Mohammad Rizwan ਦੀ ਮਾੜੀ ਬੱਲੇਬਾਜ਼ੀ 'ਤੇ ਅਹਿਮਦ ਸ਼ਹਿਜ਼ਾਦ ਨੇ ਲਾਈਆਂ ਝਿੜਕਾਂ

ਨਵੀਂ ਦਿੱਲੀ: 17 ਮਾਰਚ, 2026

ਪਾਕਿਸਤਾਨੀ ਕ੍ਰਿਕਟ ਟੀਮ ਦੀ ਬੰਗਲਾਦੇਸ਼ ਖ਼ਿਲਾਫ਼ ਵਨਡੇ ਲੜੀ ਵਿੱਚ ਹੋਈ 2-1 ਦੀ ਸ਼ਰਮਨਾਕ ਹਾਰ ਤੋਂ ਬਾਅਦ ਸਾਬਕਾ ਕ੍ਰਿਕਟਰ ਅਹਿਮਦ ਸ਼ਹਿਜ਼ਾਦ ਨੇ ਵਿਕਟਕੀਪਰ-ਬੱਲੇਬਾਜ਼ ਮੁਹੰਮਦ ਰਿਜ਼ਵਾਨ ਨੂੰ ਨਿਸ਼ਾਨੇ 'ਤੇ ਲਿਆ ਹੈ। ਟੀ-20 ਵਿਸ਼ਵ ਕੱਪ 2026 ਵਿੱਚ ਮਾੜੇ ਪ੍ਰਦਰਸ਼ਨ ਤੋਂ ਬਾਅਦ ਇਹ ਪਾਕਿਸਤਾਨ ਦੀ ਪਹਿਲੀ ਲੜੀ ਸੀ, ਜਿਸ ਦੇ ਫੈਸਲਾਕੁੰਨ ਮੈਚ ਵਿੱਚ ਰਿਜ਼ਵਾਨ ਫਿਰ ਤੋਂ ਅਸਫਲ ਰਹੇ ਅਤੇ ਟੀਮ 11 ਦੌੜਾਂ ਨਾਲ ਮੈਚ ਹਾਰ ਗਈ।

ਅਹਿਮਦ ਸ਼ਹਿਜ਼ਾਦ ਨੇ ਰਿਜ਼ਵਾਨ ਦੇ ਅਕਸਰ ਦਿੱਤੇ ਜਾਣ ਵਾਲੇ ਬਿਆਨ—"ਅਸੀਂ ਜਾਂ ਤਾਂ ਜਿੱਤਾਂਗੇ ਜਾਂ ਸਿੱਖਾਂਗੇ"—ਤੇ ਤਿੱਖਾ ਤੰਜ ਕੱਸਦਿਆਂ ਕਿਹਾ ਕਿ ਰਿਜ਼ਵਾਨ ਇੰਨੇ ਸਾਲਾਂ ਤੋਂ ਸਿਰਫ਼ ਸਿੱਖ ਹੀ ਰਹੇ ਹਨ, ਪਰ ਮੈਦਾਨ 'ਤੇ ਨਤੀਜੇ ਜ਼ੀਰੋ ਹਨ। ਆਪਣੇ ਯੂਟਿਊਬ ਚੈਨਲ 'ਤੇ ਗੱਲ ਕਰਦਿਆਂ ਸ਼ਹਿਜ਼ਾਦ ਨੇ ਕਿਹਾ, "ਰਿਜ਼ਵਾਨ ਸਰ, ਹੁਣ ਕਹਾਣੀਆਂ ਬਣਾਉਣੀਆਂ ਬੰਦ ਕਰੋ। ਤੁਹਾਨੂੰ ਮੈਦਾਨ 'ਤੇ ਪ੍ਰਦਰਸ਼ਨ ਕਰਨ ਲਈ ਪੈਸੇ ਮਿਲਦੇ ਹਨ। ਤੁਹਾਡੀ ਤਕਨੀਕ ਪੂਰੀ ਤਰ੍ਹਾਂ ਖਤਮ ਹੋ ਚੁੱਕੀ ਹੈ ਅਤੇ ਤੁਸੀਂ ਸਿਰਫ਼ ਲੈੱਗ ਸਾਈਡ ਦੇ ਖਿਡਾਰੀ ਬਣ ਕੇ ਰਹਿ ਗਏ ਹੋ।"

ਸ਼ਹਿਜ਼ਾਦ ਨੇ ਅੱਗੇ ਕਿਹਾ ਕਿ ਟੀ-20 ਵਿਸ਼ਵ ਕੱਪ ਦੀ ਟੀਮ ਵਿੱਚ ਨਾ ਹੋਣ ਕਾਰਨ ਰਿਜ਼ਵਾਨ ਕੋਲ ਆਪਣੀ ਤਕਨੀਕ ਸੁਧਾਰਨ ਲਈ ਕਾਫ਼ੀ ਸਮਾਂ ਸੀ, ਪਰ ਉਹ ਕੁਝ ਵੀ ਨਵਾਂ ਨਹੀਂ ਕਰ ਸਕੇ। ਉਨ੍ਹਾਂ ਆਖਿਆ, "ਤੁਹਾਡੇ ਪੈਰ ਮੈਦਾਨ 'ਤੇ ਨਹੀਂ ਚੱਲ ਰਹੇ, ਤੁਸੀਂ ਪਿੱਚ 'ਤੇ ਨੱਚ ਰਹੇ ਹੋ। ਬੱਲੇ ਅਤੇ ਗੇਂਦ ਵਿੱਚ ਬਹੁਤ ਵੱਡਾ ਪਾੜਾ ਹੈ। ਬੰਗਲਾਦੇਸ਼ ਖ਼ਿਲਾਫ਼ ਸੈਂਕੜਾ ਬਣਾ ਕੇ ਤੁਸੀਂ ਚੋਣਕਾਰਾਂ ਨੂੰ ਜਵਾਬ ਦੇ ਸਕਦੇ ਸੀ, ਪਰ ਤੁਸੀਂ ਸਿਰਫ਼ ਗੱਲਾਂ ਕਰਨ 'ਤੇ ਧਿਆਨ ਦੇ ਰਹੇ ਹੋ। ਜੇਕਰ ਇਹੀ ਹਾਲ ਰਿਹਾ, ਤਾਂ ਤੁਸੀਂ ਸਾਰੀ ਉਮਰ ਸਿੱਖਦੇ ਹੀ ਰਹੋਗੇ।"

ਇਸ ਆਲੋਚਨਾ ਨੇ ਪਾਕਿਸਤਾਨੀ ਕ੍ਰਿਕਟ ਹਲਕਿਆਂ ਵਿੱਚ ਮੁੜ ਬਹਿਸ ਛੇੜ ਦਿੱਤੀ ਹੈ ਕਿ ਕੀ ਸੀਨੀਅਰ ਖਿਡਾਰੀਆਂ ਨੂੰ ਹੁਣ ਨੌਜਵਾਨ ਪ੍ਰਤਿਭਾ ਲਈ ਜਗ੍ਹਾ ਛੱਡ ਦੇਣੀ ਚਾਹੀਦੀ ਹੈ।