ਕੈਨੇਡਾ ’ਚ ਪੰਜਾਬੀ ਪਿਉ-ਪੁੱਤ ਦੀ ਹੱਤਿਆ ਮਗਰੋਂ ਇਕ ਹੋਰ ਕਤਲ

ਕੈਲਗਰੀ, 14 ਨਵੰਬਰ (ਵਿਸ਼ੇਸ਼ ਪ੍ਰਤੀਨਿਧ) : ਐਡਮਿੰਟਨ ਵਿਖੇ ਦਿਨ-ਦਿਹਾੜੇ ਹਰਪ੍ਰੀਤ ਸਿੰਘ ਉਪਲ ਅਤੇ ਉਸ ਦੇ ਬੇਟੇ ਦੀ ਹੱਤਿਆ ਮਗਰੋਂ ਸੋਮਵਾਰ ਨੂੰ ਕੈਲਗਰੀ ਦੇ ਸ਼ੌਪਿੰਗ ਸੈਂਟਰ ਵਿਚ ਗੋਲੀਆਂ ਚੱਲ ਗਈਆਂ ਜਿਥੇ ਇਕ ਜਣੇ ਦੀ ਮੌਤ ਹੋਣ ਅਤੇ ਦੋ ਜਣਿਆਂ ਦੇ ਜ਼ਖਮੀ ਹੋਣ ਦੀ ਰਿਪੋਰਟ ਹੈ। ਮਰਨ ਵਾਲਿਆਂ ਦੀ ਪਛਾਣ ਫਿਲਹਾਲ ਜਨਤਕ ਨਹੀਂ ਕੀਤੀ ਗਈ ਪਰ ਇਸ ਹੌਲਨਾਕ ਵਾਰਦਾਤ ਕਾਰਨ ਦੁਕਾਨਦਾਰਾਂ ਅਤੇ ਆਮ ਲੋਕਾਂ ਵਿਚ ਸਹਿਮ ਦਾ ਮਾਹੌਲ ਹੈ।

ਕੈਲਗਰੀ ਦੇ ਸ਼ੌਪਿੰਗ ਸੈਂਟਰ ਵਿਚ ਚੱਲੀਆਂ ਗੋਲੀਆਂ, 1 ਹਲਾਕ, 2 ਜ਼ਖਮੀ

ਗਲੋਬਲ ਨਿਊਜ਼ ਦੀ ਰਿਪੋਰਟ ਮੁਤਾਬਕ ਐਮਰਜੰਸੀ ਕਾਮਿਆਂ ਨੂੰ ਸੋਮਵਾਰ ਬਾਅਦ ਦੁਪਹਿਰ ਤਕਰੀਬਨ 2 ਵਜੇ ਮਾਰਲਬ੍ਰੋਅ ਪਾਰਕ ਇਲਾਕੇ ਵਿਚ ਟ੍ਰਾਂਸ ਕੈਨੇਡਾ ਸੈਂਟਰ ਵਿਖੇ ਸੱਦਿਆ ਗਿਆ। ਇਕ ਜਣੇ ਨੂੰ ਮੌਕੇ ’ਤੇ ਮ੍ਰਿਤਕ ਕਰਾਰ ਦੇ ਦਿਤਾ ਗਿਆ ਜਦਕਿ ਦੋ ਹੋਰਨਾਂ ਨੂੰ ਹਸਪਤਾਲ ਲਿਜਾਇਆ ਗਿਆ। ਪੁਲਿਸ ਵੱਲੋਂ ਮਰਨ ਵਾਲੇ ਜਾਂ ਜ਼ਖਮੀ ਲੋਕਾਂ ਦੀ ਉਮਰ ਅਤੇ ਪਛਾਣ ਬਾਰੇ ਕੋਈ ਜਾਣਕਾਰੀ ਸਾਂਝੀ ਨਹੀਂ ਕੀਤੀ ਗਈ ਅਤੇ ਨਾ ਹੀ ਗੋਲੀਆਂ ਚਲਾਉਣ ਵਾਲੇ ਸ਼ੱਕੀ ਅਤੇ ਉਸ ਦੀ ਗੱਡੀ ਬਾਰੇ ਕੋਈ ਵੇਰਵਾ ਦਿਤਾ ਗਿਆ ਹੈ।