ਅਮਰੀਕਾ ਤੋਂ ਡਿਪੋਰਟ ਨਹੀਂ ਹੋਵੇਗਾ ਭਾਰਤੀ ਵਿਦਿਆਰਥੀ

ਵਾਸ਼ਿੰਗਟਨ : ਅਮਰੀਕਾ ਦੇ ਇੰਮੀਗ੍ਰੇਸ਼ਨ ਵਿਭਾਗ ਵੱਲੋਂ ਗ੍ਰਿਫ਼ਤਾਰ ਭਾਰਤੀ ਵਿਦਿਆਰਥੀ ਨੂੰ ਵੱਡੀ ਰਾਹਤ ਮਿਲ ਗਈ ਜਦੋਂ ਇਕ ਫੈਡਰਲ ਅਦਾਲਤ ਨੇ ਉਸ ਨੂੰ ਡਿਪੋਰਟ ਕਰਨ ’ਤੇ ਰੋਕ ਲਾ ਦਿਤੀ। ਵਰਜੀਨੀਆ ਕੋਰਟ ਦੀ ਜੱਜ ਪੈਟ੍ਰੀਸ਼ੀਆ ਟੋਲਾਈਵਰ ਨੇ ਆਪਣੇ ਫੈਸਲੇ ਵਿਚ ਕਿਹਾ ਕਿ ਬਦਰ ਖਾਨ ਸੂਰੀ ਨੂੰ ਉਸ ਵੇਲੇ ਤੱਕ ਡਿਪੋਰਟ ਨਾ ਕੀਤਾ ਜਾਵੇ ਜਦੋਂ ਤੱਕ ਅਦਾਲਤ ਵੱਲੋਂ ਸਬੰਧਤ ਹੁਕਮ ਜਾਰੀ ਨਾ ਕੀਤੇ ਜਾਣ। ਉਧਰ ਜਾਰਜਟਾਊਨ ਯੂਨੀਵਰਸਿਟੀ ਨੇ ਇਕ ਬਿਆਨ ਜਾਰੀ ਕਰਦਿਆਂ ਕਿਹਾ ਹੈ ਕਿ ਬਦਰ ਖਾਨ ਸੂਰੀ ਦੇ ਕਿਸੇ ਗੈਰਕਾਨੂੰਨੀ ਸਰਗਰਮੀ ਵਿਚ ਸ਼ਾਮਲ ਹੋਣ ਦੀ ਕੋਈ ਜਾਣਕਾਰੀ ਨਹੀਂ ਅਤੇ ਗ੍ਰਿਫਤਾਰੀ ਦਾ ਠੋਸ ਕਾਰਨ ਵੀ ਪਤਾ ਨਹੀਂ ਲੱਗ ਸਕਿਆ।

ਵਰਜੀਨੀਆ ਦੀ ਫੈਡਰਲ ਅਦਾਲਤ ਨੇ ਲਾਈ ਰੋਕ

ਇਸੇ ਦੌਰਾਨ ਬਦਰ ਖਾਨ ਦੀ ਪਤਨੀ ਮਾਫ਼ੀਜ਼ ਅਹਿਮਦ ਯੂਸਫ ਨੇ ਕਿਹਾ ਕਿ ਉਸ ਦੇ ਪਤੀ ਦੀ ਗ੍ਰਿਫ਼ਤਾਰੀ ਨੇ ਜ਼ਿੰਦਗੀ ਪੂਰੀ ਤਰ੍ਹਾਂ ਬਦਲ ਦਿਤੀ ਹੈ। ਤਿੰਨ ਬੱਚਿਆਂ ਨੂੰ ਉਨ੍ਹਾਂ ਦੇ ਪਿਤਾ ਦੀ ਸਖ਼ਤ ਜ਼ਰੂਰਤ ਹੈ ਅਤੇ ਬਤੌਰ ਮਾਂ ਬੱਚਿਆਂ ਦੀ ਪਰਵਰਿਸ਼ ਵਾਸਤੇ ਉਹ ਵੀ ਸਹਾਰਾ ਚਾਹੁੰਦੀ ਹੈ। ਅਦਾਲਤ ਵਿਚ ਸੁਣਵਾਈ ਦੌਰਾਨ ਬਦਰ ਖਾਨ ਦੇ ਵਕੀਲ ਹਸਨ ਅਹਿਮਦ ਤੋਂ ਇਲਾਵਾ ਅਮੈਰਿਕਨ ਸਿਵਲ ਲਿਬਰਟੀਜ਼ ਯੂਨੀਅਨ ਦੀ ਵਕੀਲ ਸੋਫੀਆ ਗ੍ਰੈਗ ਵੀ ਪੁੱਜੇ ਹੋਏ ਸਨ ਜਿਨ੍ਹਾਂ ਕਿਹਾ ਕਿ ਸਿਰਫ ਸਿਆਸੀ ਵਿਚਾਰ ਵੱਖਰੇ ਹੋਣ ਕਰ ਕੇ ਬਦਰ ਖਾਨ ਨੂੰ ਉਸ ਦੇ ਘਰ ਅਤੇ ਪਰਵਾਰ ਤੋਂ ਵੱਖ ਕਰਨਾ ਅਤੇ ਅਮਰੀਕਾ ਵਿਚ ਰਹਿਣ ਦੇ ਹੱਕ ਤੋਂ ਵਾਂਝਾ ਕਰਨਾ ਸਰਾਸਰ ਗੈਰਸੰਵਿਧਾਨਕ ਹੈ। ਇਥੇ ਦਸਣਾ ਬਣਦਾ ਹੈ ਕਿ ਇੰਮੀਗ੍ਰੇਸ਼ਨ ਅਤੇ ਕਸਟਮਜ਼ ਐਨਫੋਰਸਮੈਂਟ ਵਾਲਿਆਂ ਨੇ ਵਰਜੀਨੀਆ ਦੇ ਰੌਸਲਿਨ ਸ਼ਹਿਰ ਵਿਚ ਮਾਰੇ ਛਾਪੇ ਦੌਰਾਨ ਬਦਰ ਖਾਨ ਨੂੰ ਹਿਰਾਸਤ ਵਿਚ ਲਿਆ ਅਤੇ ਉਸ ਨੂੰ ਦੱਸਿਆ ਕਿ ਉਸ ਦਾ ਵੀਜ਼ਾ ਰੱਦ ਕਰ ਦਿਤਾ ਗਿਆ ਹੈ। ਬਦਰ ਖਾਨ ਸੂਰੀ ਨੂੰ ਡਿਪੋਰਟ ਕਰਨ ਲਈ ਬਿਲਕੁਲ ਉਹੀ ਧਾਰਾ ਲਾਗੂ ਕੀਤੀ ਗਈ ਹੈ ਜੋ ਮੁਹੰਮਦ ਖਲੀਲ ਨੂੰ ਡਿਪੋਰਟ ਕਰਨ ਵਾਸਤੇ ਵਰਤੀ ਜਾ ਰਹੀ ਹੈ। ਇਹ ਧਾਰਾ ਅਮਰੀਕਾ ਦੇ ਵਿਦੇਸ਼ ਮੰਤਰੀ ਮਾਰਕੋ ਰੂਬੀਓ ਨੂੰ ਅਜਿਹੇ ਕਿਸੇ ਵੀ ਗਰੀਨ ਕਾਰਡ ਹੋਲਡਰ ਨੂੰ ਡਿਪੋਰਟ ਕਰਨ ਦਾ ਹੱਕ ਦਿੰਦੀ ਹੈ ਜੋ ਅਮਰੀਕਾ ਦੀ ਧਰਤੀ ’ਤੇ ਰਹਿੰਦਿਆਂ ਮੁਲਕ ਦੀ ਵਿਦੇਸ਼ ਨੀਤੀ ਵਾਸਤੇ ਖਤਰਾ ਬਣ ਰਿਹਾ ਹੋਵੇ। ਬਦਰ ਖਾਨ ਦੀ ਪਤਨੀ ਮਾਫ਼ੀਜ਼ ਅਹਿਮਦ ਯੂਸਫ ਇਜ਼ਰਾਈਲ ਹਮਲੇ ਦੌਰਾਨ ਮਾਰੇ ਗਏ ਹਮਾਸ ਆਗੂ ਇਸਮਾਈਲ ਹਾਨੀਏ ਦੇ ਸਾਬਕਾ ਸਲਾਹਕਾਰ ਅਹਿਮਦ ਯੂਸਫ ਦੀ ਬੇਟੀ ਹੈ।

ਲੂਈਜ਼ੀਆਨਾ ਦੇ ਡਿਟੈਨਸ਼ਨ ਸੈਂਟਰ ਵਿਚ ਬੰਦ ਹੈ ਬਦਰ ਖਾਨ ਸੂਰੀ

ਇਸੇ ਦੌਰਾਨ ਅਮਰੀਕਾ ਦੇ ਗ੍ਰਹਿ ਸੁਰੱਖਿਆ ਵਿਭਾਗ ਦੇ ਇਕ ਬੁਲਾਰੇ ਨੇ ਕਿਹਾ ਕਿ ਬਦਰ ਖਾਨ ਸੂਰੀ ਸ਼ਰ੍ਹੇਆਮ ਹਮਾਸ ਦਾ ਪ੍ਰਚਾਰ ਕਰ ਰਿਹਾ ਸੀ ਅਤੇ ਸੋਸ਼ਲ ਮੀਡੀਆ ’ਤੇ ਯਹੂਦੀਆਂ ਵਿਰੁੱਧ ਟਿੱਪਣੀਆਂ ਵੀ ਕੀਤੀਆਂ। ਇਸ ਵੇਲੇ ਡਿਲੀਟ ਕੀਤੀ ਜਾ ਚੁੱਕੀ ਇਕ ਪੋਸਟ ਵਿਚ ਬਦਰ ਖਾਨ ਵੱਲੋਂ ਦੱਖਣੀ ਇਜ਼ਰਾਈਲ ਉਤੇ ਹਮਾਸ ਦੇ ਹਮਲੇ ਬਾਰੇ ਆਈਆਂ ਰਿਪੋਰਟਾਂ ਨੂੰ ਬੇਬੁਨਿਆਦ ਦੱਸਿਆ ਗਿਆ। ਸਿਰਫ ਐਨਾ ਹੀ ਨਹੀਂ ਇਕ ਹੋਰ ਪੋਸਟ ਵਿਚ ਸੂਰੀ ਵੱਲੋਂ ਕਥਿਤ ਤੌਰ ’ਤੇ ਹਮਾਸ ਦੇ ਬਾਨੀ ਸ਼ੇਖ ਅਹਿਮਦ ਯਾਸੀਨ ਦੀ ਹਮਾਇਤ ਕੀਤੀ ਗਈ। ਬਦਰ ਖਾਨ ਦੀ ਪਤਨੀ ਯੂ.ਐਸ. ਸਿਟੀਜ਼ਨ ਹੈ ਅਤੇ ਉਸ ਨੇ ਵੀ ਕਈ ਵਾਰ ਸੋਸ਼ਲ ਮੀਡੀਆ ’ਤੇ ਹਮਾਸ ਦੀ ਹਮਾਇਤ ਕੀਤੀ। ਇੰਮੀਗ੍ਰੇਸ਼ਨ ਵਿਭਾਗ ਮੁਤਾਬਕ ਬਦਰ ਖਾਨ ਇਸ ਵੇਲੇ ਲੂਈਜ਼ੀਆਨਾ ਦੇ ਅਲੈਗਜ਼ੈਂਡਰੀਆ ਡਿਟੈਨਸ਼ਨ ਸੈਂਟਰ ਵਿਚ ਬੰਦ ਹੈ ਜਦਕਿ ਕੁਝ ਮੀਡੀਆ ਰਿਪੋਰਟਾਂ ਮੁਤਾਬਕ ਉਸ ਨੂੰ ਟੈਕਸਸ ਦੇ ਡਿਟੈਨਸ਼ਨ ਸੈਂਟਰ ਲਿਜਾਇਆ ਜਾ ਸਕਦਾ ਹੈ।