ਸਰਕਾਰ ਵਿਚ ਨਕਲੀ ਮੁੱਖ ਸਕੱਤਰ ਬਣ ਕੇ ਵੰਡਦੇ ਰਹੇ ਜਾਅਲੀ ਵੀਜ਼ੇ

ਚੰਡੀਗੜ੍ਹ : ਹਰਿਆਣਾ ਦੇ ਫਰਜ਼ੀ ਮੁੱਖ ਸਕੱਤਰ ਸਰਬਜੀਤ ਸਿੰਘ ਸੰਧੂ ਦੀਆਂ ਸ਼ਾਹੀ ਅੰਦਾਜ਼ ਦੀਆਂ ਤਸਵੀਰਾਂ ਸਾਹਮਣੇ ਆਈਆਂ ਹਨ। ਇਨ੍ਹਾਂ 'ਚ ਉਹ ਸਾਬਕਾ ਫੌਜੀਆਂ ਨਾਲ ਬੰਦੂਕਧਾਰੀ ਦੇ ਕੱਪੜੇ ਪਹਿਨੇ ਨਜ਼ਰ ਆ ਰਹੇ ਹਨ। ਇਹ ਤਸਵੀਰ ਹਿੱਲ ਸਟੇਸ਼ਨ ਦੀ ਹੈ। ਜਿਸ ਵਿੱਚ ਉਨ੍ਹਾਂ ਨੇ ਸਾਬਕਾ ਸੈਨਿਕਾਂ ਨੂੰ ਪੁਲਿਸ ਕਮਾਂਡੋ ਵਰਗੀ ਵਰਦੀ ਪਹਿਨਾਈ ਹੈ।

ਇੱਕ ਹੋਰ ਫੋਟੋ ਵਿੱਚ ਉਹ ਮੁਸਕਰਾਉਂਦੇ ਹੋਏ ਲੋਕਾਂ ਨੂੰ ਫਰਜ਼ੀ ਵੀਜ਼ਾ ਦਿੰਦੇ ਨਜ਼ਰ ਆ ਰਹੇ ਹਨ। ਪੁਲੀਸ ਜਾਂਚ ਵਿੱਚ ਸਾਹਮਣੇ ਆਇਆ ਕਿ ਉਸ ਨੇ ਆਪਣੇ ਦਫ਼ਤਰ ਵਿੱਚ 70 ਲੱਖ ਰੁਪਏ ਦਾ ਫਰਨੀਚਰ ਲਾਇਆ ਹੋਇਆ ਸੀ। ਇਸ ਤੋਂ ਇਲਾਵਾ 61 ਬੈਂਕ ਖਾਤੇ ਖੋਲ੍ਹੇ ਗਏ। ਜਿਸ ਰਾਹੀਂ ਉਸ ਨੇ ਜਾਅਲੀ ਵੀਜ਼ੇ ਦੇ ਕੇ ਲੋਕਾਂ ਨਾਲ 35 ਕਰੋੜ ਰੁਪਏ ਦੀ ਠੱਗੀ ਮਾਰੀ ਹੈ। ਇਸ ਮੁਲਜ਼ਮ ਨੂੰ ਮੁਹਾਲੀ ਪੁਲੀਸ ਨੇ ਕੱਲ੍ਹ ਗ੍ਰਿਫ਼ਤਾਰ ਕੀਤਾ ਸੀ।

ਸਰਬਜੀਤ ਸੰਧੂ ਪੰਜਾਬ ਦੇ ਅੰਮ੍ਰਿਤਸਰ ਦੇ ਘਰਿੰਡਾ ਥਾਣੇ ਅਧੀਨ ਪੈਂਦੇ ਪਿੰਡ ਅਚਿੰਤ ਕੋਟ ਦਾ ਰਹਿਣ ਵਾਲਾ ਹੈ। ਹਾਲਾਂਕਿ ਉਸ ਨੇ ਰਾਜਪੁਰਾ, ਪਟਿਆਲਾ ਦੇ ਫਰਜ਼ੀ ਪਤੇ ਤੋਂ ਬਣਿਆ ਅਸਲਾ ਲਾਇਸੈਂਸ ਲਿਆ ਸੀ। ਸੰਧੂ ਦੀ ਉਮਰ 28 ਸਾਲ ਹੈ ਅਤੇ ਬੀਏ ਨਾਲ ਬਿਜ਼ਨਸ ਮੈਨੇਜਮੈਂਟ ਦੀ ਪੜ੍ਹਾਈ ਕੀਤੀ ਹੈ। ਉਸ ਖ਼ਿਲਾਫ਼ ਅੰਮ੍ਰਿਤਸਰ, ਸੰਗਰੂਰ ਅਤੇ ਗੁਰਦਾਸਪੁਰ ਵਿੱਚ ਧੋਖਾਧੜੀ ਦੇ 5 ਕੇਸ ਦਰਜ ਹਨ। ਉਸ ਨੇ ਮੁਹਾਲੀ ਵਿੱਚ ਦੋ ਥਾਵਾਂ ’ਤੇ ਆਪਣੇ ਦਫ਼ਤਰ ਖੋਲ੍ਹੇ ਹੋਏ ਸਨ। ਜਿਨ੍ਹਾਂ ਵਿੱਚੋਂ ਇੱਕ ਮੁਹਾਲੀ ਦੇ ਸੈਕਟਰ 82 ਵਿੱਚ ਅਤੇ ਦੂਜਾ ਡੇਰਾਬੱਸੀ ਵਿੱਚ ਖੋਲ੍ਹਿਆ ਗਿਆ ਸੀ। ਹਾਲਾਂਕਿ ਪੁਲਿਸ ਨੇ ਹੁਣ ਦੋਵੇਂ ਦਫ਼ਤਰਾਂ ਨੂੰ ਸੀਲ ਕਰ ਦਿੱਤਾ ਹੈ।

ਸਰਬਜੀਤ ਸੰਧੂ (ਖੱਬੇ) ਮੋਹਾਲੀ ਦੇ ਇੱਕ ਲਗਜ਼ਰੀ ਦਫ਼ਤਰ ਵਿੱਚ ਲੋਕਾਂ ਨੂੰ ਜਾਅਲੀ ਵੀਜ਼ੇ ਵੰਡਦੇ ਰਹੇ। ਜਦੋਂ ਲੋਕ ਫਲਾਈਟ ਦੀਆਂ ਟਿਕਟਾਂ ਅਤੇ ਵੀਜ਼ਾ ਲੈ ਕੇ ਏਅਰਪੋਰਟ ਪਹੁੰਚੇ ਤਾਂ ਉਨ੍ਹਾਂ ਨੂੰ ਉੱਥੇ ਦੇ ਇਮੀਗ੍ਰੇਸ਼ਨ ਅਧਿਕਾਰੀਆਂ ਤੋਂ ਪਤਾ ਲੱਗਾ ਕਿ ਇਹ ਫਰਜ਼ੀ ਹੈ।
ਸੰਧੂ ਦਾ ਜਾਲ ਪੰਜਾਬ ਤੋਂ ਇਲਾਵਾ ਹਰਿਆਣਾ ਅਤੇ ਹਿਮਾਚਲ ਪ੍ਰਦੇਸ਼ ਵਿੱਚ ਫੈਲਿਆ ਹੋਇਆ ਸੀ। ਸੰਧੂ ਖੁਦ ਆਪਣੇ ਦਫਤਰ ਰਾਹੀਂ ਪੰਜਾਬ ਵਿਚ ਸਰਗਰਮ ਸੀ। ਉਸ ਨੇ ਹਿਮਾਚਲ ਪ੍ਰਦੇਸ਼ ਦੇ ਬਿਲਾਸਪੁਰ ਤੋਂ 35 ਸਾਲਾ ਰਾਹੁਲ ਨੂੰ ਨੌਕਰੀ 'ਤੇ ਰੱਖਿਆ ਸੀ। ਜੋ ਸੰਧੂ ਲਈ ਫਰਜ਼ੀ ਵੀਜ਼ਾ ਅਤੇ ਦਿੱਲੀ-ਕਰਨਾਟਕ ਸਮੇਤ ਹੋਰ ਸੂਬਿਆਂ 'ਚ ਫਰਜ਼ੀ ਬੈਂਕ ਖਾਤਿਆਂ ਦਾ ਪ੍ਰਬੰਧ ਕਰਦਾ ਸੀ। ਰਾਹੁਲ ਨੇ MBA ਫਾਈਨਾਂਸ ਦੀ ਡਿਗਰੀ ਕੀਤੀ ਹੋਈ ਹੈ। ਹਰਿਆਣਾ ਵਿਚ ਉਸ ਦਾ ਸਾਥੀ ਰਵੀ ਮਿਸ਼ਰਾ ਸੀ। ਗੁਰੂਗ੍ਰਾਮ ਦਾ ਰਹਿਣ ਵਾਲਾ ਰਵੀ ਮਿਸ਼ਰਾ ਸਾਇੰਸ ਗ੍ਰੈਜੂਏਟ ਹੈ ਅਤੇ ਸੰਧੂ ਦਾ ਫਰਜ਼ੀ ਬੈਂਕ ਖਾਤਾ ਬਣਾਉਣ 'ਚ ਮਦਦ ਕਰਦਾ ਸੀ।