ਪ੍ਰਦੂਸ਼ਣ ਫਿਰ ਦੀਵਾਲੀ ਅਤੇ ਹੁਣ ਇਕ ਹੋਰ ਜ਼ਹਿਰ ਹੋਇਆ ਦਿੱਲੀ 'ਤੇ ਭਾਰੂ

ਨਵੀਂ ਦਿੱਲੀ : ਸਵਿਸ ਕੰਪਨੀ 'IQair' ਮੁਤਾਬਕ ਸੋਮਵਾਰ ਨੂੰ ਦੁਨੀਆ ਦੇ ਸਭ ਤੋਂ ਪ੍ਰਦੂਸ਼ਿਤ ਸ਼ਹਿਰਾਂ 'ਚ ਦਿੱਲੀ ਚੋਟੀ 'ਤੇ ਰਹੀ। ਇਸ ਤੋਂ ਬਾਅਦ ਪਾਕਿਸਤਾਨ ਦੇ ਲਾਹੌਰ ਅਤੇ ਕਰਾਚੀ ਹਨ, ਜਦੋਂ ਕਿ ਪ੍ਰਦੂਸ਼ਿਤ ਸ਼ਹਿਰਾਂ ਵਿੱਚ ਮੁੰਬਈ ਪੰਜਵੇਂ ਅਤੇ ਕੋਲਕਾਤਾ ਛੇਵੇਂ ਸਥਾਨ 'ਤੇ ਹੈ। ਐਤਵਾਰ ਨੂੰ ਦੀਵਾਲੀ 'ਤੇ ਦਿੱਲੀ ਨੇਅੱਠ ਸਾਲਾਂ ਵਿੱਚ ਆਪਣੀ ਸਭ ਤੋਂ ਵਧੀਆ ਹਵਾ ਦੀ ਗੁਣਵੱਤਾ ਦਰਜ ਕੀਤੀ, 24 ਘੰਟੇ ਦੀ ਔਸਤ AQI ਸ਼ਾਮ 4 ਵਜੇ 218 ਦਰਜ ਕੀਤੀ ਗਈ। ਹਾਲਾਂਕਿ, ਐਤਵਾਰ ਦੇਰ ਰਾਤ ਪਟਾਕਿਆਂ ਕਾਰਨ ਘੱਟ ਤਾਪਮਾਨ ਦੇ ਵਿਚਕਾਰ ਪ੍ਰਦੂਸ਼ਣ ਦਾ ਪੱਧਰ ਵਧ ਗਿਆ।

ਅਸਲ ਵਿਚ ਹਾਲਤ ਇਹ ਹੈ ਕਿ ਇਨ੍ਹੀਂ ਦਿਨੀਂ ਰਾਜਧਾਨੀ ਦਿੱਲੀ 'ਚ ਪ੍ਰਦੂਸ਼ਣ ਨੇ ਤਬਾਹੀ ਮਚਾਈ ਹੋਈ ਹੈ। ਹਵਾ ਪਹਿਲਾਂ ਹੀ ਦਮ ਘੁੱਟ ਰਹੀ ਹੈ ਅਤੇ ਹੁਣ ਯਮੁਨਾ ਦਾ ਪਾਣੀ ਵੀ ਪਹਿਲਾਂ ਨਾਲੋਂ ਜ਼ਿਆਦਾ ‘ਜ਼ਹਿਰੀਲਾ’ ਹੋ ਗਿਆ ਹੈ। ਖ਼ਤਰਨਾਕ ਰਸਾਇਣਾਂ ਦੀ ਜ਼ਿਆਦਾ ਮਾਤਰਾ ਕਾਰਨ ਯਮੁਨਾ ਝੱਗ ਨਾਲ ਢਕੀ ਨਜ਼ਰ ਆਉਂਦੀ ਹੈ। ਯਮੁਨਾ 'ਚ ਝੱਗ ਅਜਿਹੇ ਸਮੇਂ ਵਧ ਗਈ ਹੈ ਜਦੋਂ ਛਠ ਪੂਜਾ ਬਹੁਤ ਨੇੜੇ ਹੈ ਅਤੇ ਪਾਬੰਦੀ ਦੇ ਬਾਵਜੂਦ ਵੱਡੀ ਗਿਣਤੀ 'ਚ ਸ਼ਰਧਾਲੂ ਨਦੀ 'ਤੇ ਪੂਜਾ ਕਰਨ ਲਈ ਆਉਂਦੇ ਹਨ।

ਦਿੱਲੀ ਵਿੱਚ ਮੀਂਹ ਤੋਂ ਬਾਅਦ ਮਿਲੀ ਰਾਹਤ ਇੱਕ ਵਾਰ ਫਿਰ ਖ਼ਤਮ ਹੋ ਗਈ ਹੈ। ਮੰਗਲਵਾਰ ਨੂੰ ਲਗਾਤਾਰ ਦੂਜੇ ਦਿਨ ਹਵਾ ਦੀ ਗੁਣਵੱਤਾ ਬਹੁਤ ਖਰਾਬ ਰਹੀ। ਸਵੇਰੇ 8 ਵਜੇ, ਰਾਜਧਾਨੀ ਵਿੱਚ AQI 363 ਸੀ, ਯਾਨੀ ਕਿ ਬਹੁਤ ਮਾੜੀ ਸ਼੍ਰੇਣੀ ਵਿੱਚ ਸੀ।

ਸਫ਼ਾਈ ਦੇ ਸਾਰੇ ਦਾਅਵਿਆਂ ਦੇ ਉਲਟ ਯਮੁਨਾ ਦੀ ਹਾਲਤ ਸੁਧਰਦੀ ਨਜ਼ਰ ਨਹੀਂ ਆ ਰਹੀ। ਨਦੀ 'ਚ ਅਮੋਨੀਆ ਅਤੇ ਫਾਸਫੇਟ ਦੀ ਮਾਤਰਾ ਵਧਣ ਕਾਰਨ ਯਮੁਨਾ 'ਚ ਇਕ ਵਾਰ ਫਿਰ ਝੱਗ ਦੀ ਮੋਟੀ ਪਰਤ ਬਣ ਗਈ ਹੈ। ਜੇਕਰ ਨਦੀ 'ਚ ਇਨ੍ਹਾਂ ਰਸਾਇਣਾਂ ਦੀ ਮਾਤਰਾ ਹੋਰ ਵਧਦੀ ਗਈ ਤਾਂ ਦਿੱਲੀ ਦੇ ਲੋਕਾਂ ਨੂੰ ਪਾਣੀ ਦੇ ਸੰਕਟ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ। ਪਿਛਲੇ ਸਾਲ ਜੁਲਾਈ ਵਿੱਚ ਵੀ ਯਮੁਨਾ ਵਿੱਚ ਅਮੋਨੀਆ ਦਾ ਪੱਧਰ ਵਧਣ ਕਾਰਨ ਵਜ਼ੀਰਾਬਾਦ, ਚੰਦਰਵਾਲ ਅਤੇ ਓਖਲਾ ਟਰੀਟਮੈਂਟ ਪਲਾਂਟ ਬੰਦ ਕਰਨੇ ਪਏ ਸਨ।ਇਸ ਕਾਰਨ ਦਿੱਲੀ ਕੈਂਟ, ਨਵੀਂ ਦਿੱਲੀ, ਪੂਰਬੀ ਦਿੱਲੀ, ਉੱਤਰੀ ਦਿੱਲੀ ਅਤੇ ਦੱਖਣੀ ਦਿੱਲੀ ਦੇ ਕਈ ਇਲਾਕਿਆਂ ਵਿੱਚ ਪਾਣੀ ਦੀ ਸਪਲਾਈ ਪ੍ਰਭਾਵਿਤ ਹੋਈ।