ਪਤਨੀ ਨੂੰ ਲੈਣ ਸਹੁਰੇ ਘਰ ਆਏ ਜਵਾਈ ਨੇ ਚਲਾਈਆਂ ਗੋਲੀਆਂ

ਹਿਸਾਰ, 17 ਅਕਤੂਬਰ, ਨਿਰਮਲ : ਹਿਸਾਰ ’ਚ ਪਤਨੀ ਨੂੰ ਲੈਣ ਸਹੁਰੇ ਘਰ ਆਏ ਪਤੀ ਨੇ ਗੋਲੀਆਂ ਚਲਾ ਦਿੱਤੀਆਂ। ਪਤਨੀ ਨੂੰ ਨਾਲ ਨਾ ਭੇਜਣ ਕਾਰਨ ਪਤੀ ਨੂੰ ਗੁੱਸਾ ਆ ਗਿਆ। ਉਹ ਆਪਣੇ ਭਰਾ ਨਾਲ ਖੇਤਾਂ ਵਿੱਚ ਪਹੁੰਚਿਆ, ਪਤਨੀ ਦੀ ਕੁੱਟਮਾਰ ਕੀਤੀ ਅਤੇ ਗੋਲੀਆਂ ਚਲਾ ਦਿੱਤੀਆਂ। ਇਸ ਤੋਂ ਬਾਅਦ ਉਹ ਫਰਾਰ ਹੋ ਗਿਆ। ਆਜ਼ਾਦ ਨਗਰ ਥਾਣਾ ਪੁਲਸ ਨੇ ਮਾਮਲਾ ਦਰਜ ਕਰ ਲਿਆ ਹੈ।

ਪਿੰਡ ਪੱਤਣ ਵਾਸੀ ਸੀਯਾਰਾਮ ਨੇ ਪੁਲਸ ਨੂੰ ਦੱਸਿਆ ਕਿ ਉਸ ਨੇ ਆਪਣੀ ਲੜਕੀ ਪ੍ਰਿਅੰਕਾ ਦਾ ਵਿਆਹ ਕਰੀਬ 7 ਮਹੀਨੇ ਪਹਿਲਾਂ ਪਿੰਡ ਤਲਵੰਡੀ ਬਾਦਸ਼ਾਹਪੁਰ ਵਾਸੀ ਅਨਿਲ ਨਾਲ ਕੀਤਾ ਸੀ। 5 ਦਿਨ ਪਹਿਲਾਂ ਅਨਿਲ ਅਤੇ ਉਸ ਦੇ ਛੋਟੇ ਭਰਾ ਰੋਹਤਾਸ਼ ਨੇ ਮਿਲ ਕੇ ਪ੍ਰਿਅੰਕਾ ਦੀ ਕੁੱਟਮਾਰ ਕੀਤੀ ਸੀ। ਦੇਸੀ ਪਿਸਤੌਲ ਦਿਖਾ ਕੇ ਜਾਨੋਂ ਮਾਰਨ ਦੀ ਧਮਕੀ ਦਿੱਤੀ।

ਇਸ ਸਬੰਧੀ ਸੂਚਨਾ ਮਿਲਣ ’ਤੇ ਉਹ ਪੰਚਾਇਤ ਨਾਲ ਅਨਿਲ ਦੇ ਘਰ ਗਏ। ਅਨਿਲ ਨੇ ਉਦੋਂ ਬਹੁਤ ਜ਼ਿਆਦਾ ਸ਼ਰਾਬ ਪੀ ਲਈ ਸੀ। ਸ਼ਰਾਬ ਦੇ ਨਸ਼ੇ ’ਚ ਉਸ ਦੇ ਚਿਹਰੇ ’ਤੇ ਸੱਟਾਂ ਲੱਗੀਆਂ ਸਨ। ਜਦੋਂ ਉਹ ਨਾ ਮੰਨੇ ਤਾਂ ਪ੍ਰਿਅੰਕਾ ਨੂੰ ਘਰ ਲੈ ਗਏ।

ਸੀਯਾਰਾਮ ਨੇ ਦੱਸਿਆ ਕਿ ਅਨਿਲ ਅਤੇ ਰੋਹਤਾਸ਼ ਨੇ ਫੋਨ ਕਰਕੇ ਮੇਰੇ ਲੜਕੇ ਪਵਨ ਨੂੰ ਜਾਨੋਂ ਮਾਰਨ ਦੀਆਂ ਧਮਕੀਆਂ ਦਿੱਤੀਆਂ। ਉਹ ਰਿਸ਼ਤੇਦਾਰਾਂ ਨੂੰ ਮਿਲਣ ਗਿਆ ਹੋਇਆ ਸੀ। ਪਿੱਛੇ ਤੋਂ ਉਸ ਦਾ ਜਵਾਈ ਅਨਿਲ ਆਪਣੇ ਭਰਾ ਰੋਹਤਾਸ਼ ਅਤੇ ਦੋਸਤ ਵਿੱਕੀ ਨਾਲ ਬਾਈਕ ’ਤੇ ਪਿੰਡ ਆਇਆ। ਤਿੰਨੋਂ ਹਥਿਆਰ ਲੈ ਕੇ ਆਏ ਸਨ।

ਪ੍ਰਿਅੰਕਾ ਅਤੇ ਉਸ ਦੀ ਮਾਂ ਗੋਗਲ ਦੇਵੀ ਖੇਤਾਂ ਵਿੱਚ ਨਰਮਾ ਚੁਗਣ ਲਈ ਗਈਆਂ ਸਨ। ਮੁਲਜ਼ਮ ਉਨ੍ਹਾਂ ਦੀ ਭਾਲ ਕਰਦੇ ਹੋਏ ਉਥੇ ਪਹੁੰਚ ਗਏ। ਉਥੇ ਪ੍ਰਿਅੰਕਾ ਨਾਲ ਕੁੱਟਮਾਰ ਕੀਤੀ ਗਈ। ਉਸ ਨੇ ਪਿਸਤੌਲ ਦਿਖਾ ਕੇ ਪ੍ਰਿਅੰਕਾ ਨੂੰ ਧਮਕੀ ਦਿੱਤੀ ਕਿ ਜੇਕਰ ਉਹ ਨਾਲ ਨਾ ਗਈ ਤਾਂ ਉਹ ਉਸ ਨੂੰ ਗੋਲੀ ਮਾਰ ਦੇਵੇਗਾ।

ਇਸ ਦੌਰਾਨ ਉਥੇ ਗੋਲੀਆਂ ਚਲਾਈਆਂ ਗਈਆਂ। ਇਸ ਤੋਂ ਬਾਅਦ ਪ੍ਰਿਅੰਕਾ ਉਥੋਂ ਭੱਜ ਕੇ ਖੇਤਾਂ ’ਚ ਲੁਕ ਗਈ ਅਤੇ ਆਪਣੀ ਜਾਨ ਬਚਾਈ। ਮੁਲਜ਼ਮ ਗੋਲੀਆਂ ਚਲਾਉਂਦੇ ਹੋਏ ਉਥੋਂ ਫਰਾਰ ਹੋ ਗਏ।