ਸਚਿਨ ਤੇਂਦੁਲਕਰ ਭਲਕੇ ਮੁੰਬਈ ਹਾਫ ਮੈਰਾਥਨ ਨੂੰ ਹਰੀ ਝੰਡੀ ਦਿਖਾਉਣਗੇ

ਮੁੰਬਈ : ਮਹਾਨ ਕ੍ਰਿਕਟਰ ਸਚਿਨ ਤੇਂਦੁਲਕਰ (Cricket legend Sachin Tendulkar) ਭਲਕੇ ਯਾਨੀ ਐਤਵਾਰ ਨੂੰ ਇੱਥੇ ਮੁੰਬਈ ਹਾਫ ਮੈਰਾਥਨ ਨੂੰ ਹਰੀ ਝੰਡੀ ਦਿਖਾਉਣਗੇ, ਜਿਸ ‘ਚ 6,000 ਤੋਂ ਜ਼ਿਆਦਾ ਔਰਤਾਂ ਸਮੇਤ ਲਗਭਗ 20,000 ਪ੍ਰਤੀਯੋਗੀਆਂ ਦੇ ਹਿੱਸਾ ਲੈਣ ਦੀ ਉਮੀਦ ਹੈ। ਤੇਂਦੁਲਕਰ ਇੱਥੇ ਬਾਂਦਰਾ ਕੁਰਲਾ ਕੰਪਲੈਕਸ ਵਿੱਚ ਸਵੇਰੇ 5 ਵਜੇ ਮੈਰਾਥਨ ਦੀ ਮੁੱਖ ਦੌੜ ਨੂੰ ਹਰੀ ਝੰਡੀ ਦਿਖਾ ਕੇ ਰਵਾਨਾ ਕਰਨਗੇ। ਇਸ ਦੀ 10K ਦੌੜ ਵਿੱਚ 8,000 ਤੋਂ ਵੱਧ ਦੀ ਸਭ ਤੋਂ ਵੱਧ ਰਜਿਸਟ੍ਰੇਸ਼ਨ ਹੈ ਜਦੋਂ ਕਿ 21K (21 ਕਿਲੋਮੀਟਰ) ਹਾਫ ਮੈਰਾਥਨ ਵਿੱਚ 4,000 ਦੌੜਾਕ ਉੱਤਰਣਗੇ ਜਿਸ ਵਿੱਚ ਮਹਾਰਾਸ਼ਟਰ ਤੋਂ ਇਲਾਵਾ ਹੋਰ ਉੱਚ ਅਥਲੀਟ ਹਿੱਸਾ ਲੈਣਗੇ। 5K ਦੌੜ ਵਿੱਚ 5,000 ਦੌੜਾਕ ਅਤੇ 3K ਦੌੜ ਵਿੱਚ 3,000 ਤੋਂ ਵੱਧ ਭਾਗੀਦਾਰ ਹੋਣਗੇ।

ਭਾਰਤੀ ਜਲ ਸੈਨਾ ਦੇ 1500 ਦੌੜਾਕ ਵੀ ਇਸ ਦੌੜ ਵਿੱਚ ਹਿੱਸਾ ਲੈਣਗੇ, ਜਦਕਿ ਆਯੋਜਕਾਂ ਦਾ ਕਹਿਣਾ ਹੈ ਕਿ ਇਸ ਸਾਲ ਮਹਿਲਾ ਪ੍ਰਤੀਯੋਗੀਆਂ ਦੀ ਗਿਣਤੀ ਵਿੱਚ 31 ਫੀਸਦੀ ਵਾਧਾ ਹੋਇਆ ਹੈ। ਤੇਂਦੁਲਕਰ ਨੇ ਇੱਕ ਰੀਲੀਜ਼ ਵਿੱਚ ਕਿਹਾ, ‘ਸਾਡਾ ਉਦੇਸ਼ ਤੰਦਰੁਸਤੀ ਦੇ ਇੱਕ ਸਾਧਨ ਵਜੋਂ ਦੌੜ ਨੂੰ ਉਤਸ਼ਾਹਿਤ ਕਰਨਾ ਅਤੇ ਇਸ ਦ੍ਰਿਸ਼ਟੀ ਨੂੰ ਜੀਵਨ ਵਿੱਚ ਲਿਆਉਣਾ ਹੈ।’ ਇਸ ਸਾਲ ਮੁੰਬਈ ਹਾਫ ਮੈਰਾਥਨ ਲਈ ਰਜਿਸਟ੍ਰੇਸ਼ਨਾਂ ਵਿੱਚ ਮਹੱਤਵਪੂਰਨ ਵਾਧਾ ਦੇਖਣਾ ਉਤਸ਼ਾਹਜਨਕ ਹੈ।