ਪਾਕਿਤਸਾਨ ਵਿਚ ਹਿੰਦੂ ਕੁੜੀਆਂ ’ਤੇ ਜ਼ੁਲਮ ਬੇਰੋਕ ਜਾਰੀ

ਸਿੰਧ, 18 ਅਕਤੂਬਰ, ਨਿਰਮਲ : ਪਾਕਿਸਤਾਨ ’ਚ ਹਿੰਦੂ ਕੁੜੀਆਂ ’ਤੇ ਜ਼ੁਲਮ ਬੇਰੋਕ ਜਾਰੀ ਹਨ। ਪਾਕਿਸਤਾਨ ਪੁਲਿਸ ਤੋਂ ਬਾਅਦ ਹੁਣ ਨਿਆਂਪਾਲਿਕਾ ਵੀ ਹਿੰਦੂ ਪਰਿਵਾਰਾਂ ਦੀਆਂ ਮੁਸ਼ਕਲਾਂ ਘੱਟ ਨਹੀਂ ਕਰ ਪਾ ਰਹੀ ਹੈ। ਪਾਕਿਸਤਾਨ ਦੇ ਸਿੰਧ ਤੋਂ ਇੱਕ ਹੋਰ ਹਿੰਦੂ ਪਰਿਵਾਰ ਦਾ ਦਰਦ ਸਾਹਮਣੇ ਆਇਆ ਹੈ। ਪਰਿਵਾਰ ਦੀ ਲੜਕੀ ਅਦਾਲਤ ਵਿੱਚ ਚੀਕਾਂ ਮਾਰਦੀ ਰਹੀ ਪਰ ਅਦਾਲਤ ਨੇ ਉਸ ਹਿੰਦੂ ਲੜਕੀ ਦੀ ਇੱਕ ਨਾ ਸੁਣੀ ਅਤੇ ਉਸ ਨੂੰ ਪਰਿਵਾਰ ਤੋਂ ਵੱਖ ਕਰ ਦਿੱਤਾ।

ਇਹ ਘਟਨਾ ਪਾਕਿਸਤਾਨ ਦੇ ਸਿੰਧ ਸੂਬੇ ਦੇ ਮੀਰਪੁਰਖਾਸ ਦੀ ਹੈ। ਰੀਟਾ ਮੇਘਵਾਰ ਨਾਂ ਦੀ ਲੜਕੀ ਨੂੰ ਦੋ ਮਹੀਨੇ ਪਹਿਲਾਂ ਉਸ ਦੇ ਘਰੋਂ ਅਗਵਾ ਕੀਤਾ ਗਿਆ ਸੀ। ਉਸ ਨੂੰ ਮੁਸਲਿਮ ਨੌਜਵਾਨ ਅਹਿਮਦਾਨੀ ਨੇ ਅਗਵਾ ਕਰ ਲਿਆ ਸੀ। ਕਿਸੇ ਤਰ੍ਹਾਂ ਪਰਿਵਾਰ ਪਹਿਲਾਂ ਪੁਲਿਸ ਕੋਲ ਗਿਆ ਅਤੇ ਮਾਮਲਾ ਅਦਾਲਤ ਤੱਕ ਪਹੁੰਚ ਗਿਆ। ਜਾਂਚ ’ਚ ਸਾਹਮਣੇ ਆਇਆ ਕਿ ਲੜਕੀ ਨੇ ਇਸਲਾਮ ਕਬੂਲ ਕਰ ਲਿਆ ਸੀ ਅਤੇ ਉਸ ਦਾ ਵਿਆਹ ਅਹਿਮਦਾਨੀ ਨਾਲ ਹੋਇਆ ਸੀ।

ਜਦੋਂ ਮਾਮਲਾ ਅਦਾਲਤ ਵਿੱਚ ਪਹੁੰਚਿਆ ਤਾਂ ਬਹਿਸ ਸ਼ੁਰੂ ਹੋ ਗਈ। ਰੀਟਾ ਨੇ ਅਦਾਲਤ ’ਚ ਖੜ੍ਹ ਕੇ ਆਪਣੇ ’ਤੇ ਹੋਏ ਤਸ਼ੱਦਦ ਨੂੰ ਬਿਆਨ ਕੀਤਾ। ਉਸ ਨੇ ਸਪੱਸ਼ਟ ਕਿਹਾ ਕਿ ਉਸ ਨੂੰ ਜ਼ਬਰਦਸਤੀ ਚੁੱਕ ਕੇ ਇਸਲਾਮ ਕਬੂਲ ਕੀਤਾ ਗਿਆ ਸੀ। ਉਹ ਉਸ ਦੇ ਜ਼ਬਰਦਸਤੀ ਵਿਆਹ ਤੋਂ ਵੀ ਨਾਖੁਸ਼ ਹੈ ਅਤੇ ਆਪਣੇ ਪਰਿਵਾਰ ਕੋਲ ਵਾਪਸ ਜਾਣਾ ਚਾਹੁੰਦੀ ਹੈ।

ਰੀਟਾ ਨੇ ਵਾਰ-ਵਾਰ ਰੌਲਾ ਪਾਇਆ ਕਿ ਉਸ ਨੇ ਆਪਣੇ ਮਾਪਿਆਂ ਕੋਲ ਜਾਣਾ ਹੈ ਅਤੇ ਅਹਿਮਦਾਨੀ ਨਾਲ ਉਸ ਦਾ ਕੋਈ ਲੈਣਾ-ਦੇਣਾ ਨਹੀਂ ਹੈ, ਪਰ ਅਦਾਲਤ ਨੇ ਉਸ ਨੂੰ ਸੁਰੱਖਿਅਤ ਘਰ ਭੇਜ ਦਿੱਤਾ। ਰੀਟਾ ਵਾਰ-ਵਾਰ ਰੌਲਾ ਪਾਉਂਦੀ ਰਹੀ ਕਿ ਉਸ ਨੂੰ ਸੁਰੱਖਿਅਤ ਘਰ ਨਾ ਭੇਜਿਆ ਜਾਵੇ, ਉਹ ਉਥੇ ਸੁਰੱਖਿਅਤ ਨਹੀਂ ਰਹੇਗੀ, ਪਰ ਅਦਾਲਤ ਨੇ ਹਿੰਦੂ ਪਰਿਵਾਰ ਦੀ ਗੱਲ ਨਹੀਂ ਸੁਣੀ ਅਤੇ ਉਸ ਨੂੰ ਮਹਿਲਾ ਪੁਲਸ ਸਮੇਤ ਭੇਜ ਦਿੱਤਾ।