ਅਮਰੀਕਾ ਵਿਚ ਭਾਰਤੀ ਔਰਤ ਨੇ ਕਰਵਾਇਆ ਪਤੀ ਦਾ ਕਤਲ!

ਨਿਊ ਯਾਰਕ : ਅਮਰੀਕਾ ਵਿਚ ਇਕ ਭਾਰਤੀ ਔਰਤ ਵੱਲੋਂ ਕਥਿਤ ਤੌਰ ’ਤੇ ਪ੍ਰੇਮੀ ਨਾਲ ਰਲ ਕੇ ਪਤੀ ਦਾ ਕਤਲ ਕਰਵਾਉਣ ਦਾ ਸਨਸਨੀਖੇਜ਼ ਮਾਮਲਾ ਸਾਹਮਣੇ ਆਇਆ ਹੈ। ਮਰਹੂਮ ਵਿਕਾਸ ਯਾਦਵ ਦੀ ਮਾਤਾ ਨੇ ਦੱਸਿਆ ਕਿ ਉਨ੍ਹਾਂ ਦਾ ਬੇਟਾ 80 ਲੱਖ ਰੁਪਏ ਖਰਚ ਕਰ ਕੇ ਤਿੰਨ ਸਾਲ ਪਹਿਲਾਂ ਆਪਣੀ ਪਤਨੀ ਅਤੇ ਬੇਟੀ ਨਾਲ ਨਿਊ ਯਾਰਕ ਦੇ ਬਰੁਕਲਿਨ ਵਿਖੇ ਪੁੱਜਾ ਸੀ। ਹਰਿਆਣਾ ਦੇ ਕੈਥਲ ਜ਼ਿਲ੍ਹੇ ਨਾਲ ਸਬੰਧਤ ਪਰਵਾਰ ਮੁਤਾਬਕ ਨਿਊ ਯਾਰਕ ਵਿਖੇ ਰਿਹਾਇਸ਼ ਦੌਰਾਨ ਸੋਨੂੰ ਨਾਂ ਦਾ ਸ਼ਖਸ ਵਿਕਾਸ ਦੇ ਘਰ ਆਉਣ-ਜਾਣ ਲੱਗਾ। ਪਰਵਾਰ ਦਾ ਦੋਸ਼ ਹੈ ਕਿ ਸੋਨੂੰ ਅਤੇ ਉਸ ਦੇ ਸਾਥੀਆਂ ਨੇ ਰਲ ਕੇ ਵਿਕਾਸ ਉਤੇ ਹਮਲਾ ਕੀਤਾ ਅਤੇ ਗੰਭੀਰ ਜ਼ਖਮੀ ਕਰ ਕੇ ਫਰਾਰ ਹੋ ਗਏ। ਵਿਕਾਸ 9 ਦਿਨ ਤੱਕ ਹਸਪਤਾਲ ਵਿਚ ਜ਼ਿੰਦਗੀ ਵਾਸਤੇ ਸੰਘਰਸ਼ ਕਰਦਾ ਰਿਹਾ ਅਤੇ ਆਖਰਕਾਰ ਉਸ ਦੀ ਮੌਤ ਹੋ ਗਈ।

ਨਿਊ ਯਾਰਕ ਵਿਖੇ ਵਿਕਾਸ ਯਾਦਵ ਦੀ ਭੇਤ ਭਰੇ ਹਾਲਾਤ ਵਿਚ ਮੌਤ

ਵਿਕਾਸ ਦੀ ਦੇਹ ਭਾਰਤ ਭੇਜੀ ਜਾ ਰਹੀ ਹੈ ਪਰ ਉਸ ਦੀ ਮਾਤਾ ਨੇ ਸੋਸ਼ਲ ਮੀਡੀਆ ’ਤੇ ਇਕ ਵੀਡੀਓ ਸਾਂਝੀ ਕਰਦਿਆਂ ਸੋਨੂੰ ਅਤੇ ਗੁਰਮੀਤ ਉਤੇ ਕਤਲ ਦੇ ਦੋਸ਼ ਲਾਏ ਹਨ। ਵਿਕਾਸ ਦੀ ਮਾਤਾ ਦਾ ਕਹਿਣਾ ਹੈ ਕਿ ਕੁਝ ਦਿਨ ਪਹਿਲਾਂ ਸੋਨੂੰ, ਵਿਕਾਸ ਦੀ ਪਤਨੀ ਅਤੇ ਬੇਟੀ ਨੂੰ ਆਪਣੇ ਨਾਲ ਲੈ ਗਿਆ ਜਦਕਿ ਵਿਕਾਸ ਉਸ ਨੂੰ ਘਰ ਵਾਪਸ ਲਿਆਉਣ ਦੇ ਯਤਨ ਕਰ ਰਿਹਾ ਸੀ ਪਰ ਸੋਨੂੰ ਉਸ ਨੂੰ ਜਾਨੋ ਮਾਰਨ ਦੀਆਂ ਧਮਕੀਆਂ ਦੇਣ ਲੱਗਾ। ਨਿਊ ਯਾਰਕ ਪੁਲਿਸ ਮਾਮਲੇ ਦੀ ਪੜਤਾਲ ਕਰ ਰਹੀ ਹੈ ਜਦਕਿ ਵਿਕਾਸ ਦੀ ਮਾਤਾ ਵੱਲੋਂ ਸੋਨੂੰ ਅਤੇ ਉਸ ਦੇ ਸਾਥੀਆਂ ਨੂੰ ਗ੍ਰਿਫ਼ਤਾਰ ਕਰਨ ਦੀ ਅਪੀਲ ਕੀਤੀ ਜਾ ਰਹੀ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਬੀਮੇ ਦੀ ਰਕਮ ਮਿਲਣ ਤੱਕ ਵਿਕਾਸ ਦੀ ਪਤਨੀ ਅਤੇ ਬੇਟੀ ਨਿਊ ਯਾਰਕ ਵਿਖੇ ਹੀ ਰਹਿਣਗੀਆਂ। ਦੂਜੇ ਪਾਸੇ ਕੈਥਲ ਜ਼ਿਲ੍ਹੇ ਪਿੰਡ ਕੌਲ ਵਿਖੇ ਹੋਈ ਪੰਚਾਇਤ ਦੌਰਾਨ ਵਿਕਾਸ ਦੀ ਬੇਟੀ ਦੀ ਸਰਪ੍ਰਸਤੀ ਦਾਦੀ ਨੂੰ ਸੌਂਪ ਦਿਤੀ ਗਈ ਹੈ।