ਕੈਨੇਡਾ ’ਚ ਪੰਜਾਬੀ ਪਰਵਾਰ ਦਾ ਨੁਕਸਾਨ ਕਰ ਗਿਆ ਚੋਰ

ਕੈਲਗਰੀ, 1 ਜਨਵਰੀ (ਵਿਸ਼ੇਸ਼ ਪ੍ਰਤੀਨਿਧ) : ਕੈਲਗਰੀ ਦੇ ਇਕ ਘਰ ਵਿਚ ਚੋਰੀ ਕਰਨ ਦਾਖਲ ਹੋਏ ਇਕ ਸ਼ੱਕੀ ਨੇ ਜਿਥੇ ਪੁਲਿਸ ਨੂੰ ਭਾਜੜਾਂ ਪਾਈਆਂ, ਉਥੇ ਹੀ ਪੰਜਾਬੀ ਪਰਵਾਰ ਦਾ ਵੱਡਾ ਨੁਕਸਾਨ ਕਰ ਦਿਤਾ ਅਤੇ ਗੱਡੀ ਦੀ ਟੱਕਰ ਕਾਰਨ ਕਈ ਘਰਾਂ ਦੀ ਬਿਜਲੀ ਗੁਲ ਹੋ ਗਈ। ਪੰਜਾਬੀ ਪਰਵਾਰ ਦੀ ਬੇਟੀ ਜਪੁਜੀ ਬਰਾੜ ਨੇ ਦੱਸਿਆ ਕਿ ਗੱਡੀ ਦੀ ਟੱਕਰ ਵੱਜਣ ਮਗਰੋਂ ਇਉਂ ਮਹਿਸੂਸ ਹੋਇਆ ਜਿਵੇਂ ਕੋਈ ਭੂਚਾਲ ਆ ਗਿਆ ਹੋਵੇ। ਕੈਲਗਰੀ ਪੁਲਿਸ ਨੇ ਦੱਸਿਆ ਕਿ ਸ਼ਹਿਰ ਦੇ ਉਤਰ ਪੂਰਬੀ ਇਲਾਕੇ ਦੇ ਇਕ ਘਰ ਵਿਚ ਚੋਰ ਦਾਖਲ ਹੋਣ ਦੀ ਇਤਲਾਹ ਮਿਲੀ ਸੀ। ਪੁਲਿਸ ਅਫਸਰ ਮੌਕਾ ਏ ਵਾਰਦਾਤ ’ਤੇ ਪੁੱਜੇ ਤਾਂ ਸ਼ੱਕੀ ਨੇ ਇਕ ਗੱਡੀ ਚੋਰੀ ਕਰ ਕੇ ਫਰਾਰ ਹੋਣ ਦਾ ਯਤਨ ਕੀਤਾ।

ਫੜਨ ਆਇਆ ਪੁਲਿਸ ਅਫਸਰ ਹੋ ਗਿਆ ਜ਼ਖਮੀ

ਪੁਲਿਸ ਨੇ ਸ਼ੱਕੀ ਨੂੰ ਰੋਕਣ ਦੇ ਇਰਾਦੇ ਨਾਲ ਉਸ ਵੱਲੋਂ ਚੋਰੀ ਕੀਤੀ ਗੱਡੀ ਨੂੰ ਟੱਕਰ ਮਾਰੀ ਜਿਸ ਮਗਰੋਂ ਸ਼ੱਕੀ ਗੱਡੀ ਵਿਚੋਂ ਨਿਕਲ ਕੇ ਦੌੜਨ ਲੱਗਾ। ਚੋਰ ਦੇ ਪਿੱਛੇ ਜਾ ਰਿਹਾ ਇਕ ਪੁਲਿਸ ਅਫਸਰ ਤਿਲਕ ਗਿਆ ਅਤੇ ਉਸ ਦੀ ਲੱਤ ’ਤੇ ਡੂੰਘੀ ਸੱਟ ਵੱਜੀ। ਦੂਜੇ ਪਾਸੇ ਚੋਰ ਵੀ ਡਿੱਗਣ ਕਾਰਨ ਜ਼ਖਮੀ ਹੋ ਗਿਆ ਪਰ ਸਾਰੇ ਘਟਨਾਕ੍ਰਮ ਤੋਂ ਪਹਿਲਾਂ ਸ਼ੱਕੀ ਨੇ ਚੋਰੀ ਕੀਤੀ ਗੱਡੀ ਨਾਲ ਬਿਜਲੀ ਸਪਲਾਈ ਵਾਲੇ ਡੱਬੇ ਵਿਚ ਟੱਕਰ ਮਾਰੀ ਅਤੇ ਕਈ ਘਰਾਂ ਦੀ ਬਿਜਲੀ ਗੁਲ ਹੋ ਗਈ ਜਦਕਿ ਇਕ ਪੰਜਾਬੀ ਪਰਵਾਰ ਦੇ ਗੈਰਾਜ ਵਿਚ ਟੱਕਰ ਮਾਰ ਕੇ ਉਥੇ ਮੌਜੂਦ ਮਰਸਡੀਜ਼ ਗੱਡੀ ਦਾ ਨੁਕਸਾਨ ਕਰ ਦਿਤਾ। ਵਾਰਦਾਤ ਦੇ ਮੱਦੇਨਜ਼ਰ ਲੋਕ ਘਰਾਂ ਵਿਚੋਂ ਨਿਕਲ ਆਏ ਅਤੇ ਰੌਲਾ ਪੈ ਗਿਆ। ਸ਼ੱਕੀ ਵੱਲੋਂ ਪਾਏ ਖਿਲਾਰੇ ਨੂੰ ਸਮੇਟਣ ਵਿਚ ਕਈ ਘੰਟੇ ਦਾ ਸਮਾਂ ਲੱਗਾ।