'ਪ੍ਰੈਗਨੈਂਸੀ ਬਾਈਬਲ' 'ਤੇ ਕਰੀਨਾ ਕਪੂਰ ਨੂੰ MP ਹਾਈ ਕੋਰਟ ਵੱਲੋਂ ਨੋਟਿਸ ਜਾਰੀ, ਧਾਰਮਿਕ ਭਾਵਨਾਵਾਂ ਨੂੰ ਠੇਸ ਪਹੁੰਚਾਉਣ ਦਾ ਇਲਜ਼ਾਮ

ਮੱਧ ਪ੍ਰਦੇਸ਼, 11 ਮਈ, ਪਰਦੀਪ ਸਿੰਘ: ਮੱਧ ਪ੍ਰਦੇਸ਼ ਹਾਈ ਕੋਰਟ (ਜਬਲਪੁਰ) ਨੇ ਬਾਲੀਵੁੱਡ ਅਦਾਕਾਰਾ ਕਰੀਨਾ ਕਪੂਰ ਖਾਨ ਦੀ ਕਿਤਾਬ 'ਕਰੀਨਾ ਕਪੂਰ ਖਾਨ ਪ੍ਰੈਗਨੈਂਸੀ ਬਾਈਬਲ' ਦੇ ਮਾਮਲੇ 'ਚ ਨੋਟਿਸ ਜਾਰੀ ਕੀਤਾ ਹੈ। ਜਸਟਿਸ ਜੀਐਸ ਆਹਲੂਵਾਲੀਆ ਦੀ ਸਿੰਗਲ ਬੈਂਚ ਨੇ ਕਿਤਾਬ ਦੀ ਸਹਿ-ਲੇਖਕ ਅਦਿਤੀ ਸ਼ਾਹ ਭੀਮਜਿਆਨੀ, ਅਮੇਜ਼ਨ ਇੰਡੀਆ ਅਤੇ ਜੁਗਰਨਾਟ ਬੁਕਸ ਤੋਂ ਵੀ ਜਵਾਬ ਮੰਗਿਆ ਹੈ। ਮਾਮਲੇ ਦੀ ਅਗਲੀ ਸੁਣਵਾਈ 1 ਜੁਲਾਈ ਨੂੰ ਹੋਵੇਗੀ।

ਐਡਵੋਕੇਟ ਕ੍ਰਿਸਟੋਫਰ ਐਂਥਨੀ ਨੇ 2022 ਵਿੱਚ ਹਾਈ ਕੋਰਟ ਵਿੱਚ ਪਟੀਸ਼ਨ ਦਾਇਰ ਕੀਤੀ ਸੀ। ਪਹਿਲੀ ਸੁਣਵਾਈ ਅਗਸਤ 2022 ਵਿੱਚ ਹੋਈ ਸੀ, ਜਦੋਂ ਹਾਈ ਕੋਰਟ ਨੇ ਰਾਜ ਸਰਕਾਰ ਨੂੰ ਵੀ ਇੱਕ ਧਿਰ ਬਣਾਉਣ ਲਈ ਕਿਹਾ ਸੀ। ਬਾਅਦ ਵਿੱਚ ਮਾਮਲਾ ਥੋੜ੍ਹਾ ਠੰਢਾ ਹੋ ਗਿਆ। ਐਂਥਨੀ ਵੱਲੋਂ ਅਦਾਲਤ ਵਿੱਚ ਆਪਣਾ ਮੰਗ ਪੱਤਰ ਸੌਂਪਣ ਤੋਂ ਬਾਅਦ 10 ਮਈ ਨੂੰ ਸੁਣਵਾਈ ਹੋਈ।

ਪਟੀਸ਼ਨ 'ਚ ਦਲੀਲ ਦਿੱਤੀ ਗਈ ਹੈ ਕਿ ਨਾਂ ਨਾਲ ਬਾਈਬਲ ਜੋੜਨ ਨਾਲ ਈਸਾਈ ਧਰਮ ਦੇ ਲੋਕਾਂ ਦੀਆਂ ਭਾਵਨਾਵਾਂ ਨੂੰ ਠੇਸ ਪਹੁੰਚੀ ਹੈ। ਐਂਥਨੀ ਦਾ ਕਹਿਣਾ ਹੈ ਕਿ ਬਾਈਬਲ ਈਸਾਈ ਧਰਮ ਦਾ ਧਾਰਮਿਕ ਗ੍ਰੰਥ ਹੈ। ਇਸ ਪਵਿੱਤਰ ਗ੍ਰੰਥ ਵਿੱਚ ਪ੍ਰਭੂ ਯਿਸੂ ਦੀਆਂ ਸਿੱਖਿਆਵਾਂ ਦਾ ਵਰਣਨ ਮਿਲਦਾ ਹੈ। ਕਰੀਨਾ ਦੀ ਕਿਤਾਬ ਵਿਚ ਬਾਈਬਲ ਦੀ ਵਰਤੋਂ ਦੁਖਦਾਈ ਹੈ।

ਇਹ ਕਿਤਾਬ ਤਿੰਨ ਸਾਲ ਪਹਿਲਾਂ ਹੋਈ ਲਾਂਚ

ਕਰੀਨਾ ਕਪੂਰ ਨੇ ਗਰਭ ਅਵਸਥਾ 'ਤੇ ਲਿਖੀ ਇਸ ਕਿਤਾਬ ਨੂੰ 9 ਅਗਸਤ 2021 ਨੂੰ ਲਾਂਚ ਕੀਤਾ ਸੀ। ਉਸਨੇ ਇਸ ਕਿਤਾਬ ਨੂੰ ਆਪਣਾ ਤੀਜਾ ਬੱਚਾ ਕਿਹਾ। ਕਿਤਾਬ ਦੇ ਲਾਂਚ 'ਤੇ ਉਸ ਨੇ ਕਰਨ ਜੌਹਰ ਨਾਲ ਆਨਲਾਈਨ ਚਰਚਾ ਕੀਤੀ ਅਤੇ ਗਰਭ ਅਵਸਥਾ ਦੌਰਾਨ ਜ਼ਿੰਦਗੀ 'ਚ ਆਏ ਉਤਰਾਅ-ਚੜ੍ਹਾਅ ਬਾਰੇ ਗੱਲ ਕੀਤੀ। ਕਰੀਨਾ ਨੇ ਦੱਸਿਆ ਕਿ ਦੂਜੀ ਪ੍ਰੈਗਨੈਂਸੀ ਉਨ੍ਹਾਂ ਲਈ ਪਹਿਲੀ ਪ੍ਰੈਗਨੈਂਸੀ ਦੇ ਮੁਕਾਬਲੇ ਜ਼ਿਆਦਾ ਮੁਸ਼ਕਲ ਸੀ।
ਕਰੀਨਾ ਨੇ 9 ਜੁਲਾਈ 2021 ਨੂੰ ਸੋਸ਼ਲ ਮੀਡੀਆ ਪਲੇਟਫਾਰਮ ਇੰਸਟਾਗ੍ਰਾਮ 'ਤੇ ਵੀਡੀਓ ਪੋਸਟ ਕੀਤਾ ਸੀ। ਉਹ ਪੁੱਛਦੀ ਹੈ, 'ਕੀ ਪਕਾਉਣਾ ਹੈ?' ਇਸ ਤੋਂ ਬਾਅਦ, ਉਹ ਮਾਈਕ੍ਰੋਵੇਵ ਤੋਂ ਕਿਤਾਬ ਕੱਢਦੀ ਹੈ ਅਤੇ ਕਹਿੰਦੀ ਹੈ, 'ਇਹ ਬੇਕਿੰਗ ਹੈ।' ਕੈਪਸ਼ਨ 'ਚ ਲਿਖਿਆ ਸੀ, 'ਮੇਰੀ ਗਰਭ ਅਵਸਥਾ ਅਤੇ ਮੇਰੀ 'ਪ੍ਰੈਗਨੈਂਸੀ ਬਾਈਬਲ' ਲਿਖਣਾ, ਇਹ ਇੱਕ ਯਾਤਰਾ ਰਹੀ ਹੈ।'

ਉਸ ਨੇ ਲਿਖਿਆ, 'ਕੁਝ ਚੰਗੇ ਦਿਨ ਸਨ ਅਤੇ ਕੁਝ ਬੁਰੇ ਦਿਨ, ਕੁਝ ਦਿਨ ਮੈਂ ਕੰਮ 'ਤੇ ਜਾਣ ਲਈ ਉਤਸੁਕ ਸੀ, ਪਰ ਕੁਝ ਦਿਨ ਮੈਂ ਬਿਸਤਰੇ ਤੋਂ ਉੱਠਣ ਲਈ ਵੀ ਸੰਘਰਸ਼ ਕਰ ਰਹੀ ਸੀ। ਇਹ ਕਿਤਾਬ ਮੇਰੀਆਂ ਦੋਹਾਂ ਗਰਭ-ਅਵਸਥਾਵਾਂ ਦੌਰਾਨ ਮੇਰੇ ਸਰੀਰਕ ਅਤੇ ਭਾਵਨਾਤਮਕ ਅਨੁਭਵਾਂ ਦਾ ਵਰਣਨ ਕਰਦੀ ਹੈ। ਇਹ ਬਹੁਤ ਨਿੱਜੀ ਵੇਰਵੇ ਹਨ। ਕਈ ਤਰੀਕਿਆਂ ਨਾਲ ਇਹ ਕਿਤਾਬ ਮੇਰੇ ਤੀਜੇ ਬੱਚੇ ਵਰਗੀ ਹੈ, ਇਸ ਦੇ ਸੰਕਲਪ ਤੋਂ ਲੈ ਕੇ ਅੱਜ ਦੇ ਜਨਮ ਤੱਕ।