ਮਿਸ਼ੀਗਨ ਦੇ ਮਕਾਨ ਵਿਚ ਜ਼ੋਰਦਾਰ ਧਮਾਕਾ, 4 ਹਲਾਕ

ਡੈਟਰਾਇਟ, 1 ਜਨਵਰੀ (ਵਿਸ਼ੇਸ਼ ਪ੍ਰਤੀਨਿਧ) : ਮਿਸ਼ੀਗਨ ਦੇ ਇਕ ਮਕਾਨ ਵਿਚ ਜ਼ੋਰਦਾਰ ਧਮਾਕੇ ਕਾਰਨ ਚਾਰ ਜਣਿਆਂ ਦੀ ਮੌਤ ਹੋ ਗਈ ਅਤੇ 2 ਹੋਰ ਜ਼ਖਮੀ ਹੋ ਗਏ। ਡੈਟਰਾਇਟ ਤੋਂ 72 ਕਿਲੋਮੀਟਰ ਪੱਛਮ ਵੱਲ ਸਥਿਤ ਨੌਰਥਫੀਲਡ ਕਸਬੇ ਵਿਚ ਹੋਇਆ ਧਮਾਕਾ ਐਨਾ ਜ਼ਬਰਦਸਤ ਸੀ ਕਿ ਇਸ ਦੀ ਆਵਾਜ਼ ਕਈ ਮੀਲ ਤੱਕ ਸੁਣੀ ਗਈ। ਨੌਰਥਫੀਲਡ ਟਾਊਨਸ਼ਿਪ ਪੁਲਿਸ ਦੇ ਡੇਵਿਡ ਪੌਵਲ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਦੱਸਿਆ ਕਿ ਧਮਾਕਾ ਸ਼ਨਿੱਚਰਵਾਰ ਸ਼ਾਮ ਤਕਰੀਬਨ ਚਾਰ ਵਜੇ ਹੋਇਆ ਅਤੇ ਇਹ ਐਨਾ ਜ਼ੋਰਦਾਰ ਸੀ ਕਿ ਪੂਰੇ ਮਕਾਨ ਦੀ ਪਰਖੱਚੇ ਉਡ ਗਏ। ਪਿਛੇ ਸਿਰਫ ਬੇਸਮੈਂਟ ਬਾਕੀ ਬਚੀ ਹੈ।

ਕਈ ਮੀਲ ਦੂਰ ਤੱਕ ਸੁਣੀ ਗਈ ਧਮਾਕੇ ਦੀ ਆਵਾਜ਼

ਧਮਾਕੇ ਦੀ ਆਵਾਜ਼ 9 ਮੀਲ ਤੱਕ ਸੁਣੀ ਗਈ ਜਦਕਿ ਮਕਾਨ ਦਾ ਮਲਬਾ ਨੇੜੇ ਹਾਈਵੇਅ ਨੂੰ ਵੀ ਟੱਪ ਗਿਆ। ਧਮਾਕੇ ਕਾਰਨ ਆਲੇ ਦੁਆਲੇ ਮਕਾਨਾਂ ਨੂੰ ਨੁਕਸਾਨ ਨਹੀਂ ਪੁੱਜਾ। ਧਮਾਕੇ ਵੇਲੇ ਮਕਾਨ ਵਿਚ ਛੇ ਜਣੇ ਮੌਜੂਦ ਸਨ ਜਿਨ੍ਹਾਂ ਵਿਚੋਂ ਚਾਰ ਦਮ ਤੋੜ ਗਏ। ਦੋ ਜਣਿਆਂ ਨੂੰ ਗੰਭੀਰ ਹਾਲਤ ਵਿਚ ਹਸਪਤਾਲ ਦਾਖਲ ਕਰਵਾਇਆ ਗਿਆ। ਫਿਲਹਾਲ ਧਮਾਕੇ ਦੇ ਕਾਰਨਾਂ ਬਾਰੇ ਪਤਾ ਨਹੀਂ ਲੱਗ ਸਕਿਆ ਅਤੇ ਮਰਨ ਵਾਲਿਆਂ ਦੇ ਆਪਸੀ ਰਿਸ਼ਤੇ ਬਾਰੇ ਵੀ ਕੋਈ ਜਾਣਕਾਰੀ ਨਹੀਂ ਦਿਤੀ ਗਈ।