ਰੂਸ ਵਲੋਂ ਪਰਮਾਣੂ ਮਿਜ਼ਾਈਲ ਦਾ ਪ੍ਰੀਖਣ

ਮਾਸਕੋ, 6 ਅਕਤੂਬਰ, ਨਿਰਮਲ : ਰੂਸ ਦੇ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਨੇ ਵੀਰਵਾਰ ਨੂੰ ਕਿਹਾ ਕਿ ਰੂਸ ਤਿੰਨ ਦਹਾਕਿਆਂ ਬਾਅਦ ਦੁਬਾਰਾ ਪ੍ਰਮਾਣੂ ਪ੍ਰੀਖਣ ਸ਼ੁਰੂ ਕਰ ਸਕਦਾ ਹੈ ਅਤੇ ਪ੍ਰਮਾਣੂ ਪ੍ਰੀਖਣ ਪਾਬੰਦੀ ਸਮਝੌਤੇ ਤੋਂ ਪਿੱਛੇ ਹਟ ਸਕਦਾ ਹੈ। ਦੁਨੀਆ ਦੀ ਸਭ ਤੋਂ ਵੱਡੀ ਪਰਮਾਣੂ ਸ਼ਕਤੀ ਦੇ ਸਰਵਉੱਚ ਨੇਤਾ ਨੇ ਇਹ ਵੀ ਮੰਨਿਆ ਕਿ ਰੂਸ ਨੇ ਪਰਮਾਣੂ ਸਮਰੱਥਾ ਨਾਲ ਲੈਸ ਬਰੇਵੇਸਟਨਿਕ ਮਿਜ਼ਾਈਲ ਦਾ ਸਫਲ ਪ੍ਰੀਖਣ ਕੀਤਾ ਹੈ ਅਤੇ ਦੁਨੀਆ ਵਿੱਚ ਉਸ ਦੀ ਤਾਕਤ ਦਾ ਕੋਈ ਮੇਲ ਨਹੀਂ ਹੈ। ਹਾਲਾਂਕਿ ਉਸ ਨੇ ਇਹ ਨਹੀਂ ਦੱਸਿਆ ਕਿ ਇਹ ਕਦੋਂ ਟੈਸਟ ਕੀਤਾ ਗਿਆ ਸੀ। ਪੁਤਿਨ ਨੇ ਪੱਛਮੀ ਦੇਸ਼ਾਂ ’ਤੇ ਪ੍ਰਮਾਣੂ ਸਮਝੌਤੇ ਨੂੰ ਭੁੱਲਣ ਦਾ ਦੋਸ਼ ਵੀ ਲਗਾਇਆ।

ਪੁਤਿਨ ਨੇ ਕਿਹਾ ਕਿ ਰੂਸ ਦੀ ਪਰਮਾਣੂ ਨੀਤੀ ਨੂੰ ਫਿਲਹਾਲ ਬਦਲਣ ਦੀ ਕੋਈ ਲੋੜ ਨਹੀਂ ਹੈ ਕਿਉਂਕਿ ਰੂਸ ’ਤੇ ਕੋਈ ਵੀ ਹਮਲਾ ਇਕ ਸਕਿੰਟ ਤੋਂ ਵੀ ਘੱਟ ਸਮੇਂ ’ਚ ਸੈਂਕੜੇ ਪਰਮਾਣੂ ਮਿਜ਼ਾਈਲਾਂ ਨਾਲ ਜਵਾਬੀ ਕਾਰਵਾਈ ਨੂੰ ਸੱਦਾ ਦੇਵੇਗਾ ਅਤੇ ਕੋਈ ਵੀ ਦੁਸ਼ਮਣ ਇਸ ਦਾ ਸਾਹਮਣਾ ਨਹੀਂ ਕਰ ਸਕੇਗਾ। ਉਨ੍ਹਾਂ ਕਿਹਾ, ਕੀ ਸਾਨੂੰ ਇਸ ਨੀਤੀ ਨੂੰ ਬਦਲਣ ਦੀ ਲੋੜ ਹੈ? ਕਿਸੇ ਵੀ ਚੀਜ਼ ਵਿੱਚ ਤਬਦੀਲੀ ਹੋ ਸਕਦੀ ਹੈ ਪਰ ਮੈਨੂੰ ਇਸ ਵਿੱਚ ਤਬਦੀਲੀ ਦੀ ਲੋੜ ਨਹੀਂ ਜਾਪਦੀ। ਪੁਤਿਨ ਨੇ ਇਹ ਵੀ ਕਿਹਾ ਕਿ ਉਨ੍ਹਾਂ ਨੂੰ ਫਿਲਹਾਲ ਰੂਸ ਤੋਂ ਕੋਈ ਖਤਰਾ ਨਜ਼ਰ ਨਹੀਂ ਆ ਰਿਹਾ ਹੈ।

ਪੁਤਿਨ ਨੇ ਕਿਹਾ, ਮੈਂ ਅਜੇ ਇਹ ਕਹਿਣ ਲਈ ਤਿਆਰ ਨਹੀਂ ਹਾਂ ਕਿ ਸਾਨੂੰ ਸੱਚਮੁੱਚ ਟੈਸਟ ਕਰਨ ਦੀ ਜ਼ਰੂਰਤ ਹੈ, ਪਰ ਸਿਧਾਂਤਕ ਤੌਰ ’ਤੇ ਇਹ ਸੰਭਵ ਹੈ ਕਿ ਅਸੀਂ ਅਮਰੀਕਾ ਵਾਂਗ ਵਿਵਹਾਰ ਕਰੀਏ। ਪਰ ਇਹ ਡੂਮਾ, ਰੂਸੀ ਸੰਸਦ ਦੇ ਉਪ ਮੁਖੀਆਂ ਲਈ ਵਿਚਾਰ ਕਰਨ ਵਾਲਾ ਸਵਾਲ ਹੈ। ਇਹ ਸਿਧਾਂਤਕ ਤੌਰ ’ਤੇ ਸੰਭਵ ਹੈ ਕਿ ਅਸੀਂ ਪ੍ਰਮਾਣੂ ਪ੍ਰੀਖਣ ਪਾਬੰਦੀ ਸੰਧੀ ਦੀ ਆਪਣੀ ਪ੍ਰਵਾਨਗੀ ਵਾਪਸ ਲੈ ਸਕਦੇ ਹਾਂ।

ਜਦੋਂ ਪੁਤਿਨ ਪੱਛਮ ਅਤੇ ਅਮਰੀਕਾ ’ਤੇ ਦੋਸ਼ ਲਗਾ ਰਹੇ ਸਨ, ਰੂਸੀ ਮੁਦਰਾ ਰੂਬਲ ਦੀ ਕੀਮਤ ਅਮਰੀਕੀ ਡਾਲਰ ਦੇ ਮੁਕਾਬਲੇ 100 ਤੋਂ ਹੇਠਾਂ ਆ ਗਈ ਸੀ। ਯੂਕਰੇਨ ’ਤੇ ਹਮਲੇ ਤੋਂ ਇਕ ਦਿਨ ਪਹਿਲਾਂ, ਇਕ ਡਾਲਰ ਦੀ ਕੀਮਤ 80 ਰੂਬਲ ਸੀ। ਪੁਤਿਨ ਨੇ ਕਿਹਾ, ਕੋਈ ਵੀ ਸਹੀ ਦਿਮਾਗ ਅਤੇ ਸਪੱਸ਼ਟ ਯਾਦਦਾਸ਼ਤ ਵਾਲਾ ਵਿਅਕਤੀ ਰੂਸ ਦੇ ਖਿਲਾਫ ਪ੍ਰਮਾਣੂ ਹਥਿਆਰਾਂ ਦੀ ਵਰਤੋਂ ਕਰਨ ਬਾਰੇ ਸੋਚ ਵੀ ਨਹੀਂ ਸਕਦਾ।

ਪੁਤਿਨ ਨੇ ਕਿਹਾ, ਰੂਸ ਨੇ ਨਵੀਂ ਪੀੜ੍ਹੀ ਦੀ ਇੰਟਰਕੌਂਟੀਨੈਂਟਲ ਬੈਲਿਸਟਿਕ ਮਿਜ਼ਾਈਲਾਂ ’ਤੇ ਆਪਣਾ ਕੰਮ ਲਗਭਗ ਪੂਰਾ ਕਰ ਲਿਆ ਹੈ। ਇਹ ਮਿਜ਼ਾਈਲਾਂ 10 ਜਾਂ ਇਸ ਤੋਂ ਵੱਧ ਪ੍ਰਮਾਣੂ ਹਥਿਆਰ ਲਿਜਾ ਸਕਦੀਆਂ ਹਨ। ਇਸ ਸਾਲ ਫਰਵਰੀ ਵਿੱਚ, ਪੁਤਿਨ ਨੇ ਨਿਊ ਸਟਾਰਟ ਸੰਧੀ ਵਿੱਚ ਭਾਗੀਦਾਰੀ ਨੂੰ ਮੁਅੱਤਲ ਕਰ ਦਿੱਤਾ ਸੀ। ਅਮਰੀਕਾ ਨਾਲ ਇਹ ਸੰਧੀ ਦੋਵਾਂ ਪਾਸਿਆਂ ਦੁਆਰਾ ਪ੍ਰਮਾਣੂ ਮਿਜ਼ਾਈਲਾਂ ਦੀ ਤਾਇਨਾਤੀ ਦੀ ਗਿਣਤੀ ਨਿਰਧਾਰਤ ਕਰਦੀ ਹੈ।