ਹੁਣ ਅਮਰੀਕੀ ਫੌਜ ’ਤੇ ਸੀਰੀਆ ’ਚ ਹਮਲਾ

ਦਮਿਸ਼ਕ, 30 ਜਨਵਰੀ, ਨਿਰਮਲ : ਸੀਰੀਆ ’ਚ ਅਮਰੀਕੀ ਅਤੇ ਸਹਿਯੋਗੀ ਫੌਜਾਂ ਦੇ ਟਿਕਾਣਿਆਂ ’ਤੇ ਸੋਮਵਾਰ ਨੂੰ ਰਾਕੇਟ ਨਾਲ ਹਮਲਾ ਕੀਤਾ ਗਿਆ। ਸੀਰੀਆ ’ਚ ਇਹ ਹਮਲਾ ਐਤਵਾਰ ਨੂੰ ਜੌਰਡਨ ’ਚ ਅਮਰੀਕੀ ਫੌਜੀ ਅੱਡੇ ’ਤੇ ਹੋਏ ਡਰੋਨ ਹਮਲੇ ’ਚ ਤਿੰਨ ਫੌਜੀਆਂ ਦੀ ਮੌਤ ਤੋਂ ਬਾਅਦ ਹੋਇਆ ਹੈ। ਅਮਰੀਕੀ ਰੱਖਿਆ ਅਧਿਕਾਰੀ ਨੇ ਇਹ ਜਾਣਕਾਰੀ ਦਿੱਤੀ ਹੈ। ਉਸ ਨੇ ਕਿਹਾ ਕਿ ਸੀਰੀਆ ਦੇ ਸ਼ਾਦਾਦੀ ਵਿੱਚ ਇੱਕ ਮਿਲਟਰੀ ਬੇਸ ’ਤੇ ਅਮਰੀਕੀ ਅਤੇ ਗਠਜੋੜ ਬਲਾਂ ’ਤੇ ਕਈ ਰਾਕੇਟ ਦਾਗੇ ਗਏ, ਪਰ ਕੋਈ ਜ਼ਖਮੀ ਹੋਣ ਦੀ ਖਬਰ ਨਹੀਂ ਹੈ ਅਤੇ ਬੁਨਿਆਦੀ ਢਾਂਚੇ ਨੂੰ ਕੋਈ ਨੁਕਸਾਨ ਨਹੀਂ ਹੋਇਆ ਹੈ।
ਇਰਾਕ ਅਤੇ ਸੀਰੀਆ ਵਿੱਚ ਅਮਰੀਕੀ ਬਲਾਂ ਨੂੰ ਪਿਛਲੇ ਸਾਲ ਅਕਤੂਬਰ ਤੋਂ ਹਮਲਿਆਂ ਵਿੱਚ ਵਾਧਾ ਹੋਇਆ ਹੈ। ਇਨ੍ਹਾਂ ਵਿੱਚੋਂ ਜ਼ਿਆਦਾਤਰ ਹਮਲਿਆਂ ਦੀ ਜ਼ਿੰਮੇਵਾਰੀ ਉਨ੍ਹਾਂ ਸੰਗਠਨਾਂ ਨੇ ਲਈ ਹੈ ਜੋ ਗਾਜ਼ਾ ਸੰਘਰਸ਼ ਵਿੱਚ ਇਜ਼ਰਾਈਲ ਅਤੇ ਅਮਰੀਕਾ ਦਾ ਵਿਰੋਧ ਕਰ ਰਹੇ ਹਨ। ਮੱਧ ਅਕਤੂਬਰ ਤੋਂ ਲੈ ਕੇ ਹੁਣ ਤੱਕ ਅਮਰੀਕਾ ਅਤੇ ਗਠਜੋੜ ਫੌਜਾਂ ’ਤੇ ਘੱਟੋ-ਘੱਟ 165 ਵਾਰ ਹਮਲੇ ਹੋਏ ਹਨ। ਇਨ੍ਹਾਂ ਵਿੱਚੋਂ 66 ਹਮਲੇ ਇਰਾਕ ਵਿੱਚ, 98 ਸੀਰੀਆ ਵਿੱਚ ਅਤੇ ਇੱਕ ਜਾਰਡਨ ਵਿੱਚ ਹੋਇਆ। ਇਨ੍ਹਾਂ ਹਮਲਿਆਂ ਵਿੱਚ ਡਰੋਨ, ਰਾਕੇਟ, ਮੋਰਟਾਰ ਅਤੇ ਘੱਟ ਦੂਰੀ ਦੀਆਂ ਬੈਲਿਸਟਿਕ ਮਿਜ਼ਾਈਲਾਂ ਦੀ ਵੀ ਵਰਤੋਂ ਕੀਤੀ ਗਈ ਹੈ। ਇਸਲਾਮਿਕ ਸਟੇਟ ਸਮੂਹ ਦੇ ਖਿਲਾਫ ਅੰਤਰਰਾਸ਼ਟਰੀ ਗਠਜੋੜ ਦੇ ਹਿੱਸੇ ਵਜੋਂ ਅਮਰੀਕਾ ਦੇ ਸੀਰੀਆ ਵਿੱਚ ਲਗਭਗ 900 ਅਤੇ ਗੁਆਂਢੀ ਇਰਾਕ ਵਿੱਚ 2,500 ਸੈਨਿਕ ਹਨ।
ਜੌਰਡਨ ’ਚ ਸੀਰੀਆ ਦੀ ਸਰਹੱਦ ਨੇੜੇ ਐਤਵਾਰ ਨੂੰ ਹੋਏ ਹਮਲੇ ’ਚ ਤਿੰਨ ਅਮਰੀਕੀ ਸੈਨਿਕ ਮਾਰੇ ਗਏ ਅਤੇ 30 ਦੇ ਕਰੀਬ ਜ਼ਖਮੀ ਹੋ ਗਏ। ਗਾਜ਼ਾ ਯੁੱਧ ਸ਼ੁਰੂ ਹੋਣ ਤੋਂ ਬਾਅਦ ਪੱਛਮੀ ਏਸ਼ੀਆ ਵਿਚ ਅਮਰੀਕੀ ਸੈਨਿਕਾਂ ’ਤੇ ਇਹ ਪਹਿਲਾ ਅਜਿਹਾ ਹਮਲਾ ਹੈ, ਜਿਸ ਵਿਚ ਮੌਤਾਂ ਹੋਈਆਂ ਹਨ। ਅਮਰੀਕੀ ਰਾਸ਼ਟਰਪਤੀ ਬਾਈਡਨ ਨੇ ਵੀ ਇਸ ਹਮਲੇ ’ਤੇ ਸਖ਼ਤ ਪ੍ਰਤੀਕਿਰਿਆ ਦਿੱਤੀ ਹੈ ਅਤੇ ਕਿਹਾ ਹੈ ਕਿ ਇਸ ਦਾ ਢੁਕਵਾਂ ਜਵਾਬ ਦਿੱਤਾ ਜਾਵੇਗਾ। ਇਰਾਕ ਦੇ ਇਸਲਾਮਿਕ ਪ੍ਰਤੀਰੋਧ ਸਮੂਹ ਨੇ ਇਸ ਘਾਤਕ ਹਮਲੇ ਦੀ ਜ਼ਿੰਮੇਵਾਰੀ ਲਈ ਹੈ। ਇਰਾਕ ਵਿੱਚ ਇਸਲਾਮਿਕ ਪ੍ਰਤੀਰੋਧ ਕਈ ਸੰਗਠਨਾਂ ਦੇ ਗਠਜੋੜ ਦਾ ਨਾਮ ਹੈ, ਜਿਸ ਨੂੰ ਈਰਾਨ ਦਾ ਸਮਰਥਨ ਪ੍ਰਾਪਤ ਦੱਸਿਆ ਜਾਂਦਾ ਹੈ।