜੋਸਫ਼ ਨੂੰ ਆਪਣੇ ਪੇਸ਼ੇ ਨਾਲ ਇਨਸਾਫ਼ ਕਰਨ ਵਿਚ ਅਸਫ਼ਲ ਰਹਿਣ ਦਾ ਕਸੂਰਵਾਰ ਮੰਨਿਆ ਗਿਆ ਹੈ।

ਅਦਾਲਤ ਵਿਚੋਂ ਪ੍ਰਵਾਸੀ ਨੂੰ ਭਜਾਉਣ ਦੇ ਲੱਗੇ ਸਨ ਦੋਸ਼

ਸਫੌਲਕ ਕਾਊਂਟੀ ਦੀ ਸੁਪੀਰੀਅਰ ਅਦਾਲਤ ਵਿਚ ਹੋਣ ਵਾਲੀ ਸੁਣਵਾਈ ਦੌਰਾਨ ਤੈਅ ਹੋਵੇਗਾ ਕਿ ਸ਼ੈਲੀ ਜੋਸਫ਼ ਆਪਣੇ ਅਹੁਦੇ ’ਤੇ ਬਰਕਰਾਰ ਰਹਿ ਸਕਦੀ ਹੈ ਜਾਂ ਨਹੀਂ। ਦੱਸ ਦੇਈਏ ਕਿ ਜਨਵਰੀ 2003 ਅਤੇ 2007 ਵਿਚ ਡਿਪੋਰਟ ਕੀਤੇ ਇਕ ਗੈਰਕਾਨੂੰਨੀ ਪ੍ਰਵਾਸੀ ਨੂੰ ਇੰਮੀਗ੍ਰੇਸ਼ਨ ਵਾਲੇ ਮੁੜ ਗ੍ਰਿਫ਼ਤਾਰ ਕਰਨਾ ਚਾਹੁੰਦੇ ਸਨ ਪਰ ਉਹ ਸ਼ੈਲੀ ਜੋਸਫ ਦੀ ਅਦਾਲਤ ਦੇ ਇਕ ਦਰਵਾਜ਼ੇ ਰਾਹੀਂ ਫਰਾਰ ਹੋ ਗਿਆ। ਜੱਜ ’ਤੇ ਦੋਸ਼ ਲੱਗੇ ਕਿ ਉਨ੍ਹਾਂ ਵੱਲੋਂ ਜਾਣ-ਬੁੱਝ ਕੇ ਇਕ ਗੈਰਕਾਨੂੰਨੀ ਪ੍ਰਵਾਸੀ ਨੂੰ ਫਰਾਰ ਹੋਣ ਵਿਚ ਮਦਦ ਕੀਤੀ ਗਈ। ਕਮਿਸ਼ਨ ਦੀ ਰਿਪੋਰਟ ਕਹਿੰਦੀ ਹੈ ਕਿ ਸ਼ੈਲੀ ਜੋਸਫ਼ ਨੂੰ ਪਤਾ ਸੀ ਕਿ ਆਈਸ ਦੇ ਏਜੰਟ ਅਦਾਲਤ ਵਿਚ ਮੌਜੂਦ ਹਨ ਪਰ ਸੁਣਵਾਈ ਮੁਕੰਮਲ ਹੋਣ ਤੋਂ ਪਹਿਲਾਂ ਹੀ ਬਚਾਅ ਧਿਰ ਦਾ ਵਕੀਲ ਆਪਣੇ ਮੁਵੱਕਲ ਨੂੰ ਇਕ ਦਰਵਾਜ਼ੇ ਰਾਹੀਂ ਬਾਹਰ ਕੱਢਣ ਵਿਚ ਸਫ਼ਲ ਹੋ ਗਿਆ।