ਭੂਚਾਲ ਦੇ ਕਈ ਦਿਨਾਂ ਬਾਅਦ ਜ਼ਿੰਦਾ ਨਿਕਲੀ ਬਜ਼ੁਰਗ ਔਰਤ

ਟੋਕੀਓ, 8 ਜਨਵਰੀ, ਨਿਰਮਲ : ਜਾਪਾਨ ਵਿਚ ਆਏ ਭੂਚਾਲ ਤੋਂ ਕਈ ਦਿਨਾਂ ਬਾਅਦ ਪੁਲਿਸ ਅਤੇ ਬਚਾਅ ਕਰਮਚਾਰੀਆਂ ਨੇ ਭੂਚਾਲ ਦੇ ਪੰਜ ਦਿਨ ਬਾਅਦ ਸ਼ਨੀਵਾਰ ਨੂੰ ਇੱਕ ਢਹਿ-ਢੇਰੀ ਹੋਏ ਘਰ ਵਿੱਚੋਂ ਇੱਕ 90 ਸਾਲਾ ਔਰਤ ਨੂੰ ਜ਼ਿੰਦਾ ਬਾਹਰ ਕੱਢਿਆ। ਇਸ਼ੀਕਾਵਾ ਪ੍ਰੀਫੈਕਚਰ ਦੇ ਸੁਜ਼ੂ ਸ਼ਹਿਰ ’ਚ ਸੋਮਵਾਰ ਨੂੰ ਆਏ ਭੂਚਾਲ ਤੋਂ ਬਾਅਦ ਔਰਤ ਦੋ ਮੰਜ਼ਿਲਾ ਮਕਾਨ ਦੇ ਮਲਬੇ ਹੇਠਾਂ ਦੱਬ ਗਈ। ਭੂਚਾਲ ਵਿੱਚ 126 ਤੋਂ ਵੱਧ ਲੋਕਾਂ ਦੀ ਮੌਤ ਹੋ ਗਈ ਹੈ।

ਯੋਮਿਉਰੀ ਅਖਬਾਰ ਨੇ ਮੈਟਰੋਪੋਲੀਟਨ ਪੁਲਿਸ ਵਿਭਾਗ ਦੇ ਹਵਾਲੇ ਨਾਲ ਕਿਹਾ ਕਿ ਔਰਤ ਹਾਈਪੋਥਰਮੀਆ ਤੋਂ ਪੀੜਤ ਜਾਪਦੀ ਸੀ ਪਰ ਜਦੋਂ ਉਸ ਨੂੰ ਮਲਬੇ ਤੋਂ ਬਾਹਰ ਕੱਢਿਆ ਗਿਆ ਤਾਂ ਉਹ ਹੋਸ਼ ਵਿੱਚ ਸੀ। ਹਾਈਪੋਥਰਮੀਆ ਵਿੱਚ ਸਰੀਰ ਦਾ ਤਾਪਮਾਨ ਆਮ ਨਾਲੋਂ ਘੱਟ ਹੋ ਜਾਂਦਾ ਹੈ। ਔਰਤ ਦੀ ਪਛਾਣ ਨਹੀਂ ਹੋ ਸਕੀ ਹੈ। ਉਸ ਨੂੰ ਹਸਪਤਾਲ ਵਿਚ ਭਰਤੀ ਕਰਵਾਇਆ ਗਿਆ ਹੈ।

ਮਾਹਿਰਾਂ ਦਾ ਕਹਿਣਾ ਹੈ ਕਿ ਭੂਚਾਲ ਦੇ ਮਲਬੇ ਹੇਠ ਦੱਬੇ ਲੋਕ ਆਮ ਤੌਰ ’ਤੇ ਤਿੰਨ ਦਿਨਾਂ ਤੱਕ ਜ਼ਿੰਦਾ ਰਹਿੰਦੇ ਹਨ, ਹਾਲਾਂਕਿ ਤਾਪਮਾਨ, ਪਾਣੀ ਜਾਂ ਭੋਜਨ ਤੱਕ ਪਹੁੰਚ ਵਰਗੇ ਕਾਰਕਾਂ ਦੇ ਆਧਾਰ ’ਤੇ ਲੰਬੇ ਸਮੇਂ ਤੱਕ ਜ਼ਿੰਦਾ ਰਹਿਣਾ ਸੰਭਵ ਹੈ।

ਵੱਡੀ ਗਿਣਤੀ ਵਿੱਚ ਟੁੱਟੀਆਂ ਸੜਕਾਂ ਕਾਰਨ ਬਚਾਅ ਕਰਮਚਾਰੀਆਂ ਨੂੰ ਮਦਦ ਮੁਹੱਈਆ ਕਰਵਾਉਣ ਵਿੱਚ ਮੁਸ਼ਕਲ ਆ ਰਹੀ ਹੈ। ਸ਼ਨੀਵਾਰ ਨੂੰ ਭੂਚਾਲ ’ਚ ਮਰਨ ਵਾਲਿਆਂ ਦੀ ਗਿਣਤੀ ਵਧ ਕੇ 126 ਹੋ ਗਈ। ਇਸ ਵਿੱਚ ਇੱਕ ਪੰਜ ਸਾਲ ਦਾ ਬੱਚਾ ਵੀ ਸ਼ਾਮਲ ਹੈ, ਜਿਸ ਉੱਤੇ ਸੋਮਵਾਰ ਨੂੰ ਭੂਚਾਲ ਤੋਂ ਬਾਅਦ ਉਬਲਦਾ ਪਾਣੀ ਡੁੱਲ੍ਹਿਆ ਸੀ। ਸ਼ੁੱਕਰਵਾਰ ਨੂੰ ਅਚਾਨਕ ਉਨ੍ਹਾਂ ਦੀ ਸਿਹਤ ਵਿਗੜ ਗਈ, ਜਿਸ ਕਾਰਨ ਉਨ੍ਹਾਂ ਦੀ ਮੌਤ ਹੋ ਗਈ।

ਕਰੀਬ 30 ਹਜ਼ਾਰ ਲੋਕਾਂ ਨੂੰ ਬਾਹਰ ਕੱਢ ਕੇ ਸਕੂਲਾਂ ਅਤੇ ਹੋਰ ਸਹੂਲਤਾਂ ਵਿੱਚ ਰੱਖਿਆ ਗਿਆ ਹੈ, ਪਰ ਉਨ੍ਹਾਂ ਨੂੰ ਮਦਦ ਮੁਹੱਈਆ ਕਰਵਾਉਣ ਵਿੱਚ ਮੁਸ਼ਕਲਾਂ ਆ ਰਹੀਆਂ ਹਨ। ਲੋਕ ਠੰਡ ਅਤੇ ਭੁੱਖ ਕਾਰਨ ਪ੍ਰੇਸ਼ਾਨ ਹਨ। ਸੋਮਵਾਰ ਨੂੰ 7.6 ਤੀਬਰਤਾ ਦੇ ਭੂਚਾਲ ਤੋਂ ਬਾਅਦ ਜਾਪਾਨ ਦੇ ਪੱਛਮੀ ਤੱਟ ’ਤੇ ਵਿਆਪਕ ਤਬਾਹੀ ਹੋਈ, ਜਿਸ ਨਾਲ ਵੱਡੀ ਗਿਣਤੀ ਵਿੱਚ ਲੋਕਾਂ ਦੇ ਘਰਾਂ ਅਤੇ ਕਿਸ਼ਤੀਆਂ ਨੂੰ ਨੁਕਸਾਨ ਪਹੁੰਚਿਆ।

ਮੀਂਹ ਅਤੇ ਬਰਫ਼ਬਾਰੀ ਨੇ ਰਾਹਤ ਕਾਰਜਾਂ ਵਿੱਚ ਹੋਰ ਮੁਸ਼ਕਲਾਂ ਪੈਦਾ ਕਰ ਦਿੱਤੀਆਂ ਹਨ। ਭੂਚਾਲ ਨੇ ਇਸ਼ਿਕਾਵਾ ਪ੍ਰੇਕਚਰ ਵਿੱਚ ਕਾਫ਼ੀ ਨੁਕਸਾਨ ਕੀਤਾ ਹੈ। ਵਜੀਮਾ ਸ਼ਹਿਰ ਵਿਚ ਰਿਕਾਰਡ 69 ਲੋਕਾਂ ਦੀ ਜਾਨ ਗਈ ਹੈ, ਇਸ ਤੋਂ ਬਾਅਦ ਸੁਜ਼ੂ ਵਿਚ 38 ਲੋਕ ਮਾਰੇ ਗਏ ਹਨ। ਭੂਚਾਲ ’ਚ 500 ਤੋਂ ਜ਼ਿਆਦਾ ਲੋਕ ਜ਼ਖਮੀ ਹੋਏ ਹਨ, ਜਿਨ੍ਹਾਂ ’ਚੋਂ 27 ਦੀ ਹਾਲਤ ਗੰਭੀਰ ਹੈ।

ਇਸ ਤੋਂ ਇਲਾਵਾ ਦੋ ਸੌ ਤੋਂ ਵੱਧ ਲੋਕ ਅਜੇ ਵੀ ਲਾਪਤਾ ਹਨ। ਜਾਪਾਨ ਦੇ ਭੂਚਾਲ ਪੀੜਤਾਂ ਦੀ ਮਦਦ ਲਈ ਕਈ ਦੇਸ਼ ਅੱਗੇ ਆਏ ਹਨ। ਇਸ ਦੌਰਾਨ ਉਤਰੀ ਕੋਰੀਆ ਦੇ ਨੇਤਾ ਕਿਮ ਜੋਂਗ ਉਨ ਨੇ ਜਾਪਾਨ ਦੇ ਪੀਐਮ ਫੂਮਿਓ ਕਿਸ਼ਿਦਾ ਨੂੰ ਇੱਕ ਸੰਦੇਸ਼ ਭੇਜ ਕੇ ਭੂਚਾਲ ਪੀੜਤਾਂ ਪ੍ਰਤੀ ਹਮਦਰਦੀ ਪ੍ਰਗਟਾਈ ਹੈ। ਲੋਕਾਂ ਦੀ ਮਦਦ ਲਈ ਹਜ਼ਾਰਾਂ ਫੌਜੀ ਹਵਾਈ ਅਤੇ ਜਲ ਮਾਰਗ ਰਾਹੀਂ ਮਦਦ ਦੇਣ ਵਿੱਚ ਲੱਗੇ ਹੋਏ ਹਨ।