ਉਤਰੀ ਕੋਰੀਆ ਵਿਚ ਵੜਨ ਵਾਲਾ ਸੈਨਿਕ ਹੁਣ ਅਮਰੀਕੀ ਹਿਰਾਸਤ ਵਿਚ

ਵਾਸ਼ਿੰਗਟਨ, 28 ਸਤੰਬਰ, ਹ.ਬ. : ਸਰਹੱਦ ਪਾਰ ਕਰਕੇ ਉੱਤਰੀ ਕੋਰੀਆ ਵਿੱਚ ਦਾਖ਼ਲ ਹੋਏ ਅਮਰੀਕੀ ਫ਼ੌਜੀ ਨੂੰ ਵਾਪਸ ਅਮਰੀਕਾ ਭੇਜ ਦਿੱਤਾ ਗਿਆ ਹੈ। ਉਹ ਹੁਣ ਅਮਰੀਕਾ ਦੀ ਹਿਰਾਸਤ ਵਿੱਚ ਹੈ।

ਉਤਰੀ ਕੋਰੀਆਈ ਮੀਡੀਆ ਕੇਸੀਐਨਏ ਮੁਤਾਬਕ ਉੱਤਰੀ ਕੋਰੀਆ ਨੇ ਟ੍ਰੈਵਿਸ ਕਿੰਗ ਨਾਂ ਦੇ ਫ਼ੌਜੀ ਤੋਂ ਪੁੱਛ-ਪੜਤਾਲ ਕਰਕੇ ਉਸ ਨੂੰ ਅਮਰੀਕੀ ਹਿਰਾਸਤ ਵਿੱਚ ਭੇਜ ਦਿੱਤਾ ਹੈ।

ਦੱਖਣੀ ਕੋਰੀਆ ’ਚ ਤਾਇਨਾਤ ਅਮਰੀਕੀ ਫੌਜੀ ਟ੍ਰੈਵਿਸ ਕਿੰਗ 18 ਜੁਲਾਈ ਨੂੰ ਸਰਹੱਦ ਪਾਰ ਕਰਕੇ ਉੱਤਰੀ ਕੋਰੀਆ ਗਿਆ ਸੀ। ਇੱਥੇ ਉਸ ਨੂੰ ਤਾਨਾਸ਼ਾਹ ਕਿਮ ਜੋਂਗ ਉਨ ਦੇ ਅਧਿਕਾਰੀਆਂ ਨੇ ਹਿਰਾਸਤ ਵਿੱਚ ਲੈ ਲਿਆ।

ਟ੍ਰੈਵਿਸ ਦੇ ਸਰਹੱਦ ਪਾਰ ਕਰਨ ਦੇ ਕਰੀਬ ਇੱਕ ਮਹੀਨੇ ਬਾਅਦ ਉੱਤਰੀ ਕੋਰੀਆ ਨੇ ਕਿਹਾ- ਜਾਂਚ ਦੌਰਾਨ ਟ੍ਰੈਵਿਸ ਨੇ ਦੱਸਿਆ ਕਿ ਉਹ ਜਾਣਬੁੱਝ ਕੇ ਉੱਥੇ ਆਇਆ ਸੀ ਕਿਉਂਕਿ ਅਮਰੀਕੀ ਫੌਜ ਵਿੱਚ ਉਸ ਦੇ ਖਿਲਾਫ ਰੰਗਭੇਦ ਸੀ।

ਟ੍ਰੈਵਿਸ ਕਿੰਗ ਨੇ ਅਫਸਰਾਂ ਨੂੰ ਕਿਹਾ ਸੀ - ਮੇਰੇ ਨਾਲ ਹੋਰ ਫੌਜੀ ਅਫਸਰਾਂ ਦੁਆਰਾ ਅਣਮਨੁੱਖੀ ਵਿਵਹਾਰ ਅਤੇ ਨਸਲੀ ਵਿਤਕਰਾ ਕੀਤਾ ਗਿਆ ਸੀ। ਇਸ ਤੋਂ ਪਰੇਸ਼ਾਨ ਹੋ ਕੇ ਮੈਂ ਤੀਜੀ ਦੁਨੀਆਂ ਦੇ ਦੇਸ਼ ਵਿੱਚ ਰਹਿਣ ਦਾ ਫੈਸਲਾ ਕੀਤਾ।

ਬੀਬੀਸੀ ਦੇ ਅਨੁਸਾਰ, ਟ੍ਰੈਵਿਸ ਨੇ ਹਮਲੇ ਦੇ ਦੋਸ਼ ਵਿੱਚ ਦੱਖਣੀ ਕੋਰੀਆ ਵਿੱਚ 2 ਮਹੀਨੇ ਜੇਲ੍ਹ ਵਿੱਚ ਵੀ ਬਿਤਾਏ ਸਨ। ਉਸ ਨੂੰ ਜਲਦੀ ਹੀ ਵਾਪਸ ਅਮਰੀਕਾ ਭੇਜਿਆ ਜਾਣਾ ਸੀ।

ਬੀਬੀਸੀ ਦੀ ਰਿਪੋਰਟ ਵਿੱਚ ਦੱਸਿਆ ਗਿਆ ਹੈ ਕਿ ਟ੍ਰੈਵਿਸ ਕਿੰਗ ਨੇ ਸਤੰਬਰ ਵਿੱਚ ਇੱਕ ਨਾਈਟ ਕਲੱਬ ਵਿੱਚ ਇੱਕ ਨੌਜਵਾਨ ਦੀ ਕੁੱਟਮਾਰ ਕੀਤੀ ਸੀ। ਉਸ ਨੇ ਪੁਲਸ ਦੀ ਕਾਰ ਦੀ ਭੰਨਤੋੜ ਕੀਤੀ ਅਤੇ ਉਨ੍ਹਾਂ ਖ਼ਿਲਾਫ਼ ਅਸ਼ਲੀਲ ਸ਼ਬਦਾਂ ਦੀ ਵਰਤੋਂ ਕੀਤੀ। ਇਸ ਮਾਮਲੇ ’ਚ ਉਸ ’ਤੇ 3,950 ਡਾਲਰ ਯਾਨੀ 3 ਲੱਖ ਰੁਪਏ ਦਾ ਜੁਰਮਾਨਾ ਲਗਾਇਆ ਗਿਆ ਹੈ। ਦੋ ਮਹੀਨੇ ਦੀ ਕੈਦ ਤੋਂ ਬਾਅਦ 10 ਜੁਲਾਈ ਨੂੰ ਉਸ ਨੂੰ ਰਿਹਾਅ ਕਰ ਦਿੱਤਾ ਗਿਆ। ਟ੍ਰੈਵਿਸ ਨੂੰ ਵੀ ਫੌਜੀ ਨਿਗਰਾਨੀ ਹੇਠ ਰੱਖਿਆ ਗਿਆ ਸੀ।

ਰਿਪੋਰਟਾਂ ਮੁਤਾਬਕ ਜਦੋਂ ਉਸ ਨੂੰ ਵਾਪਸ ਅਮਰੀਕਾ ਭੇਜਣ ਲਈ ਹਵਾਈ ਅੱਡੇ ’ਤੇ ਲਿਜਾਇਆ ਗਿਆ ਤਾਂ ਉਸ ਨੇ ਕਿਹਾ ਕਿ ਉਸ ਦਾ ਪਾਸਪੋਰਟ ਗੁੰਮ ਹੋ ਗਿਆ ਹੈ। ਇਸ ਤੋਂ ਬਾਅਦ ਉਹ ਉਸ ਟੀਮ ਵਿਚ ਸ਼ਾਮਲ ਹੋ ਗਿਆ ਜੋ ਦੱਖਣੀ ਕੋਰੀਆ ਅਤੇ ਉੱਤਰੀ ਕੋਰੀਆ ਦੀਆਂ ਸਰਹੱਦਾਂ ਦਾ ਦੌਰਾ ਕਰਨ ਜਾ ਰਹੀ ਸੀ।

1950 ਤੋਂ 1953 ਤੱਕ ਇਕ-ਦੂਜੇ ਦੇ ਖਿਲਾਫ ਜੰਗ ਲੜਨ ਵਾਲੇ ਅਮਰੀਕਾ ਅਤੇ ਉੱਤਰੀ ਕੋਰੀਆ ਦੇ ਸਬੰਧ ਚੰਗੇ ਨਹੀਂ ਹਨ। ਅਮਰੀਕਾ ਨੇ ਉੱਤਰੀ ਕੋਰੀਆ ’ਤੇ ਕਈ ਤਰ੍ਹਾਂ ਦੀਆਂ ਪਾਬੰਦੀਆਂ ਲਗਾਈਆਂ ਹਨ। ਅਜਿਹੇ ’ਚ ਕਿਸੇ ਅਮਰੀਕੀ ਫੌਜੀ ਲਈ ਸਰਹੱਦ ਪਾਰ ਕਰਕੇ ਉੱਤਰੀ ਕੋਰੀਆ ਜਾਣਾ ਵੱਡੀ ਘਟਨਾ ਹੈ। ਹਾਲਾਂਕਿ ਇਹ ਪਹਿਲੀ ਵਾਰ ਨਹੀਂ ਹੈ ਜਦੋਂ ਕੋਈ ਅਮਰੀਕੀ ਭੱਜ ਕੇ ਉੱਤਰੀ ਕੋਰੀਆ ਗਿਆ ਹੋਵੇ।

1965 ਵਿੱਚ, ਅਮਰੀਕੀ ਸਾਰਜੈਂਟ ਚਾਰਲਸ ਰਾਬਰਟ ਜੇਨਕਿੰਸ ਵੀਅਤਨਾਮ ਯੁੱਧ ਵਿੱਚ ਹਿੱਸਾ ਲੈਣ ਤੋਂ ਬਚਣ ਲਈ ਉੱਤਰੀ ਕੋਰੀਆ ਭੱਜ ਗਿਆ। ਇਸ ਤੋਂ ਬਾਅਦ ਉਸ ਨੂੰ 39 ਸਾਲਾਂ ਬਾਅਦ 2004 ਵਿੱਚ ਉੱਤਰੀ ਕੋਰੀਆ ਤੋਂ ਵਾਪਸ ਆਉਣ ਦੀ ਇਜਾਜ਼ਤ ਦਿੱਤੀ ਗਈ ਸੀ। ਜਾਪਾਨ ਪਰਤਣ ਤੋਂ ਬਾਅਦ ਉਸਨੇ ਦੱਸਿਆ ਕਿ ਉਸਨੇ ਉੱਤਰੀ ਕੋਰੀਆ ਦੇ ਸੈਨਿਕਾਂ ਨੂੰ ਅੰਗਰੇਜ਼ੀ ਸਿਖਾਈ ਸੀ।