ਰੂਸ ਨੇ ਯੂਕਰੇਨ 'ਤੇ ਤਿੰਨ ਘੰਟੇ ਡਰੋਨਾਂ ਨਾਲ ਕੀਤਾ ਹਮਲਾ

ਮਾਸਕੋ : ਰੂਸੀ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਅਤੇ ਉਨ੍ਹਾਂ ਦੇ ਤੁਰਕੀ ਹਮਰੁਤਬਾ ਰੇਸੇਪ ਤੈਯਪ ਏਰਦੋਆਨ ਵਿਚਕਾਰ ਅਨਾਜ ਵਾਰਤਾ ਤੋਂ ਇੱਕ ਦਿਨ ਪਹਿਲਾਂ, ਮਾਸਕੋ ਨੇ ਯੂਕਰੇਨ ਦੇ ਓਡੇਸਾ ਖੇਤਰ ਵਿੱਚ ਤੱਟੀ ਬੁਨਿਆਦੀ ਢਾਂਚੇ 'ਤੇ ਸਾਢੇ ਤਿੰਨ ਘੰਟੇ ਡਰੋਨ ਹਮਲਾ ਕੀਤਾ। ਇਸ ਕਾਰਨ ਦੋ ਵਿਅਕਤੀ ਜ਼ਖ਼ਮੀ ਹੋ ਗਏ।

ਅਸਲ ਵਿਚ ਬਹਾਲੀ ਲਈ ਗੱਲਬਾਤ ਹੋ ਰਹੀ ਹੈ, ਜੋ ਜੁਲਾਈ ਵਿੱਚ ਟੁੱਟ ਗਈ ਸੀ। ਇਸ ਤੋਂ ਬਾਅਦ ਕਾਲੇ ਸਾਗਰ ਰਾਹੀਂ ਯੂਕਰੇਨ ਤੋਂ ਅਨਾਜ ਦੀ ਬਰਾਮਦ ਪ੍ਰਭਾਵਿਤ ਹੋਈ ਹੈ। ਯੂਕਰੇਨੀ ਹਵਾਈ ਸੈਨਾ ਨੇ ਇੱਕ ਟੈਲੀਗ੍ਰਾਮ ਪੋਸਟ ਵਿੱਚ ਕਿਹਾ, "ਰੂਸੀ ਬਲਾਂ ਨੇ ਐਤਵਾਰ ਤੜਕੇ ਡੇਨਿਊਬ ਨਦੀ ਦੇ ਖੇਤਰ ਵਿੱਚ ਭਾਰੀ ਹਮਲੇ ਕੀਤੇ।"

ਯੂਕਰੇਨ ਦੇ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੇਲੇਨਸਕੀ ਦੇ ਚੀਫ਼ ਆਫ਼ ਸਟਾਫ਼ ਐਂਡਰੀ ਯਰਮਾਕ ਨੇ ਇਸ ਨੂੰ ਦੁਨੀਆ ਵਿੱਚ ਭੁੱਖਮਰੀ ਅਤੇ ਅਨਾਜ ਸੰਕਟ ਪੈਦਾ ਕਰਨ ਦੀ ਇੱਕ ਚਾਲ ਦੱਸਿਆ ਹੈ।