ਸੱਚ ਆਇਆ ਸਾਹਮਣੇ, ਇਸ ਕਰ ਕੇ ਪਲੇਟਫਾਰਮ 'ਤੇ ਚੜ੍ਹ ਗਈ ਸੀ ਰੇਲ

ਮਥੁਰਾ : ਉੱਤਰ ਪ੍ਰਦੇਸ਼ ਦੇ ਮਥੁਰਾ 'ਚ ਟਰੇਨ ਦੇ ਪਟੜੀ ਤੋਂ ਉਤਰ ਕੇ ਪਲੇਟਫਾਰਮ 'ਤੇ ਚੜ੍ਹਨ ਦੀ ਘਟਨਾ ਦੀ ਅੰਦਰੂਨੀ ਰਿਪੋਰਟ ਸਾਹਮਣੇ ਆਈ ਹੈ। ਮੰਗਲਵਾਰ ਰਾਤ ਨੂੰ ਮਥੁਰਾ ਜੰਕਸ਼ਨ 'ਤੇ ਸ਼ਕੂਰਬਸਤੀ-ਮਥੁਰਾ ਮੇਮੂ (04446) ਦੇ ਪਲੇਟਫਾਰਮ ਨਾਲ ਟਕਰਾਉਣ ਤੋਂ ਕੁਝ ਘੰਟੇ ਬਾਅਦ ਜਾਂਚ ਸ਼ੁਰੂ ਹੋਈ। ਰੇਲਵੇ ਵਿਭਾਗ ਵੱਲੋਂ ਹਾਦਸੇ ਦੇ ਕਾਰਨਾਂ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਹਾਦਸੇ ਦੀ ਇੱਕ ਅੰਦਰੂਨੀ ਰਿਪੋਰਟ ਵਿੱਚ ਪਾਇਆ ਗਿਆ ਕਿ ਸ਼ਰਾਬੀ ਸਹਾਇਕ ਨੇ ਆਪਣਾ ਬੈਗ ਡਰਾਈਵਿੰਗ ਕੈਬ ਵਿੱਚ ਇੰਜਣ ਦੇ ਥਰੋਟਲ ਉੱਤੇ ਰੱਖਿਆ ਸੀ, ਜਿਸ ਕਾਰਨ ਇਹ ਹਾਦਸਾ ਵਾਪਰਿਆ। ਥਰੋਟਲ 'ਤੇ ਬੈਗ ਰੱਖੇ ਹੋਣ ਕਾਰਨ ਰੇਲਗੱਡੀ ਦੀ ਰਫ਼ਤਾਰ ਅਚਾਨਕ ਵੱਧ ਗਈ ਅਤੇ ਉਹ ਪਲੇਟਫਾਰਮ ਨਾਲ ਟਕਰਾ ਗਈ। ਇਸ ਦੀ ਸੀਸੀਟੀਵੀ ਫੁਟੇਜ ਵੀ ਹੁਣ ਸਾਹਮਣੇ ਆਈ ਹੈ। ਭਾਵੇਂ ਰੇਲਵੇ ਵਿਭਾਗ ਵੱਲੋਂ ਇਸ ਗੱਲ ਦੀ ਪੁਸ਼ਟੀ ਨਹੀਂ ਕੀਤੀ ਜਾ ਰਹੀ ਹੈ ਪਰ ਇਹ ਇੱਕ ਸ਼ਰਾਬੀ ਹੈਲਪਰ ਦੀ ਹਰਕਤ ਵਜੋਂ ਸਾਹਮਣੇ ਆਇਆ ਹੈ ਜੋ ਆਪਣੇ ਮੋਬਾਈਲ ਫ਼ੋਨ ਵਿੱਚ ਮਸਤ ਸੀ।

ਘਟਨਾ ਤੋਂ ਬਾਅਦ ਰੇਲਵੇ ਵੱਲੋਂ ਛੇ ਮੈਂਬਰੀ ਟੀਮ ਨੂੰ ਜਾਂਚ ਲਈ ਮੌਕੇ 'ਤੇ ਭੇਜਿਆ ਗਿਆ। ਟੀਮ ਵੱਲੋਂ ਤਿਆਰ ਕੀਤੀ ਮੁੱਢਲੀ ਸਾਂਝੀ ਰਿਪੋਰਟ ਵਿੱਚ ਪਾਇਆ ਗਿਆ ਕਿ ਸਹਾਇਕ ਸਚਿਨ ਕੁਮਾਰ ਨੂੰ ਡਰਾਈਵਿੰਗ ਟਰੇਲਰ ਕੋਚ (ਡੀਟੀਸੀ) ਵਿੱਚ ਕੈਬ ਦੀਆਂ ਚਾਬੀਆਂ ਇਕੱਠੀਆਂ ਕਰਨ ਲਈ ਭੇਜਿਆ ਗਿਆ ਸੀ। ਰਿਪੋਰਟ ਵਿਚ ਕਿਹਾ ਗਿਆ ਹੈ ਕਿ ਉਹ ਸ਼ਰਾਬੀ ਸੀ। ਲਗਾਤਾਰ ਮੋਬਾਈਲ ਵੱਲ ਦੇਖ ਰਿਹਾ ਸੀ। ਆਪਣੇ ਆਲੇ-ਦੁਆਲੇ ਦੀ ਪਰਵਾਹ ਕੀਤੇ ਬਿਨਾਂ ਉਸਨੇ ਅਚਾਨਕ ਆਪਣਾ ਬੈਗ ਇੰਜਣ ਦੇ ਥਰੋਟਲ 'ਤੇ ਰੱਖ ਦਿੱਤਾ। ਥਰੋਟਲ 'ਤੇ ਬੈਗ ਰੱਖੇ ਹੋਣ ਕਾਰਨ ਟਰੇਨ ਦੀ ਰਫਤਾਰ ਕਾਫੀ ਵਧ ਗਈ ਅਤੇ ਇਹ ਪਲੇਟਫਾਰਮ ਨਾਲ ਟਕਰਾ ਗਈ।

ਪਲੇਟਫਾਰਮ ਨਾਲ ਟਕਰਾਉਣ ਦੇ ਮਾਮਲੇ ਵਿੱਚ ਸਚਿਨ ਸਮੇਤ ਟਰੇਨ ਦੇ ਸੰਚਾਲਨ ਅਤੇ ਰੱਖ-ਰਖਾਅ ਨਾਲ ਜੁੜੇ ਪੰਜ ਕਰਮਚਾਰੀਆਂ ਨੂੰ ਮੁਅੱਤਲ ਕਰ ਦਿੱਤਾ ਗਿਆ ਹੈ। ਰੇਲਵੇ ਦੀ ਜਾਂਚ ਟੀਮ ਦੁਆਰਾ ਤਿਆਰ ਕੀਤੀ ਗਈ 28 ਪੰਨਿਆਂ ਦੀ ਸਾਂਝੀ ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਆਮ ਤੌਰ 'ਤੇ ਡੀਟੀਸੀ ਕੈਬ ਦੀਆਂ ਚਾਬੀਆਂ ਤਕਨੀਸ਼ੀਅਨਾਂ ਨੂੰ ਮਿਲਦੀਆਂ ਹਨ। ਹਾਲਾਂਕਿ ਇਸ ਮਾਮਲੇ 'ਚ ਟੈਕਨੀਸ਼ੀਅਨ-1 ਹਰਮਨ ਸਿੰਘ ਨੇ ਸਚਿਨ ਨੂੰ ਚਾਬੀਆਂ ਲੈਣ ਲਈ ਭੇਜਿਆ ਸੀ। ਰਿਪੋਰਟ ਦੇ ਅਨੁਸਾਰ, ਸਚਿਨ 'ਤੇ ਕੀਤੇ ਗਏ ਬ੍ਰੇਥ ਐਨਾਲਾਈਜ਼ਰ ਟੈਸਟ ਵਿੱਚ 47mg/100ml ਦੀ ਰੀਡਿੰਗ ਮਿਲੀ, ਜਿਸ ਤੋਂ ਪਤਾ ਚੱਲਿਆ ਕਿ ਉਸਨੇ ਸ਼ਰਾਬ ਪੀਤੀ ਸੀ।