ਪੁੱਤ ਮਰੀ ਜਾਂਦੇ ਨੇ ਜੀ, ਬਾਕੀ ਸਭ ਠੀਕ ਐ!

ਘਰ ਹੜ੍ਹੀ ਜਾਂਦੇ ਨੇ ਜੀ ਬਾਕੀ ਸਭ ਠੀਕ ਐ
ਪੁੱਤ ਮਰੀ ਜਾਂਦੇ ਨੇ ਜੀ ਬਾਕੀ ਸਭ ਠੀਕ ਐ
.
ਸੋਨੇ ਦੀਆਂ ਕਣਕਾਂ ਨੂੰ,ਗੈਰਤਾਂ ਨੂੰ ਅਣਖਾਂ ਨੂੰ
ਖੋਤੇ ਚਰੀ ਜਾਂਦੇ ਨੇ ਜੀ ਬਾਕੀ ਸਭ ਠੀਕ ਐ
.
ਮੂੰਹਾਂ ਵਿੱਚੋਂ ਝੱਗ ਆਵੇ,ਸੀਵਿਆਂ 'ਚੋਂ ਅੱਗ ਆਵੇ
ਸ਼ੇਰ ਮਰੀ ਜਾਂਦੇ ਨੇ ਜੀ ਬਾਕੀ ਸਭ ਠੀਕ ਐ
.
ਕੁੱਤਿਆਂ-ਕਬੀਜਾਂ ਜਹੇ ਮੰਤਰੀ ਨੇ ਆਪ ਦੇ
ਤਾਂ ਹੀ ਕਹੀ ਜਾਂਦੇ ਨੇ ਜੀ ਬਾਕੀ ਸਭ ਠੀਕ ਐ
.
ਚੜ੍ਹਦੀ ਕਲਾ ਦੇ ਵਿੱਚ ਰਹਿਣ ਵਾਲੀ ਕੌਮ ਸਾਡੀ
ਥੋਥੀ ਕਰੀ ਜਾਂਦੇ ਨੇ ਜੀ ਬਾਕੀ ਸਭ ਠੀਕ ਐ
.
ਸੜਕਾਂ ਚੁਰਾਹਿਆਂ ਵਾਲੇ ਬੋਰਡ ਭੈੜੇ ਸੈਂਟਰਾਂ ਦੀ
ਗੱਲ ਕਰੀ ਜਾਂਦੇ ਨੇ ਜੀ ਬਾਕੀ ਸਭ ਠੀਕ ਐ
.
ਸੁੱਟਿਆਂ,ਸਨਿੱਪਾਂ,ਟੀਕੇ,ਪੰਨ੍ਹੀਆਂ ਪੰਜਾਬ ਸਿਆਂ
ਭੈੜੀ ਕਰੀ ਜਾਂਦੇ ਨੇ ਜੀ ਬਾਕੀ ਸਭ ਠੀਕ ਐ
.
ਘਰ ਹੜ੍ਹੀ ਜਾਂਦੇ ਨੇ ਜੀ ਬਾਕੀ ਸਭ ਠੀਕ ਐ
ਪੁੱਤ ਮਰੀ ਜਾਂਦੇ ਨੇ ਜੀ ਬਾਕੀ ਸਭ ਠੀਕ ਐ

• ਮਲਕੀਤ ਸਿੰਘ, ਐਮਏ
  ਜਰਨਲਿਜ਼ਮ, ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ
  ਮੋਬਾ : 98151-19987