ਫਰੀਦਕੋਟ ਦੀ ਸਿਫਤ ਕੌਰ ਨੇ ਰਾਇਫਲ ਸ਼ੂਟਿੰਗ ’ਚ ਗੋਲਡ ’ਤੇ ਲਾਇਆ ਨਿਸ਼ਾਨਾ

ਫਰੀਦਕੋਟ, 27 ਸਤੰਬਰ, ਹ.ਬ. : ਪੰਜਾਬ ਦੇ ਫਰੀਦਕੋਟ ਦੀ 21 ਸਾਲਾ ਸਿਫਤ ਕੌਰ ਸਿਮਰਾ ਨੇ ਏਸ਼ਿਆਈ ਖੇਡ ਮੁਕਾਬਲਿਆਂ ਵਿਚ 50 ਮੀਟਰ 3ਪੀ ਰਾਇਫਲ ਸ਼ੂਟਿੰਗ ਵਿਚ ਗੋਲਡ ਜਿੱਤ ਲਿਆ।

ਇਸ ਤੋਂ ਪਹਿਲਾਂ ਵੀ ਸਿਫਤ ਨੈਸ਼ਨਲ ਪੱਧਰ ’ਤੇ ਕਈ ਮੈਡਲ ਜਿੱਤ ਚੁੱਕੀ ਹੈ। ਧੀ ਦੀ ਜਿੱਤ ਦੀ ਖੁਸ਼ੀ ਵਿਚ ਘਰ ਵਾਲਿਆਂ ਨੇ ਜਸ਼ਨ ਮਨਾਇਆ। ਇਸ ਤੋਂ ਪਹਿਲਾਂ ਭਾਰਤ ਨੇ ਖੇਡਾਂ ਦੇ ਪਹਿਲੇ 3 ਦਿਨਾਂ ਵਿੱਚ 14 ਤਗਮੇ ਜਿੱਤੇ ਹਨ, ਜਿਨ੍ਹਾਂ ਵਿੱਚ 3 ਸੋਨ, 4 ਚਾਂਦੀ ਅਤੇ 7 ਕਾਂਸੀ ਦੇ ਤਗਮੇ ਸ਼ਾਮਲ ਹਨ। ਹੁਣ ਭਾਰਤ ਨੇ ਨਿਸ਼ਾਨੇਬਾਜ਼ੀ ਵਿੱਚ ਚਾਂਦੀ ਦਾ ਤਗ਼ਮਾ ਜਿੱਤਿਆ ਹੈ।

ਭਾਰਤ ਨੇ ਮਹਿਲਾਵਾਂ ਦੇ 50 ਮੀਟਰ ਰਾਈਫਲ 3 ਪੁਜ਼ੀਸ਼ਨ ਟੀਮ ਈਵੈਂਟ ਵਿੱਚ ਚਾਂਦੀ ਦਾ ਤਗ਼ਮਾ ਜਿੱਤਿਆ ਹੈ। ਸਿਫ਼ਟ ਸਮਰਾ, ਆਸ਼ੀ ਚੌਕਸੇ ਅਤੇ ਮਾਨਿਨੀ ਕੌਸ਼ਿਕ ਨੇ ਨਿਸ਼ਾਨੇਬਾਜ਼ੀ ਵਿੱਚ ਦੇਸ਼ ਲਈ ਇੱਕ ਹੋਰ ਤਮਗਾ ਜਿੱਤਿਆ ਹੈ।

ਚੌਥੇ ਦਿਨ ਭਾਰਤ ਦਾ ਇਹ ਪਹਿਲਾ ਤਮਗਾ ਹੈ। ਰੋਹਿਤ ਜਾਧਵ ਵੁਸ਼ੂ ਪੁਰਸ਼ਾਂ ਦੇ ਦਾਓਸ਼ੂ ਫਾਈਨਲ ਵਿੱਚ ਭਾਰਤ ਲਈ ਤਗਮੇ ਦਾ ਦਾਅਵੇਦਾਰ ਸੀ। ਹਾਲਾਂਕਿ, ਉਸਨੇ 9.413 ਦਾ ਸਕੋਰ ਬਣਾਇਆ ਅਤੇ 11 ਖਿਡਾਰੀਆਂ ਦੀ ਸੂਚੀ ਵਿੱਚ 8ਵੇਂ ਸਥਾਨ ’ਤੇ ਰਿਹਾ। ਚੀਨੀ ਖਿਡਾਰੀ ਨੇ ਸੋਨ ਤਗਮਾ ਜਿੱਤਿਆ।