India ਬਨਾਮ ਭਾਰਤ ਦੀ ਲੜਾਈ 'ਚ UN ਵੀ ਕੁੱਦਿਆ

ਨਵੀਂ ਦਿੱਲੀ : ਦੇਸ਼ ਦਾ ਨਾਂ 'India' ਤੋਂ ਬਦਲ ਕੇ 'ਭਾਰਤ' ਕਰਨ ਦੇ ਰੌਲੇ-ਰੱਪੇ ਦਰਮਿਆਨ ਸੰਯੁਕਤ ਰਾਸ਼ਟਰ (ਯੂ.ਐਨ.) ਨੇ ਵੀ ਆਪਣਾ ਪੱਖ ਰੱਖਿਆ ਹੈ। ਪਿਛਲੇ ਮੰਗਲਵਾਰ, ਰਾਸ਼ਟਰਪਤੀ ਦ੍ਰੋਪਦੀ ਮੁਰਮੂ ਦੁਆਰਾ ਦਿੱਤੇ ਗਏ ਜੀ-20 ਡਿਨਰ ਦੇ ਸੱਦੇ ਵਿੱਚ ਉਨ੍ਹਾਂ ਨੂੰ 'India ਦੇ ਰਾਸ਼ਟਰਪਤੀ' ਦੀ ਬਜਾਏ 'ਭਾਰਤ ਦਾ ਰਾਸ਼ਟਰਪਤੀ' ਕਿਹਾ ਗਿਆ ਸੀ। ਜਿਸ ਤੋਂ ਬਾਅਦ ਵਿਰੋਧੀ ਪਾਰਟੀਆਂ ਨੇ ਸਰਕਾਰ 'ਤੇ ਦੇਸ਼ ਦਾ ਨਾਂ ਬਦਲਣ ਦਾ ਦੋਸ਼ ਲਾਇਆ।

ਕਥਿਤ ਤੌਰ 'ਤੇ ਦੇਸ਼ ਦਾ ਨਾਂ 'India' ਤੋਂ ਬਦਲ ਕੇ 'ਭਾਰਤ' ਕੀਤੇ ਜਾਣ ਦੇ ਪੱਖ ਅਤੇ ਵਿਰੁੱਧ ਕਈ ਆਵਾਜ਼ਾਂ ਉਠਾਈਆਂ ਗਈਆਂ ਸਨ। ਕਈ ਲੋਕਾਂ ਨੇ ਇਸ ਦਾ ਸਮਰਥਨ ਕੀਤਾ ਅਤੇ ਕਈ ਲੋਕਾਂ ਨੇ ਵਿਰੋਧ ਵੀ ਕੀਤਾ। ਹੁਣ ਸੰਯੁਕਤ ਰਾਸ਼ਟਰ ਦੇ ਇਕ ਉੱਚ ਅਧਿਕਾਰੀ ਨੇ ਕਿਹਾ ਹੈ ਕਿ ਜੇਕਰ ਸੰਯੁਕਤ ਰਾਸ਼ਟਰ ਦੇ ਦੇਸ਼ਾਂ ਦੇ ਪੱਖ ਤੋਂ ਉਨ੍ਹਾਂ ਦਾ ਨਾਂ ਬਦਲਣ ਦਾ ਵਿਚਾਰ ਆਉਂਦਾ ਹੈ ਤਾਂ ਅਸੀਂ ਇਸ 'ਤੇ ਵਿਚਾਰ ਕਰਦੇ ਹਾਂ।

ਸੰਯੁਕਤ ਰਾਸ਼ਟਰ ਦੇ ਸਕੱਤਰ-ਜਨਰਲ ਐਂਟੋਨੀਓ ਗੁਟੇਰੇਸ ਦੇ ਉਪ ਬੁਲਾਰੇ ਫਰਹਾਨ ਹੱਕ ਨੇ ਬੁੱਧਵਾਰ ਨੂੰ ਤੁਰਕੀ ਦਾ ਨਾਂ ਬਦਲ ਕੇ ਤੁਰਕੀਏ ਰੱਖਣ ਦੀ ਮਿਸਾਲ ਪੇਸ਼ ਕੀਤੀ। India ਦਾ ਨਾਂ ਬਦਲ ਕੇ ਭਾਰਤ ਰੱਖਣ ਦੀਆਂ ਰਿਪੋਰਟਾਂ 'ਤੇ ਆਧਾਰਿਤ ਆਪਣੇ ਬਿਆਨ 'ਚ ਉਨ੍ਹਾਂ ਕਿਹਾ, "ਤੁਰਕੀ ਦੇ ਮਾਮਲੇ 'ਚ ਇਹ ਕਾਰਵਾਈ ਉੱਥੋਂ ਦੀ ਸਰਕਾਰ ਵੱਲੋਂ ਸਾਨੂੰ ਦਿੱਤੀ ਗਈ ਰਸਮੀ ਬੇਨਤੀ ਤੋਂ ਬਾਅਦ ਕੀਤੀ ਗਈ ਸੀ। ਜ਼ਾਹਿਰ ਹੈ ਕਿ ਜੇਕਰ ਸਾਨੂੰ ਅਜਿਹੀ ਕੋਈ ਬੇਨਤੀ ਮਿਲਦੀ ਹੈ ਤਾਂ ਅਸੀਂ ਉਨ੍ਹਾਂ 'ਤੇ ਵਿਚਾਰ ਕਰਦੇ ਹਾਂ।"