ਲਾਡੋਵਾਲ ਫਲਾਈਓਵਰ ’ਤੇ ਪਲਟੀ ਕਾਰ, ਇੱਕ ਮੌਤ

ਲੁਧਿਆਣਾ, 4 ਅਕਤੂਬਰ, ਹ.ਬ. : ਲੁਧਿਆਣਾ ’ਚ ਲਾਡੋਵਾਲ ਫਲਾਈਓਵਰ ’ਤੇ ਇੱਕ ਆਲਟੋ ਕਾਰ ਖੰਭੇ ਨਾਲ ਟਕਰਾ ਕੇ ਪਲਟ ਗਈ। ਇਸ ਹਾਦਸੇ ਵਿੱਚ ਇੱਕ ਨੌਜਵਾਨ ਦੀ ਮੌਤ ਹੋ ਗਈ ਜਦਕਿ ਦੋ ਗੰਭੀਰ ਜ਼ਖ਼ਮੀ ਹੋ ਗਏ। ਹਾਦਸੇ ਵਿੱਚ ਮਰਨ ਵਾਲੇ ਨੌਜਵਾਨ ਦੀ ਪਛਾਣ ਭਰਤ ਵਾਸੀ ਘੁਮਾਰ ਮੰਡੀ, ਲੁਧਿਆਣਾ ਵਜੋਂ ਹੋਈ ਹੈ। ਜ਼ਖ਼ਮੀ ਨੌਜਵਾਨਾਂ ਵਿੱਚ ਫਗਵਾੜਾ ਦਾ ਰਹਿਣ ਵਾਲਾ ਮਨੀ ਅਤੇ ਜਲੰਧਰ ਦਾ ਰਹਿਣ ਵਾਲਾ ਮੁਕੇਸ਼ ਸ਼ਾਮਲ ਹੈ। ਤਿੰਨੇ ਦੋਸਤ ਸਵੇਰੇ ਕਾਰ ਵਿੱਚ ਜਲੰਧਰ ਵੱਲ ਜਾ ਰਹੇ ਸਨ।

ਚਸ਼ਮਦੀਦਾਂ ਨੇ ਦੱਸਿਆ ਕਿ ਕਾਰ ਤੇਜ਼ ਰਫਤਾਰ ’ਤੇ ਸੀ ਅਤੇ ਉਸ ’ਤੇ ਕੰਟਰੋਲ ਨਹੀਂ ਸੀ। ਇਸ ਤੋਂ ਬਾਅਦ ਉਹ ਪੁਲ ’ਤੇ ਖੰਭੇ ਨਾਲ ਟਕਰਾ ਕੇ ਪਲਟ ਗਈ। ਪੁਲ ਤੋਂ ਲੰਘ ਰਹੇ ਲੋਕ ਉਥੇ ਇਕੱਠੇ ਹੋ ਗਏ ਅਤੇ ਕਾਫੀ ਮੁਸ਼ੱਕਤ ਤੋਂ ਬਾਅਦ ਤਿੰਨਾਂ ਨੂੰ ਕਾਰ ’ਚੋਂ ਬਾਹਰ ਕੱਢਿਆ ਅਤੇ ਮੌਕੇ ’ਤੇ ਐਂਬੂਲੈਂਸ ਬੁਲਾ ਕੇ ਸਿਵਲ ਹਸਪਤਾਲ ਫਿਲੌਰ ਪਹੁੰਚਾਇਆ। ਫਿਲੌਰ ਦੇ ਹਸਪਤਾਲ ਵਿੱਚ ਇਲਾਜ ਦੌਰਾਨ ਭਰਤ ਦੀ ਮੌਤ ਹੋ ਗਈ।

ਪੁਲਸ ਅਧਿਕਾਰੀਆਂ ਨੇ ਦੱਸਿਆ ਕਿ ਕਾਰ ਤੇਜ਼ ਰਫਤਾਰ ’ਚ ਸੀ। ਸਵੇਰੇ, ਵਾਹਨ ਪੁਲ ’ਤੇ ਇਸ਼ਤਿਹਾਰ ਲਗਾਉਣ ਲਈ ਲਗਾਏ ਗਏ ਖੰਭੇ ਦੇ ਸੀਮਿੰਟ ਦੇ ਅਧਾਰ ਨਾਲ ਟਕਰਾ ਗਿਆ। ਇਸ ਤੋਂ ਬਾਅਦ ਇਹ ਹਵਾ ’ਚ ਉਛਲ ਕੇ ਖੰਭੇ ਨਾਲ ਟਕਰਾ ਗਈ ਅਤੇ ਫਿਰ ਕਾਰ ਸੜਕ ’ਤੇ ਪਲਟ ਗਈ। ਪੁਲਸ ਅਧਿਕਾਰੀਆਂ ਨੇ ਦੱਸਿਆ ਕਿ ਗੰਭੀਰ ਜ਼ਖ਼ਮੀ ਮਨੀ ਅਤੇ ਮੁਕੇਸ਼ ਨੂੰ ਫਿਲੌਰ ਤੋਂ ਜਲੰਧਰ ਦੇ ਜੌਹਲ ਹਸਪਤਾਲ ਲਈ ਰੈਫ਼ਰ ਕਰ ਦਿੱਤਾ ਗਿਆ ਹੈ।