ਸੌਦਾ ਲੈ ਰਹੇ ਸਰਪੰਚ ਦੀ ਕਾਰ ਚੋਰੀ

ਜਲਾਲਾਬਾਦ, 7 ਜਨਵਰੀ (ਬਲਜੀਤ ਮੱਲ੍ਹੀ) : ਦਿਨ ਦਿਹਾੜੇ ਚੋਰੀ ਅਤੇ ਲੁੱਟ ਖੋਹ ਦੀਆਂ ਵਾਰਦਾਤਾਂ ਇੰਨੀਆਂ ਜ਼ਿਆਦਾ ਵਧ ਚੁੱਕੀਆਂ ਕਿ ਅਪਰਾਧੀਆਂ ਨੂੰ ਜਿਵੇਂ ਪੁਲਿਸ ਦਾ ਖ਼ੌਫ਼ ਹੀ ਨਾ ਰਿਹਾ ਹੋਵੇ। ਤਾਜ਼ਾ ਮਾਮਲਾ ਜਲਾਲਾਬਾਦ ਤੋਂ ਸਾਹਮਣੇ ਆਇਆ ਏ, ਜਿੱਥੇ ਇਕ ਚੋਰ ਦਿਨ ਦਿਹਾੜੇ ਕਰਿਆਨੇ ਦੀ ਦੁਕਾਨ ’ਤੇ ਸੌਦਾ ਲੈ ਰਹੇ ਸਰਪੰਚ ਦੀ ਕਾਰ ਚੋਰੀ ਕਰਕੇ ਫ਼ਰਾਰ ਹੋ ਗਿਆ, ਜਿਸ ਵਿਚ ਦੋ ਲੱਖ ਰੁਪਏ ਵੀ ਰੱਖੇ ਹੋਏ ਸੀ। ਚੋਰ ਦੀ ਇਹ ਸਾਰੀ ਕਰਤੂਤ ਸੀਸੀਟੀਵੀ ਕੈਮਰੇ ਵਿਚ ਕੈਦ ਹੋ ਗਈ।

ਜਲਾਲਾਬਾਦ ਵਿਖੇ ਗਮਾਨੀ ਵਾਲਾ ਮੋੜ ’ਤੇ ਇਕ ਚੋਰ ਕਾਰ ਲੈ ਕੇ ਫ਼ਰਾਰ ਹੋ ਗਿਆ। ਸਰਪੰਚ ਰਾਜਿੰਦਰ ਚੁੱਘ ਨੇ ਦੱਸਿਆ ਕਿ ਉਹ ਆਪਣੀ ਗੱਡੀ ਖੜ੍ਹੀ ਕਰਕੇ ਕਰਿਆਨੇ ਦੀ ਦੁਕਾਨ ’ਤੇ ਸੌਦਾ ਲੈ ਰਿਹਾ ਸੀ ਅਤੇ ਉਹ ਕਾਊਂਟਰ ’ਤੇ ਚਾਬੀ ਰੱਖ ਕੇ ਦੁਕਾਨ ਵਿਚ ਪਏ ਹੀਟਰ ’ਤੇ ਸੇਕਣ ਲੱਗ ਪਿਆ, ਇੰਨੇ ਨੂੰ ਇਕ ਵਿਅਕਤੀ ਸੌਦਾ ਲੈਣ ਬਹਾਨੇ ਆਇਆ ਅਤੇ ਉਸ ਨੇ ਦੁਕਾਨਦਾਰ ਨੂੰ ਕਈ ਸੌਦੇ ਗਿਣਾ ਦਿੱਤੇ, ਦੁਕਾਨਦਾਰ ਹਾਲੇ ਸੌਦੇ ਹੀ ਤੋਲ ਰਿਹਾ ਸੀ ਕਿ ਚੋਰ ਕਾਊਂਟਰ ਤੋਂ ਕਾਰ ਦੀ ਚਾਬੀ ਲੈ ਕੇ ਕਾਰ ਭਜਾ ਕੇ ਫ਼ਰਾਰ ਹੋ ਗਿਆ। ਸੀਸੀਟੀਵੀ ਤਸਵੀਰਾਂ ਵਿਚ ਚੋਰ ਨੂੰ ਕਾਊਂਟਰ ਤੋਂ ਚਾਬੀ ਚੁੱਕਦਿਆਂ ਅਤੇ ਫਿਰ ਕਾਰ ਲੈਕੇ ਫ਼ਰਾਰ ਹੁੰਦਿਆਂ ਸਾਫ਼ ਦੇਖਿਆ ਜਾ ਸਕਦਾ ਏ।

ਇਸੇ ਤਰ੍ਹਾਂ ਦੁਕਾਨਦਾਰ ਨੇ ਆਖਿਆ ਕਿ ਉਹ ਗਾਹਕ ਦੇ ਕਹਿਣ ਮੁਤਾਬਕ ਸੌਦੇ ਤੋਲ ਰਿਹਾ ਸੀ ਤਾਂ ਇੰਨੇ ਨੂੰ ਚੋਰ ਨੇ ਕਾਊਂਟਰ ਤੋਂ ਚਾਬੀ ਚੁੱਕ ਲਈ ਅਤੇ ਕਾਰ ਲੈਕੇ ਫ਼ਰਾਰ ਹੋ ਗਿਆ।

ਉਧਰ ਜਦੋਂ ਇਸ ਸਬੰਧੀ ਪੁਲਿਸ ਨਾਲ ਗੱਲਬਾਤ ਕੀਤੀ ਗਈ ਤਾਂ ਪੁਲਿਸ ਅਧਿਕਾਰੀ ਨੇ ਆਖਿਆ ਕਿ ਪੁਲਿਸ ਵੱਲੋਂ ਮਾਮਲੇ ਦੀ ਪੜਤਾਲ ਕੀਤੀ ਜਾ ਰਹੀ ਐ ਅਤੇ ਚੋਰ ਦੀ ਭਾਲ ਕੀਤੀ ਜਾ ਰਹੀ ਐ।

ਦੱਸ ਦਈਏ ਕਿ ਇਸ ਘਟਨਾ ਦੇ ਵਾਪਰਨ ਤੋਂ ਬਾਅਦ ਲੋਕਾਂ ਵਿਚ ਦਹਿਸ਼ਤ ਦਾ ਮਾਹੌਲ ਪਾਇਆ ਜਾ ਰਿਹਾ ਏ, ਕੁੱਝ ਲੋਕਾਂ ਦਾ ਕਹਿਣਾ ਏ ਕਿ ਇਹ ਚਿੱਟੇ ਦੇ ਨਸ਼ੇੜੀਆਂ ਦਾ ਕੰਮ ਐ ਜੋ ਆਪਣੀ ਨਸ਼ੇ ਦੀ ਲਤ ਪੂਰੀ ਕਰਨ ਲਈ ਚੋਰੀਆਂ ਅਤੇ ਲੁੱਟਾਂ ਖੋਹਾਂ ਨੂੰ ਅੰਜ਼ਾਮ ਦੇ ਰਹੇ ਨੇ ਪਰ ਦੇਖਣਾ ਹੋਵੇਗਾ ਕਿ ਪੁਲਿਸ ਇਸ ਮਾਮਲੇ ਵਿਚ ਚੋਰ ਨੂੰ ਕਦੋਂ ਤੱਕ ਫੜਨ ਵਿਚ ਕਾਮਯਾਬ ਹੁੰਦੀ ਐ।