international competitions ਨਾਲੋਂ IPL 'ਚ ਹੁੰਦੀ ਹੈ ਦੁੱਗਣੀ ਕਮਾਈ; ਜਾਣੋ ਪੂਰਾ ਤਨਖ਼ਾਹ ਢਾਂਚਾ

ਨਵੀਂ ਦਿੱਲੀ: 20 ਮਾਰਚ, 2026

ਦੁਨੀਆ ਦੀ ਸਭ ਤੋਂ ਅਮੀਰ ਕ੍ਰਿਕਟ ਲੀਗ 'ਇੰਡੀਅਨ ਪ੍ਰੀਮੀਅਰ ਲੀਗ' (IPL) ਦਾ 19ਵਾਂ ਸੀਜ਼ਨ 28 ਮਾਰਚ ਤੋਂ ਸ਼ੁਰੂ ਹੋਣ ਜਾ ਰਿਹਾ ਹੈ। ਜਿੱਥੇ ਹਰ ਪਾਸੇ ਮਹਿੰਗੇ ਖਿਡਾਰੀਆਂ ਦੀ ਚਰਚਾ ਹੁੰਦੀ ਹੈ, ਉੱਥੇ ਹੀ ਮੈਦਾਨ 'ਤੇ ਨਿਰਪੱਖ ਫੈਸਲੇ ਲੈਣ ਵਾਲੇ ਅੰਪਾਇਰਾਂ ਦੀ ਕਮਾਈ ਵੀ ਕਿਸੇ ਤੋਂ ਘੱਟ ਨਹੀਂ ਹੈ। ਦਰਅਸਲ, ਆਈਪੀਐਲ ਵਿੱਚ ਅੰਪਾਇਰਾਂ ਨੂੰ ਮਿਲਣ ਵਾਲੀ ਫੀਸ ਅੰਤਰਰਾਸ਼ਟਰੀ ਟੀ-20 ਮੈਚਾਂ ਨਾਲੋਂ ਵੀ ਦੁੱਗਣੀ ਤੋਂ ਜ਼ਿਆਦਾ ਹੈ।

ਆਮ ਤੌਰ 'ਤੇ ਆਈਸੀਸੀ ਦੇ ਏਲੀਟ ਪੈਨਲ ਅੰਪਾਇਰਾਂ ਨੂੰ ਇੱਕ ਟੈਸਟ ਮੈਚ ਲਈ 4 ਲੱਖ ਰੁਪਏ, ਇੱਕ ਰੋਜ਼ਾ (ODI) ਲਈ 2.5 ਲੱਖ ਰੁਪਏ ਅਤੇ ਇੱਕ ਅੰਤਰਰਾਸ਼ਟਰੀ ਟੀ-20 ਮੈਚ ਲਈ 1.25 ਲੱਖ ਰੁਪਏ ਦਿੱਤੇ ਜਾਂਦੇ ਹਨ। ਪਰ ਆਈਪੀਐਲ ਦੇ ਮੈਦਾਨੀ ਅੰਪਾਇਰਾਂ ਨੂੰ ਬੀਸੀਸੀਆਈ ਵੱਲੋਂ ਪ੍ਰਤੀ ਮੈਚ ਲਗਭਗ 3 ਲੱਖ ਰੁਪਏ ਦਾ ਭੁਗਤਾਨ ਕੀਤਾ ਜਾਂਦਾ ਹੈ। ਇਸ ਤੋਂ ਇਲਾਵਾ, ਚੌਥੇ ਅੰਪਾਇਰ ਨੂੰ ਵੀ ਪ੍ਰਤੀ ਮੈਚ 2 ਲੱਖ ਰੁਪਏ ਮਿਲਦੇ ਹਨ। ਇੱਕ ਅੰਪਾਇਰ ਪੂਰੇ ਸੀਜ਼ਨ ਦੌਰਾਨ ਲਗਭਗ 15 ਮੈਚਾਂ ਵਿੱਚ ਡਿਊਟੀ ਨਿਭਾਉਂਦਾ ਹੈ, ਜਿਸ ਨਾਲ ਉਹ ਮਹਿਜ਼ ਦੋ ਮਹੀਨਿਆਂ ਵਿੱਚ ਕਰੀਬ 30 ਲੱਖ ਰੁਪਏ ਕਮਾ ਲੈਂਦਾ ਹੈ।

ਘਰੇਲੂ ਕ੍ਰਿਕਟ ਵਿੱਚ ਵੀ ਬੀਸੀਸੀਆਈ ਨੇ ਅੰਪਾਇਰਾਂ ਲਈ ਇੱਕ ਖ਼ਾਸ ਸ਼੍ਰੇਣੀ ਪ੍ਰਣਾਲੀ ਬਣਾਈ ਹੋਈ ਹੈ। ਦਸੰਬਰ 2025 ਦੇ ਅੰਕੜਿਆਂ ਅਨੁਸਾਰ, ਭਾਰਤ ਵਿੱਚ ਕੁੱਲ 186 ਅੰਪਾਇਰ ਹਨ ਜਿਨ੍ਹਾਂ ਨੂੰ ਏ+, ਏ, ਬੀ ਅਤੇ ਸੀ ਗਰੁੱਪਾਂ ਵਿੱਚ ਵੰਡਿਆ ਗਿਆ ਹੈ। ਏ+ ਅਤੇ ਏ ਸ਼੍ਰੇਣੀ ਦੇ ਅੰਪਾਇਰਾਂ ਨੂੰ ਪ੍ਰਤੀ ਦਿਨ 40,000 ਰੁਪਏ ਅਤੇ ਬਾਕੀ ਦੋ ਸ਼੍ਰੇਣੀਆਂ ਨੂੰ 30,000 ਰੁਪਏ ਪ੍ਰਤੀ ਦਿਨ ਮਿਲਦੇ ਹਨ। ਇਹ ਤਨਖ਼ਾਹ ਢਾਂਚਾ ਸਾਲ 2018 ਤੋਂ ਬਾਅਦ ਹੁਣ ਤੱਕ ਸਥਿਰ ਹੈ। ਬੀਸੀਸੀਆਈ ਦੇ ਐਲੀਟ ਅੰਪਾਇਰ ਪੂਰੇ ਘਰੇਲੂ ਸੀਜ਼ਨ ਦੌਰਾਨ 10 ਲੱਖ ਤੋਂ 20 ਲੱਖ ਰੁਪਏ ਤੱਕ ਦੀ ਕਮਾਈ ਕਰ ਲੈਂਦੇ ਹਨ। ਕੁੱਲ ਮਿਲਾ ਕੇ, ਕ੍ਰਿਕਟ ਦਾ ਇਹ ਬਦਲਦਾ ਸਰੂਪ ਹੁਣ ਅੰਪਾਇਰਾਂ ਲਈ ਵੀ ਇੱਕ ਬੇਹੱਦ ਮੁਨਾਫ਼ੇ ਵਾਲਾ ਕਰੀਅਰ ਸਾਬਤ ਹੋ ਰਿਹਾ ਹੈ।