ਫਿਰੋਜ਼ਪੁਰ ਵਿਚ ਝੂਲੇ ਤੋਂ ਡਿੱਗ ਕੇ ਇੱਕ ਦੀ ਮੌਤ, ਕਈ ਜ਼ਖ਼ਮੀ

ਫਿਰੋਜ਼ਪੁਰ, 16 ਅਕਤੂਬਰ, ਨਿਰਮਲ : ਪੰਜਾਬ ਦੇ ਫ਼ਿਰੋਜ਼ਪੁਰ ਜ਼ਿਲ੍ਹੇ ਦੇ ਪਿੰਡ ਦੁਲਚੀਕੇ ਵਿੱਚ ਇੱਕ ਮੇਲੇ ਦੌਰਾਨ ਕਿਸ਼ਤੀ ਵਾਲੇ ਝੂਲੇ ਵਿਚ 3 ਨੌਜਵਾਨਾਂ ਦੇ ਗਲ਼ ਵਿਚ ਅਚਾਨਕ ਰੱਸੀ ਫਸ ਗਈ। ਰੱਸੀ ਫਸ ਜਾਣ ਕਾਰਨ ਤਿੰਨੋਂ ਨੌਜਵਾਨ ਝੂਲੇ ਤੋਂ ਹੇਠਾਂ ਡਿੱਗ ਗਏ ਅਤੇ ਝੂਲਾ ਉਨ੍ਹਾਂ ਨਾਲ ਟਕਰਾਉਂਦਾ ਰਿਹਾ। ਹਾਦਸੇ ਵਿੱਚ ਇੱਕ ਨੌਜਵਾਨ ਦੀ ਮੌਤ ਹੋ ਗਈ ਜਦਕਿ ਦੋ ਨੌਜਵਾਨ ਗੰਭੀਰ ਜ਼ਖ਼ਮੀ ਹੋ ਗਏ। ਘਟਨਾ ਤੋਂ ਬਾਅਦ ਝੂਲੇ ਦਾ ਮਾਲਕ ਉਥੋਂ ਫਰਾਰ ਹੋ ਗਿਆ। ਪੁਲਸ ਨੇ ਮ੍ਰਿਤਕ ਦੇ ਵਾਰਸਾਂ ਦੇ ਬਿਆਨਾਂ ਦੇ ਆਧਾਰ ’ਤੇ ਝੂਲੇ ਦੇ ਮਾਲਕ ਖ਼ਿਲਾਫ਼ ਕੇਸ ਦਰਜ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।

ਮ੍ਰਿਤਕ ਨੌਜਵਾਨ ਅਮਨਦੀਪ ਸਿੰਘ (16) ਦੇ ਪਿਤਾ ਜੋਗਿੰਦਰ ਸਿੰਘ ਅਤੇ ਨੰਬਰਦਾਰ ਮੰਗਲ ਸਿੰਘ ਵਾਸੀ ਪਿੰਡ ਕਾਲੂ ਵਾਲਾ ਨੇ ਦੱਸਿਆ ਕਿ ਉਨ੍ਹਾਂ ਦਾ ਲੜਕਾ ਅਮਨਦੀਪ ਪਿੰਡ ਦੁਲਚੀਕੇ ਵਿਖੇ ਮੇਲਾ ਦੇਖਣ ਗਿਆ ਸੀ। ਮੇਲਾ ਭਰ ਰਿਹਾ ਸੀ। ਉਥੇ ਲਗਾਏ ਗਏ ਕਿਸ਼ਤੀ ਦੇ ਝੂਲੇ ’ਚ ਬੈਠ ਕੇ ਅਮਨਦੀਪ ਸਮੇਤ ਤਿੰਨ ਨੌਜਵਾਨ ਝੂਟੇ ਲੈ ਰਹੇ ਸਨ। ਅਚਾਨਕ ਰੱਸੀ ਟੁੱਟ ਕੇ ਤਿੰਨਾਂ ਦੇ ਗਲ ਵਿੱਚ ਫਸ ਗਈ ਅਤੇ ਤਿੰਨੇ ਨੌਜਵਾਨ ਝੂਲੇ ਤੋਂ ਹੇਠਾਂ ਡਿੱਗ ਗਏ।

ਉਥੇ ਮੌਜੂਦ ਮੁਲਾਜ਼ਮ ਨੇ ਝੂਲੇ ਨੂੰ ਨਹੀਂ ਰੋਕਿਆ। ਝੂਲਾ ਚਲਦਾ ਰਿਹਾ ਅਤੇ ਤਿੰਨਾਂ ਨੌਜਵਾਨਾਂ ਨਾਲ ਟਕਰਾਉਂਦਾ ਰਿਹਾ। ਇਸ ਕਾਰਨ ਤਿੰਨੇ ਗੰਭੀਰ ਜ਼ਖ਼ਮੀ ਹੋ ਗਏ। ਕਾਫੀ ਦੇਰ ਤੱਕ ਤਿੰਨਾਂ ਨੂੰ ਕਿਸੇ ਨੇ ਨਹੀਂ ਚੁੱਕਿਆ। ਉੱਥੇ ਮੌਜੂਦ ਕਾਲੂਵਾਲਾ ਦੇ ਲੋਕਾਂ ਨੇ ਅਮਨਦੀਪ ਨੂੰ ਚੁੱਕ ਕੇ ਫ਼ਿਰੋਜ਼ਪੁਰ ਦੇ ਨਿੱਜੀ ਹਸਪਤਾਲ ਵਿੱਚ ਦਾਖ਼ਲ ਕਰਵਾਇਆ। ਡਾਕਟਰਾਂ ਨੇ ਚੈਕਅੱਪ ਤੋਂ ਬਾਅਦ ਉਸ ਨੂੰ ਸਿਵਲ ਹਸਪਤਾਲ ਭੇਜ ਦਿੱਤਾ। ਉਥੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ ਗਿਆ। ਬਾਕੀ ਦੋ ਗੰਭੀਰ ਨੌਜਵਾਨ ਕਿਸ ਹਸਪਤਾਲ ਵਿੱਚ ਦਾਖ਼ਲ ਸਨ ਅਤੇ ਉਹ ਕਿੱਥੋਂ ਦੇ ਸਨ, ਇਸ ਬਾਰੇ ਸਦਰ ਥਾਣਾ ਪੁਲਸ ਨੂੰ ਕੋਈ ਜਾਣਕਾਰੀ ਨਹੀਂ ਹੈ। ਥਾਣਾ ਸਦਰ ਦੇ ਇੰਚਾਰਜ ਰਵੀ ਚੌਹਾਨ ਨੇ ਅਮਨਦੀਪ ਦੀ ਮੌਤ ਦੀ ਪੁਸ਼ਟੀ ਕੀਤੀ ਹੈ। ਝੂਲੇ ਦੇ ਮਾਲਕ ਦੀ ਭਾਲ ਜਾਰੀ ਹੈ। ਮੇਲੇ ਵਿੱਚ ਝੂਲੇ ਅਤੇ ਦੁਕਾਨਾਂ ਲਗਾਉਣ ਵਾਲੇ ਸਾਰੇ ਵਿਅਕਤੀਆਂ ਦੇ ਨਾਵਾਂ ਦੀ ਸੂਚੀ ਪਿੰਡ ਦੀ ਪੰਚਾਇਤ ਤੋਂ ਪ੍ਰਾਪਤ ਕੀਤੀ ਗਈ ਹੈ।