ਯੂ.ਕੇ. ਵਿਚ ਭਾਰਤੀਆਂ ਦੇ ਘਰ ਲੁੱਟਣ ਵਾਲਿਆਂ ਨੂੰ ਕੈਦ

ਲੰਡਨ : ਯੂ.ਕੇ. ਵਿਚ ਭਾਰਤੀਆਂ ਦੇ ਘਰ ਲੁੱਟਣ ਵਾਲਿਆਂ ਨੂੰ 17 ਸਾਲ ਕੈਦ ਦੀ ਸਜ਼ਾ ਸੁਣਾਈ ਗਈ ਹੈ। ਜੀ ਹਾਂ, ਚਾਰ ਜਣਿਆਂ ਦੇ ਗਿਰੋਹ ਵੱਲੋਂ ਵੱਲੋਂ 100 ਕਰੋੜ ਰੁਪਏ ਵੱਧ ਮੁੱਲ ਦੇ ਗਹਿਣੇ ਚੋਰੀ ਕਰਨ ਦਾ ਗੁਨਾਹ ਕਬੂਲ ਕੀਤਾ ਗਿਆ ਜਿਸ ਦੇ ਆਧਾਰ ’ਤੇ ਸਨੇਅਰਜ਼ਬਰੂਕ ਕ੍ਰਾਊਨ ਕੋਰਟ ਨੇ 33 ਸਾਲ ਦੇ ਜੈਰੀ ਓ ਡੌਨਲ, 23 ਸਾਲ ਦੇ ਬਾਰਨੀ ਮਲੋਨੀ, 23 ਸਾਲ ਦੇ ਹੀ ਕੇਅ ਐਜਰ ਅਤੇ 43 ਸਾਲ ਦੇ ਪੈਟ੍ਰਿਕ ਵਾਰਡ ਨੂੰ ਸਜ਼ਾ ਦਾ ਐਲਾਨ ਕੀਤਾ ਗਿਆ। ਮੈਟਰੋਪਾਲੀਟਨ ਪੁਲਿਸ ਨੇ ਦੱਸਿਆ ਕਿ ਲੰਡਨ ਅਤੇ ਨਾਲ ਲਗਦੇ ਇਲਾਕਿਆਂ ਵਿਚ ਸਾਊਥ ਏਸ਼ੀਅਨ ਲੋਕਾਂ ਦੇ ਘਰਾਂ ਵਿਚ ਲਗਾਤਾਰ ਹੋ ਰਹੀਆਂ ਚੋਰੀਆਂ ਦੇ ਮੱਦੇਨਜ਼ਰ ਚਲਾਈ ਇਕ ਖੁਫੀਆ ਮੁਹਿੰਮ ਜਿਸ ਦੌਰਾਨ ਤਿੰਨ ਜਣਿਆਂ ਨੂੰ ਰੰਗੇ ਹੱਥੀਂ ਕਾਬੂ ਕੀਤਾ ਗਿਆ।

100 ਕਰੋੜ ਰੁਪਏ ਤੋਂ ਵੱਧ ਮੁੱਲ ਦੇ ਗਹਿਣੇ ਕੀਤੇ ਸਨ ਚੋਰੀ

ਜੁਲਾਈ 2024 ਵਿਚ ਜੈਰੀ ਓ ਡੌਨਲ, ਬਾਰਨੀ ਮਲੋਨੀ ਅਤੇ ਕੇਅ ਐਜਰ ਕੋਲ ਚੋਰੀਸ਼ੁਦਾ ਗਹਿਣੇ ਬਰਾਮਦ ਹੋਣ ਦੇ ਦੋਸ਼ ਹੇਠ ਇਨ੍ਹਾਂ ਨੂੰ ਪੰਜ-ਪੰਜ ਸਾਲ ਦੀ ਸਜ਼ਾ ਸੁਣਾਈ ਗਈ। ਪੁਲਿਸ ਨੇ ਸਿਰਫ਼ ਗਹਿਣੇ ਹੀ ਬਰਾਮਦ ਨਹੀਂ ਕੀਤੇ ਸਗੋਂ ਸੀ.ਸੀ.ਟੀ.ਵੀ. ਫੁਟੇਜ ਰਾਹੀਂ ਚੋਰੀਆਂ ਦੌਰਾਨ ਵਰਤੀ ਗੱਡੀ ਵੀ ਲੱਭ ਲਈ। ਤਿੰਨ ਜਣਿਆਂ ਨੂੰ ਰੰਗੇ ਹੱਥੀਂ ਕਾਬੂ ਕੀਤੇ ਜਾਣ ਵੇਲੇ ਇਨ੍ਹਾਂ ਕੋਲੋਂ ਸੋਨੇ ਦਾ ਹਾਰ, ਵਿਆਹ ਵਾਲੀ ਵਜ਼ਨੀ ਮੁੰਦੀ, ਗੋਲਡ ਹੇਅਰ ਪਿੰਨ ਵਰਗੀਆਂ ਚੀਜ਼ਾਂ ਬਰਾਮਦ ਹੋਈਆਂ। ਪੈਟ੍ਰਿਕ ਵਾਰਡ ਨੂੰ ਉਸ ਦੇ ਘਰ ’ਤੇ ਛਾਪਾ ਮਾਰਦਿਆਂ ਵੱਖਰੇ ਤੌਰ ’ਤੇ ਗ੍ਰਿਫ਼ਤਾਰ ਕੀਤਾ ਗਿਆ ਜੋ ਅਪਰਾਧੀਆਂ ਦਾ ਗਿਰੋਹ ਦਾ ਅਹਿਮ ਮੈਂਬਰ ਸੀ। ਪੈਟ੍ਰਿਕ ਨੂੰ 2 ਸਾਲ ਅਤੇ ਪੰਜ ਮਹੀਨੇ ਵਾਸਤੇ ਜੇਲ ਭੇਜਿਆ ਗਿਆ ਹੈ। ਵੱਡੇ ਪੱਧਰ ’ਤੇ ਚੋਰੀਆਂ ਦੀ ਪੜਤਾਲ ਕਰ ਰਹੀ ਮੈਟਰੋਪਾਲੀਟਨ ਪੁਲਿਸ ਨੇ ਲੰਡਨ ਦੇ ਹੈਟਨ ਗਾਰਡਨ ਇਲਾਕੇ ਵਿਚ ਗਹਿਣਿਆਂ ਦੀ ਇਕ ਦੁਕਾਨ ’ਤੇ ਵੀ ਛਾਪਾ ਮਾਰਿਆ ਜਿਥੇ ਚੋਰੀਸ਼ੁਦਾ ਗਹਿਣੇ ਵੇਚੇ ਜਾ ਰਹੇ ਸਨ। ਛਾਪੇ ਦੌਰਾਨ ਅੱਠ ਕਿਲੋ ਗਹਿਣੇ ਅਤੇ 50 ਹਜ਼ਾਰ ਪਾਊਂਡ ਨਕਦ ਬਰਾਮਦ ਕੀਤੇ ਗਏ।

ਤਿੰਨ ਜਣਿਆਂ ਨੂੰ 5-5 ਸਾਲ ਅਤੇ ਚੌਥੇ ਨੂੰ ਢਾਈ ਸਾਲ ਵਾਸਤੇ ਜੇਲ ਭੇਜਿਆ

ਗਹਿਣਿਆਂ ਵਿਚ ਪਹਿਲੀ ਆਲਮੀ ਜੰਗ ਵੇਲੇ ਦੀ ਰੋਲੈਕਸ ਘੜੀ, ਪੁਰਾਣੀਆਂ ਤਸਵੀਰਾਂ ਵਾਲਾ ਸੋਨੇ ਦਾ ਲੌਕਟ ਅਤੇ ਜੇਬ ਵਿਚ ਪਾਉਣ ਵਾਲੀ ਸੋਨੇ ਦੀ ਹਾਰਲੋ ਬ੍ਰੌਸ ਲਿਮ ਦੀ ਘੜੀ ਵੀ ਸ਼ਾਮਲ ਸੀ। ਗਹਿਣਿਆਂ ਦੀ ਦੁਕਾਨ ਤੋਂ ਬਰਾਮਦ ਜ਼ਿਆਦਾਤਰ ਚੀਜ਼ਾਂ ਇਨ੍ਹਾਂ ਦੇ ਅਸਲ ਮਾਲਕਾਂ ਤੱਕ ਪੁੱਜ ਚੁੱਕੀਆਂ ਹਨ ਪਰ ਹੁਣ ਵੀ ਪੁਲਿਸ ਕੋਲ ਵੱਡੀ ਗਿਣਤੀ ਵਿਚ ਗਹਿਣੇ ਮੌਜੂਦ ਹਨ ਅਤੇ ਚੋਰੀਆਂ ਦੇ ਪੀੜਤਾਂ ਨੂੰ ਪੁਲਿਸ ਨਾਲ ਸੰਪਰਕ ਕਰਨ ਦਾ ਸੱਦਾ ਦਿਤਾ ਜਾ ਰਿਹਾ ਹੈ। ਇਥੇ ਦਸਣਾ ਬਣਦਾ ਹੈ ਕਿ ਜ਼ਿਆਦਾਤਰ ਗਹਿਣੇ ਦਸੰਬਰ 2023 ਤੋਂ ਜੁਲਾਈ 2024 ਦਰਮਿਆਨ ਦੱਖਣੀ ਲੰਡਨ ਦੇ ਰਿਹਾਇਸ਼ੀ ਇਲਾਕਿਆਂ ਤੋਂ ਇਲਾਵਾ ਸਰੀ, ਸਸੈਕਸ ਅਤੇ ਅਸੈਕਸ ਕਾਊਂਟੀਜ਼ ਵਿਚ ਭਾਰਤੀਆਂ ਜਾਂ ਹੋਰਨਾਂ ਸਾਊਥ ਏਸ਼ੀਅਨਜ਼ ਦੇ ਘਰਾਂ ਵਿਚੋਂ ਚੋਰੀ ਕੀਤੇ ਗਏ।