ਭਰੀ ਪ੍ਰੈਸ ਕਾਨਫਰੰਸ ਵਿਚ ਬੇਸੁਧ ਹੋਈ ਮੌਂਟਰੀਅਲ ਦੀ ਮੇਅਰ

ਮੌਂਟਰੀਅਲ, 6 ਦਸੰਬਰ (ਵਿਸ਼ੇਸ਼ ਪ੍ਰਤੀਨਿਧ) : ਮੌਂਟਰੀਅਲ ਦੀ ਮੇਅਰ ਵੈਲਰੀ ਪਲੈਂਟ ਦੀਆਂ ਅੱਖਾਂ ਅੱਗੇ ਅਚਾਨਕ ਹਨੇਰਾ ਆ ਗਿਆ ਅਤੇ ਪ੍ਰੈਸ ਕਾਨਫਰੰਸ ਦੌਰਾਨ ਉਹ ਜ਼ਮੀਨ ’ਤੇ ਹੀ ਬੈਠਣ ਲਈ ਮਜਬੂਰ ਹੋ ਗਈ। ਤਕਰੀਬਨ ਪੰਜ ਮਿੰਟ ਤੱਕ ਮੇਅਰ ਉਸੇ ਹਾਲਤ ਵਿਚ ਰਹੀ ਜਿਸ ਮਗਰੋਂ ਉਨ੍ਹਾਂ ਨੂੰ ਹਸਪਤਾਲ ਲਿਜਾਇਆ ਗਿਆ। ਕੁਝ ਰਿਪੋਰਟਾਂ ਮੁਤਾਬਕ ਵੈਲਰੀ ਨੂੰ ਹਸਪਤਾਲ ਨਹੀਂ ਲਿਜਾਇਆ ਗਿਆ ਅਤੇ ਮੇਅਰ ਦੀ ਪ੍ਰੈਸ ਸਕੱਤਰ ਨੇ ਦੱਸਿਆ ਕਿ ਪੈਰਾਮੈਡਿਕਸ ਵੱਲੋਂ ਮੌਕੇ ’ਤੇ ਦਿਤੀ ਮੈਡੀਕਲ ਸਹਾਇਤਾ ਨਾਲ ਸਿਹਤ ਵਿਚ ਸੁਧਾਰ ਹੋ ਗਿਆ।

ਪੈਰਾਮੈਡਿਕਸ ਨੇ ਮੌਕੇ ’ਤੇ ਪੁੱਜ ਕੇ ਵੈਲਰੀ ਪਲੈਂਟ ਨੂੰ ਸੰਭਾਲਿਆ

ਵੈਲਰੀ ਪਲੈਂਟ ਬੇਘਰ ਲੋਕਾਂ ਦੀ ਸਮੱਸਿਆ ਬਾਰੇ ਪੱਤਰਕਾਰ ਵੱਲੋਂ ਪੁੱਤੇ ਸਵਾਲ ਦਾ ਜਵਾਬ ਦੇ ਰਹੇ ਸਨ ਜਦੋਂ ਉਨ੍ਹਾਂ ਅਚਾਨਕ ਅੱਖਾਂ ਅੱਗੇ ਹਨੇਰਾ ਜਿਹਾ ਮਹਿਸੂਸ ਹੋਣ ਲੱਗਾ। ਮੂੰਹ ਵਿਚੋਂ ਕੋਈ ਆਵਾਜ਼ ਨਾ ਨਿਕਲੀ ਅਤੇ ਉਹ ਡਾਇਸ ਦੇ ਨੇੜੇ ਹੀ ਧਰਤੀ ’ਤੇ ਬੈਠ ਗਏ। ਸਟਾਫ ਉਨ੍ਹਾਂ ਦੀ ਮਦਦ ਵਾਸਤੇ ਪੁੱਜ ਗਿਆ ਅਤੇ ਐਂਬੁਲੈਂਸ ਸੱਦੀ ਗਈ।