ਗਾਜ਼ਾ ਪੱਟੀ ਵਿਚ ਵੜੇ ਇਜ਼ਰਾਇਲੀ ਸੈਨਿਕ ਦੀ ਮੌਤ

ਯੇਰੂਸ਼ਲਮ, 23 ਅਕਤੂਬਰ, ਨਿਰਮਲ : ਇਜ਼ਰਾਈਲ-ਹਮਾਸ ਜੰਗ ਦਾ ਇਹ 17ਵਾਂ ਦਿਨ ਹੈ। ਪਹਿਲੀ ਵਾਰ ਗਾਜ਼ਾ ਵਿੱਚ ਛਾਪੇਮਾਰੀ ਲਈ ਦਾਖਲ ਹੋਏ ਇਜ਼ਰਾਈਲੀ ਸੈਨਿਕਾਂ ਦੀ ਹਮਾਸ ਦੇ ਲੜਾਕਿਆਂ ਨਾਲ ਝੜਪ ਹੋਈ ਹੈ। ਹਮਾਸ ਨੇ ਉਨ੍ਹਾਂ ਸੈਨਿਕਾਂ ’ਤੇ ਐਂਟੀ-ਟੈਂਕ ਮਿਜ਼ਾਈਲਾਂ ਦਾਗੀਆਂ ਜੋ ਫੜੇ ਗਏ ਇਜ਼ਰਾਈਲੀਆਂ ਦੀ ਭਾਲ ਲਈ ਦਾਖਲ ਹੋਏ ਸਨ।

ਇਸ ਦੌਰਾਨ ਇਕ ਇਜ਼ਰਾਇਲੀ ਫੌਜੀ ਦੀ ਮੌਤ ਹੋ ਗਈ। ਹਮਾਸ ਨੇ ਦਾਅਵਾ ਕੀਤਾ ਹੈ ਕਿ ਗਾਜ਼ਾ ਪੱਟੀ ਵਿੱਚ ਦਾਖਲ ਹੋਏ ਇਜ਼ਰਾਈਲੀ ਸੈਨਿਕ ਆਪਣੇ ਟੈਂਕ ਅਤੇ ਹੋਰ ਫੌਜੀ ਵਾਹਨ ਛੱਡ ਕੇ ਵਾਪਸ ਭੱਜ ਗਏ।

ਇਸ ਦੇ ਨਾਲ ਹੀ ਪਿਛਲੇ 24 ਘੰਟਿਆਂ ’ਚ ਗਾਜ਼ਾ ’ਚ ਇਜ਼ਰਾਇਲੀ ਬੰਬਾਰੀ ’ਚ 400 ਤੋਂ ਜ਼ਿਆਦਾ ਲੋਕਾਂ ਦੀ ਮੌਤ ਹੋ ਗਈ ਹੈ। ਅਲਜਜ਼ੀਰਾ ਮੁਤਾਬਕ ਇਜ਼ਰਾਇਲੀ ਫੌਜ ਨੇ ਰਫਾਹ ਅਤੇ ਜਬਲੀਆ ਕੈਂਪਾਂ ਸਮੇਤ 25 ਥਾਵਾਂ ’ਤੇ ਭਾਰੀ ਬੰਬਾਰੀ ਕੀਤੀ ਹੈ। ਜਬਲੀਆ ਤੋਂ ਹੁਣ ਤੱਕ 30 ਲੋਕਾਂ ਦੀਆਂ ਲਾਸ਼ਾਂ ਬਰਾਮਦ ਕੀਤੀਆਂ ਜਾ ਚੁੱਕੀਆਂ ਹਨ। ਮਰਨ ਵਾਲਿਆਂ ਵਿਚ ਜ਼ਿਆਦਾਤਰ ਔਰਤਾਂ ਅਤੇ ਬੱਚੇ ਹਨ।

ਪ੍ਰਧਾਨ ਮੰਤਰੀ ਬੈਂਜਾਮਿਨ ਨੇਤਨਯਾਹੂ ਨੇ ਐਤਵਾਰ ਨੂੰ ਇਜ਼ਰਾਈਲੀ ਸੈਨਿਕਾਂ ਨਾਲ ਮੁਲਾਕਾਤ ਕੀਤੀ ਜੋ ਲੈਬਨਾਨ ਤੋਂ ਲਗਾਤਾਰ ਹਮਲਿਆਂ ਦਾ ਜਵਾਬ ਦੇ ਰਹੇ ਸਨ। ਉਸ ਨੇ ਸੈਨਿਕਾਂ ਨੂੰ ਕਿਹਾ ਕਿ ਯੁੱਧ ਵਿਚ ਸ਼ਾਮਲ ਹੋਣਾ ਹਿਜ਼ਬੁੱਲਾ ਦੀ ਸਭ ਤੋਂ ਵੱਡੀ ਗਲਤੀ ਹੋਵੇਗੀ।

ਉਸ ਨੇ ਹਿਜ਼ਬੁੱਲਾ ਨੂੰ ਚੇਤਾਵਨੀ ਦਿੰਦੇ ਹੋਏ ਕਿਹਾ ਕਿ ਹਮਲੇ ਜਾਰੀ ਰੱਖਣ ਜਾਂ ਯੁੱਧ ਸ਼ੁਰੂ ਕਰਨ ਨਾਲ ਇਜ਼ਰਾਈਲ ਅਜਿਹੀ ਜਵਾਬੀ ਕਾਰਵਾਈ ਕਰੇਗਾ ਜੋ ਲੇਬਨਾਨ ਵਿੱਚ ਤਬਾਹੀ ਲਿਆ ਸਕਦਾ ਹੈ। ਹਮਾਸ ਨਾਲ ਜੰਗ ਵਿੱਚ ਸ਼ਾਮਲ ਹੋਣਾ ਹਿਜ਼ਬੁੱਲਾ ਦੀ ਸਭ ਤੋਂ ਵੱਡੀ ਗਲਤੀ ਹੋਵੇਗੀ।

ਇਸ ਦੌਰਾਨ ਇਜ਼ਰਾਇਲੀ ਫੌਜ ਨੇ ਕਿਹਾ- ਇਜ਼ਰਾਈਲ ’ਤੇ ਹੁਣ ਤੱਕ 7400 ਰਾਕੇਟ ਨਾਲ ਹਮਲਾ ਕੀਤਾ ਗਿਆ ਹੈ। ਹਾਲਾਂਕਿ, 7 ਅਕਤੂਬਰ ਨੂੰ, ਹਮਾਸ ਨੇ ਦਾਅਵਾ ਕੀਤਾ ਕਿ ਉਸਨੇ ਇੱਕ ਦਿਨ ਵਿੱਚ ਇਜ਼ਰਾਈਲ ’ਤੇ 5,000 ਰਾਕੇਟ ਦਾਗੇ ਹਨ। ਇਸ ਦੇ ਨਾਲ ਹੀ ਯੁੱਧ ’ਚ ਹੁਣ ਤੱਕ 6 ਹਜ਼ਾਰ ਤੋਂ ਵੱਧ ਲੋਕ ਮਾਰੇ ਜਾ ਚੁੱਕੇ ਹਨ।