‘ਐਨੀਮਲ’ ਮਗਰੋਂ ‘ਸ਼੍ਰੀ ਰਾਮ’ ਦਾ ਕਿਰਦਾਰ ਨਿਭਾਉਣਗੇ ਰਣਬੀਰ ਕਪੂਰ, 2024 ਦੀਆਂ ਗਰਮੀਆਂ ’ਚ ਸ਼ੁਰੂ ਹੋਵੇਗੀ ਰਾਮਾਇਣ ਦੀ ਸ਼ੂਟਿੰਗ!

ਮੁੰਬਈ, 13 ਦਸੰਬਰ: ਸ਼ੇਖਰ ਰਾਏ- ਇਸ ਸਮੇਂ ਚਰਚਾਵਾਂ ਵਿਚ ਚੱਲ ਰਹੇ ਬਾਲੀਵੁੱਡ ਐਕਟਰ ਰਣਬੀਰ ਕਪੂਰ ਦੀ ਫਿਲਮ ’ਐਨੀਮਲ’ ਤੋਂ ਬਾਅਦ ਅਗਲੀ ਫਿਲਮ ਰਾਮਾਇਣ ਨੂੰ ਲੈ ਕੇ ਵੱਡੀ ਅੱਪਡੇਟ ਸਾਹਮਣੇ ਆਈ ਹੈ। ਹਾਲਾਂਕਿ ਇਹ ਅੱਪਡੇਟ ਫਿਲਮ ਮੇਕਰਜ਼ ਵੱਲੋਂ ਨਹੀਂ ਸਗੋਂ ਰਣਬੀਰ ਕਪੂਰ ਦੇ ਇਕ ਫੈਨ ਵੱਲੋਂ ਸਾਹਮਣੇ ਆਈ ਹੈ ਪਰ ਉਸਦਾ ਕਹਿਣਾ ਹੈ ਕਿ ਇਹ ਜਾਣਕਾਰੀ ਖੁਦ ਰਣਬੀਰ ਕਪੂਰ ਨੇ ਉਸਦੇ ਨਾਲ ਸਾਂਝੀ ਕੀਤੀ ਹੈ। ਜੀ ਹਾਂ ਉਸਦੀ ਰਣਬੀਰ ਕਪੂਰ ਨਾਲ ਏਅਰਪੋਰਟ ’ਤੇ ਮੁਲਾਕਾਤ ਹੋਈ ਸੀ।
ਸੁਪਰ ਸਟਾਰ ਰਣਬੀਰ ਕਪੂਰ ਇਹ ਕਹਿਣਾ ਹੁਣ ਗਲਤ ਨਹੀਂ ਹੋਵੇਗਾ ਕਿਉਂਕੀ ਫਿਲਮ ‘ਐਨੀਮਲ’ ਵਿਚ ਰਣਬੀਰ ਕਪੂਰ ਦੀ ਪਰਫਾਰਮੈਂਸ ਦੇਖ ਕੇ ਹਰ ਕੋਈ ਹੁਣ ਇਹੀ ਆਖ ਰਿਹਾ ਹੈ। ਵੈਸੇ ਇਸ ਤੋਂ ਬਾਅਦ ਮੈਨੂੰ ਸ਼ਾਹਰੁਖ ਖਾਨ ਦੀ ਕਹੀ ਉਹ ਗੱਲ ਯਾਦ ਆ ਗਈ ਕਿ ‘ਆਈ ਐਮ ਦਿ ਲਾਸਟ ਸੁਪਰ ਸਟਾਰ’ ਖੈਰ ਜਦੋਂ ਤੱਕ ਇਹ ਦੁਨੀਆ ਵਸਦੀ ਹੈ ਕੁੱਝ ਵੀ ਆਖਰੀ ਨਹੀਂ ਹੋ ਸਕਦਾ। ਸੰਦੀਪ ਰੈਡੀ ਵਾਂਗਾ ਨੇ ‘ਐਨੀਮਲ’ ਵਿਚ ਰਣਬੀਰ ਕਪੂਰ ਨੂੰ ਇੰਟਰੋਡਿਊਸ ਹੀ ਉਸਦੇ ਨਾਮ ਅੱਗੇ ਸੁਪਰ ਸਟਾਰ ਲਗਾਕੇ ਕੀਤਾ ਅਤੇ ਫਿਲਮ ਦੇਖਣ ਤੋਂ ਬਾਅਦ ਦਰਸ਼ਕਾਂ ਨੇ ਵੀ ਉਸਦਾ ਕੰਮ ਦੇਖ ਕੇ ਉਸਨੂੰ ਸੁਪਰ ਸਟਾਰ ਕਿਹਾ। ਜਿਸ ਕਿਸੇ ਨੇ ਰਣਬੀਰ ਕਪੂਰ ਨੂੰ ਅਜੇ ਵੀ ਸੁਪਰ ਸਟਾਰ ਨਹੀਂ ਮੰਨਿਆ ਉਨ੍ਹਾਂ ਲਈ ਰਣਬੀਰ ਦੀ ਅਸਗਲੀ ਫਿਲਮ ਆ ਰਹੀ ਹੈ। ਜਿਥੇ ਤੁਸੀਂ ਰਣਬੀਰ ਕਪੂਰ ਦਾ ਇਕ ਖੂੰਖਾਰ ਕਿਰਦਾਰ ਦੇਖ ਚੁੱਕੇ ਹੋ ਉਥੇ ਹੀ ਹੁਣ ਤੁਹਾਨੂੰ ਰਣਬੀਰ ਇਸਦੇ ਬਿਲਕੁਲ ਉਲਟ ਸ਼੍ਰੀ ਰਾਮ ਦੇ ਕਿਰਦਾਰ ਵਿਚ ਨਜ਼ਰ ਆਉਣ ਵਾਲੇ ਹਨ। ਜੀ ਹਾਂ ਫਿਲਮ ਰਮਾਇਣ ਨੂੰ ਲੈ ਕੇ ਹੁਣ ਚਰਚਾ ਸ਼ੁਰੂ ਹੋ ਚੁੱਕੀ ਹੈ ਅਤੇ ਫਿਲਮ ਨੂੰ ਲੈ ਕਿ ਇਕ ਵੱਡੀ ਅਪਡੇਟ ਵੀ ਸਾਹਮਣੇ ਆਈ ਹੈ।
ਮਿਲੀ ਜਾਣਕਾਰੀ ਮੁਤਾਬਕ ਨਿਤੀਸ਼ ਤਿਵਾਰੀ ਦੇ ਨਿਰਦੇਸ਼ਨ ਹੇਠ ਬਣਨ ਵਾਲੀ ਫਿਲਮ ਰਾਮਾਇਣ ਦੀ ਸ਼ੂਟਿੰਗ 2024 ਦੀਆਂ ਗਰਮੀਆਂ ਤੋਂ ਸ਼ੁਰੂ ਹੋਵੇਗੀ। ਇਹ ਦਾਅਵਾ ਇਕ ਫੈਨ ਨੇ ਕੀਤਾ ਹੈ, ਜਿਸ ਨੇ ਹਾਲ ਹੀ ’ਚ ਰਣਬੀਰ ਨਾਲ ਏਅਰਪੋਰਟ ’ਤੇ ਮੁਲਾਕਾਤ ਕੀਤੀ ਸੀ। ਤੁਹਾਨੂੰ ਦੱਸ ਦੇਈਏ ਕਿ ਇਸ ਫਿਲਮ ’ਚ ਰਣਬੀਰ ਕਪੂਰ ਰਾਮ ਦਾ ਕਿਰਦਾਰ ਨਿਭਾਉਣਗੇ ਅਤੇ ਸਾਈ ਪੱਲਵੀ ਦੇ ਸੀਤਾ ਦੇ ਕਿਰਦਾਰ ’ਚ ਨਜ਼ਰ ਆਉਣ ਦੀ ਉਮੀਦ ਹੈ।
ਆਓ ਤੁਹਾਨੂੰ ਉਸ ਫੈਨ ਬਾਰੇ ਵੀ ਦੱਸਦੇ ਹਾਂ ਜਿਸਨੇ ਇਹ ਜਾਣਕਾਰੀ ਸਾਂਝੀ ਕੀਤੀ ਹੈ। ਦਰਅਸਲ ਆਕਾਸ਼ ਚਤੁਰਵੇਦੀ ਨਾਂ ਦੇ ਯੂਜ਼ਰ ਨੇ ਟਵਿੱਟਰ ਜੋ ਕਿ ਹੁਣ ਐਕਸ ਦੇ ਨਾਮ ਤੋਂ ਜਾਣਿਆ ਜਾਂਦਾ ਹੈ ਉਸ ’ਤੇ ਕਈ ਟਵੀਟ ਕੀਤੇ ਹਨ। ਇਨ੍ਹਾਂ ਟਵੀਟਸ ਦੇ ਜ਼ਰੀਏ ਪ੍ਰਸ਼ੰਸਕ ਨੇ ਦਾਅਵਾ ਕੀਤਾ ਹੈ ਕਿ ਉਹ ਹਾਲ ਹੀ ’ਚ ਏਅਰਪੋਰਟ ’ਤੇ ਰਣਬੀਰ ਕਪੂਰ ਨੂੰ ਮਿਲੇ ਸਨ। ਇਸ ਮੁਲਾਕਾਤ ਦੌਰਾਨ ਗੱਲਬਾਤ ਦੌਰਾਨ ਰਣਬੀਰ ਨੇ ਆਉਣ ਵਾਲੀ ਫਿਲਮ ਰਾਮਾਇਣ ਬਾਰੇ ਗੱਲ ਕੀਤੀ।
ਆਕਾਸ਼ ਨੇ ਲਿਖਿਆ- ਇਮੀਗ੍ਰੇਸ਼ਨ ਕਤਾਰ ’ਚ ਰਣਬੀਰ ਕਪੂਰ ਦੇ ਸਾਹਮਣੇ ਖੜੇ ਹੋਣਾ ਅਤੇ ਐਨੀਮਲ ਨਾਲ ਆਪਣੇ ਅਗਲੇ ਪ੍ਰੋਜੈਕਟ ਬਾਰੇ ਗੱਲ ਕਰਨਾ, ਇਹ ਉਹ ਚੀਜ਼ ਨਹੀਂ ਸੀ ਜਿਸ ਲਈ ਮੈਂ ਇਸ ਮੁੰਬਈ ਟ੍ਰਿਪ ’ਤੇ ਸਾਈਨ ਕੀਤਾ ਸੀ। ਉਹ ਕਿੰਨਾ ਪਿਆਰਾ ਇਨਸਾਨ ਹੈ।
ਆਕਾਸ਼ ਨੇ ਇੱਕ ਹੋਰ ਟਵੀਟ ਵਿੱਚ ਲਿਖਿਆ- ਵਾਹ, ਇਹ ਇੱਕ ਧਮਾਕਾ ਸੀ! ਉਨ੍ਹਾਂ ਕਿਹਾ- ਰਾਮਾਇਣ ਦੀ ਸ਼ੂਟਿੰਗ ਗਰਮੀਆਂ ਦੀ ਸ਼ੁਰੂਆਤ ’ਚ ਸ਼ੁਰੂ ਹੋਵੇਗੀ। ਮੈਨੂੰ ਯਕੀਨ ਨਹੀਂ ਹੈ ਕਿ ਮੈਨੂੰ ਇਸ ਤੋਂ ਵੱਧ ਖੁਲਾਸਾ ਕਰਨਾ ਚਾਹੀਦਾ ਹੈ ਜਾਂ ਨਹੀਂ, ਪਰ ਫਿਲਮ ਦੀ ਸਟਾਰ ਕਾਸਟ ਬਿਲਕੁਲ ਪਾਗਲ ਹੈ, ਵਾਹ। ਬਾਲੀਵੁੱਡ ਇਸ ਨੂੰ 2023 ਤੋਂ ਅਗਲੇ ਪੱਧਰ ’ਤੇ ਲੈ ਜਾ ਰਿਹਾ ਹੈ।

ਤੁਹਾਨੂੰ ਦੱਸ ਦਈਏ ਕਿ ਕੁਝ ਸਮਾਂ ਪਹਿਲਾਂ, ਪਿੰਕਵਿਲਾ ਦੀ ਇੱਕ ਰਿਪੋਰਟ ਵਿੱਚ ਕਿਹਾ ਗਿਆ ਸੀ ਕਿ ਨਿਤੇਸ਼ ਤਿਵਾਰੀ ਅਤੇ ਉਨ੍ਹਾਂ ਦੀ ਟੀਮ ਰਾਮਾਇਣ ਦੀ ਦੁਨੀਆ ਨੂੰ ਵਧੀਆ ਸੰਭਵ ਤਰੀਕੇ ਨਾਲ ਸਕ੍ਰੀਨ ’ਤੇ ਲਿਆਉਣ ਲਈ ਜ਼ੋਰਦਾਰ ਤਿਆਰੀ ਕਰ ਰਹੀ ਹੈ। ਫਿਲਮ ਲਈ ਵੀਐਫਐਕਸ ਡਿਜ਼ਾਈਨਿੰਗ ਆਸਕਰ ਜੇਤੂ ਕੰਪਨੀ ਵੱਲੋਂ ਕੀਤੀ ਜਾ ਰਹੀ ਹੈ, ਜਿਸ ਨੂੰ ਦੇਖ ਕੇ ਪ੍ਰਸ਼ੰਸਕ ਜ਼ਰੂਰ ਖੁਸ਼ ਹੋਣਗੇ।
ਇਸ ਤੋਂ ਇਲਾਵਾ ਮੀਡੀਆ ਰਿਪੋਰਟਾਂ ਮੁਤਾਬਕ ਨਿਤੀਸ਼ ਤਿਵਾਰੀ ਨੇ ਇਸ ਫਿਲਮ ’ਚ ਮਾਂ ਸੀਤਾ ਦੀ ਭੂਮਿਕਾ ਲਈ ਤਾਮਿਲ ਅਦਾਕਾਰਾ ਸਾਈ ਪੱਲਵੀ ਨੂੰ ਕਾਸਟ ਕਰਨ ਦਾ ਫੈਸਲਾ ਕੀਤਾ ਹੈ। ਅਦਾਕਾਰਾ ਇਸ ਫਿਲਮ ਨਾਲ ਬਾਲੀਵੁੱਡ ’ਚ ਡੈਬਿਊ ਕਰਨ ਜਾ ਰਹੀ ਹੈ।
ਪਹਿਲਾਂ ਦੀਪਿਕਾ ਪਾਦੂਕੋਣ ਅਤੇ ਫਿਰ ਆਲੀਆ ਭੱਟ ਨੂੰ ਮਾਂ ਸੀਤਾ ਦੇ ਰੋਲ ਲਈ ਕਾਸਟ ਕਰਨ ਦੀ ਚਰਚਾ ਸੀ। ਹਾਲਾਂਕਿ, ਓਠਮਿੲਸ ਦੇ ਅਨੁਸਾਰ, ਨਿਰਦੇਸ਼ਕ ਨੇ ਕਦੇ ਵੀ ਆਲੀਆ ਭੱਟ ਨੂੰ ਇਸ ਭੂਮਿਕਾ ਦੀ ਪੇਸ਼ਕਸ਼ ਨਹੀਂ ਕੀਤੀ। ਕੇਜੀਐਫ ਫੇਮ ਯਸ਼ ਫਿਲਮ ਵਿੱਚ ਰਾਵਣ ਦੇ ਕਿਰਦਾਰ ਵਿੱਚ ਨਜ਼ਰ ਆ ਸਕਦੇ ਹਨ।
ਦੰਗਲ ਅਤੇ ਛਿਛੋਰੇ ਵਰਗੀਆਂ ਫਿਲਮਾਂ ਦਾ ਨਿਰਦੇਸ਼ਨ ਕਰ ਚੁੱਕੇ ਨਿਤੇਸ਼ ਤਿਵਾਰੀ ਫਿਲਮ ਰਾਮਾਇਣ ਦਾ ਨਿਰਦੇਸ਼ਨ ਕਰਨ ਜਾ ਰਹੇ ਹਨ। ਪਹਿਲਾਂ ਇਹ ਫਿਲਮ ਮਧੂ ਮੰਟੇਨਾ, ਨਮਿਤ ਮਲਹੋਤਰਾ ਅਤੇ ਅੱਲੂ ਅਰਵਿੰਦ ਦੁਆਰਾ ਬਣਾਈ ਜਾ ਰਹੀ ਸੀ, ਹਾਲਾਂਕਿ ਰਾਮਾਇਣ ’ਤੇ ਆਧਾਰਿਤ ਫਿਲਮ ਆਦਿਪੁਰਸ਼ ਦੇ ਵਿਵਾਦ ਕਾਰਨ ਨਮਿਤ ਮਲਹੋਤਰਾ ਅਤੇ ਅੱਲੂ ਅਰਵਿੰਦ ਨੇ ਫਿਲਮ ਛੱਡ ਦਿੱਤੀ ਸੀ। ਹੁਣ ਸਿਰਫ ਮਧੂ ਮੰਟੇਨਾ ਹੀ ਇਸ ਫਿਲਮ ਨੂੰ ਪ੍ਰੋਡਿਊਸ ਕਰ ਰਹੀ ਹੈ।

ਕੁਝ ਸਮਾਂ ਪਹਿਲਾਂ ਇਹ ਵੀ ਖਬਰ ਆਈ ਸੀ ਕਿ ਸੰਨੀ ਦਿਓਲ ਫਿਲਮ ਰਾਮਾਇਣ ’ਚ ਭਗਵਾਨ ਹਨੂੰਮਾਨ ਦੀ ਭੂਮਿਕਾ ’ਚ ਨਜ਼ਰ ਆ ਸਕਦੇ ਹਨ। ਸੂਤਰ ਨੇ ਕਿਹਾ ਕਿ ਸੰਨੀ ਦੇ ਲੁੱਕ ਨੂੰ ਧਿਆਨ ’ਚ ਰੱਖਦੇ ਹੋਏ ਮੇਕਰਸ ਨੇ ਇਸ ਰੋਲ ਲਈ ਉਸ ਨਾਲ ਸੰਪਰਕ ਕੀਤਾ ਹੈ। ਹਾਲਾਂਕਿ ਇਸ ਮਾਮਲੇ ਨੂੰ ਲੈ ਕੇ ਮੇਕਰਸ ਜਾਂ ਸੰਨੀ ਵੱਲੋਂ ਕੋਈ ਅਧਿਕਾਰਤ ਐਲਾਨ ਨਹੀਂ ਕੀਤਾ ਗਿਆ ਹੈ।