7 ਸਾਲਾਂ ਦੇ ਪਿਆਰ ਦਾ 'ਭਿਅੰਕਰ ਅੰਤ', ਲਿਵ-ਇਨ ਪਾਰਟਨਰ ਦਾ ਗਲਾ ਵੱਢਿਆ

ਨਵੀਂ ਦਿੱਲੀ : ਰਾਜਧਾਨੀ ਦਿੱਲੀ 'ਚ ਪ੍ਰੇਮ ਸਬੰਧਾਂ 'ਚ ਖੂਨ-ਖਰਾਬੇ ਦਾ ਇਕ ਹੋਰ ਸਨਸਨੀਖੇਜ਼ ਮਾਮਲਾ ਸਾਹਮਣੇ ਆਇਆ ਹੈ। ਇੱਥੇ ਦਰਿੰਦੇ ਬਣੇ ਪਾਗਲ ਪ੍ਰੇਮੀ ਨੇ ਆਪਣੇ ਲਿਵ-ਇਨ ਪਾਰਟਨਰ ਦੇ ਗਲੇ ਨੂੰ ਇਸ ਤਰ੍ਹਾਂ ਵੱਢ ਦਿਤਾ ਕਿ ਹਾਲਤ ਦੇਖ ਕੇ Police ਅਤੇ ਡਾਕਟਰ ਵੀ ਕੰਬ ਗਏ। ਔਰਤ ਨੂੰ ਗੰਭੀਰ ਹਾਲਤ ਵਿਚ ਹਿੰਦੂ ਰਾਓ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਉਸ ਨੂੰ ਆਪਣੀ ਜਾਨ ਬਚਾਉਣ ਲਈ 850 ਤੋਂ ਵੱਧ ਟਾਂਕੇ ਲਗਾਉਣੇ ਪਏ।

ਉੱਤਰੀ ਦਿੱਲੀ ਦੇ ਰੂਪਨਗਰ ਇਲਾਕੇ 'ਚ ਕਿਸੇ ਹੋਰ ਨਾਲ ਅਫੇਅਰ ਹੋਣ ਦੇ ਸ਼ੱਕ 'ਚ 27 ਸਾਲਾ ਵਿਅਕਤੀ ਨੂੰ ਆਪਣੇ ਲਿਵ-ਇਨ ਪਾਰਟਨਰ 'ਤੇ ਹਮਲਾ ਕਰਨ ਦੇ ਦੋਸ਼ 'ਚ ਗ੍ਰਿਫਤਾਰ ਕੀਤਾ ਗਿਆ ਹੈ। ਮੁਲਜ਼ਮ ਦੀ ਪਛਾਣ ਰਿੰਕੂ ਵਾਸੀ ਅਲੀਗੜ੍ਹ, ਉੱਤਰ ਪ੍ਰਦੇਸ਼ ਵਜੋਂ ਹੋਈ ਹੈ। ਸ਼ਨੀਵਾਰ ਨੂੰ ਹੋਈ ਘਟਨਾ ਦੀ ਜਾਣਕਾਰੀ ਦਿੰਦੇ ਹੋਏ Police ਨੇ ਦੱਸਿਆ ਕਿ ਮਹਿਲਾ ਨੂੰ 850 ਤੋਂ ਜ਼ਿਆਦਾ ਟਾਂਕੇ ਲੱਗੇ ਸਨ।

ਔਰਤ ਆਪਣੇ ਪਤੀ ਤੋਂ ਵੱਖ ਰਹਿੰਦੀ ਸੀ

ਪੁਲੀਸ ਅਨੁਸਾਰ ਜਵਾਹਰ ਨਗਰ, ਕਮਲਾ ਨਗਰ ਵਾਸੀ ਭਰਤ ਨੇ ਦੱਸਿਆ ਸੀ ਕਿ ਉਸ ਦੀ ਭੈਣ ਦਾ ਵਿਆਹ 2011 ਵਿੱਚ ਹੋਇਆ ਸੀ ਪਰ ਕੁਝ ਝਗੜਿਆਂ ਕਾਰਨ ਪਤੀ-ਪਤਨੀ ਵੱਖ-ਵੱਖ ਰਹਿਣ ਲੱਗ ਪਏ ਸਨ। ਇਸ ਤੋਂ ਬਾਅਦ ਔਰਤ ਜਵਾਹਰ ਨਗਰ 'ਚ ਰਹਿਣ ਲੱਗੀ।

ਪੁਲੀਸ ਅਧਿਕਾਰੀਆਂ ਅਨੁਸਾਰ ਛੇ-ਸੱਤ ਸਾਲ ਪਹਿਲਾਂ ਭਰਤ ਦੀ ਭੈਣ ਨੂੰ ਕਮਲਾ ਨਗਰ ਵਿੱਚ ਜੁੱਤੀਆਂ ਦੀ ਦੁਕਾਨ ’ਤੇ ਕੰਮ ਕਰਨ ਵਾਲੇ ਰਿੰਕੂ ਨਾਂ ਦੇ ਨੌਜਵਾਨ ਨਾਲ ਪਿਆਰ ਹੋ ਗਿਆ ਸੀ। ਇਸ ਤੋਂ ਬਾਅਦ ਦੋਵੇਂ ਇਕੱਠੇ ਲਿਵ-ਇਨ ਰਿਲੇਸ਼ਨਸ਼ਿਪ 'ਚ ਰਹਿਣ ਲੱਗੇ। ਹਾਲਾਂਕਿ ਕੁਝ ਸਮੇਂ ਬਾਅਦ ਉਨ੍ਹਾਂ ਵਿਚਕਾਰ ਲੜਾਈ ਹੋ ਗਈ ਅਤੇ ਔਰਤ ਰਿੰਕੂ ਨੂੰ ਛੱਡ ਕੇ ਕਮਲਾ ਨਗਰ ਸਥਿਤ ਪੀਜੀ 'ਚ ਰਹਿਣ ਲੱਗੀ।

ਪੀਜੀ ਜਾ ਕੇ ਗਲਾ ਵੱਢਿਆ ਸੀ

ਅਧਿਕਾਰੀ ਨੇ ਦੱਸਿਆ ਕਿ 15 ਅਪ੍ਰੈਲ ਨੂੰ ਸਵੇਰੇ ਕਰੀਬ 9:15 ਵਜੇ ਭਰਤ ਨੂੰ ਪੀਜੀ ਤੋਂ ਫ਼ੋਨ ਆਇਆ ਕਿ ਕਿਸੇ ਨੇ ਉਸਦੀ ਭੈਣ 'ਤੇ ਹਮਲਾ ਕਰਕੇ ਉਸਦਾ ਗਲਾ ਵੱਢ ਦਿੱਤਾ ਹੈ। ਜਦੋਂ ਉਹ ਮੌਕੇ 'ਤੇ ਪਹੁੰਚੇ ਤਾਂ ਔਰਤ ਖੂਨ ਨਾਲ ਲੱਥਪੱਥ ਪਈ ਸੀ ਅਤੇ ਉਸ ਦੀ ਗਰਦਨ ਅਤੇ ਪੂਰੇ ਸਰੀਰ 'ਤੇ ਡੂੰਘੀਆਂ ਸੱਟਾਂ ਦੇ ਨਿਸ਼ਾਨ ਸਨ। ਪੁਲੀਸ ਅਨੁਸਾਰ ਉਸ ਨੂੰ ਤੁਰੰਤ ਨੇੜਲੇ ਹਿੰਦੂ ਰਾਓ ਹਸਪਤਾਲ ਲਿਜਾਇਆ ਗਿਆ ਜਿੱਥੇ ਡਾਕਟਰਾਂ ਵੱਲੋਂ ਔਰਤ ਨੂੰ 850 ਤੋਂ ਵੱਧ ਟਾਂਕੇ ਦਿੱਤੇ ਗਏ।

ਵਿਸ਼ੇਸ਼ ਪੁਲੀਸ ਕਮਿਸ਼ਨਰ (ਅਪਰਾਧ) ਰਵਿੰਦਰ ਸਿੰਘ ਯਾਦਵ ਨੇ ਦੱਸਿਆ ਕਿ ਮੁਲਜ਼ਮ ਉਦੋਂ ਤੋਂ ਹੀ ਫਰਾਰ ਸੀ, ਪਰ ਉਹ ਆਪਣੇ ਸਾਥੀਆਂ ਦੇ ਵੱਖ-ਵੱਖ ਨੰਬਰਾਂ ਤੋਂ ਆਪਣੇ ਨਜ਼ਦੀਕੀ ਰਿਸ਼ਤੇਦਾਰਾਂ ਨਾਲ ਗੱਲ ਕਰਦਾ ਸੀ। ਉਨ੍ਹਾਂ ਦੱਸਿਆ ਕਿ ਮੁਲਜ਼ਮ ਦਾ ਟਿਕਾਣਾ ਗੁਜਰਾਤ ਦੇ ਸ਼ੇਪਰ ਇੰਡਸਟਰੀਅਲ ਏਰੀਆ ਵਿੱਚ ਮਿਲਿਆ ਹੈ। ਇਸ ਤੋਂ ਬਾਅਦ ਦਿੱਲੀ ਪੁਲਿਸ ਦੀ ਟੀਮ ਨੇ ਛਾਪਾ ਮਾਰ ਕੇ ਉਸ ਨੂੰ ਫੜ ਲਿਆ। ਯਾਦਵ ਅਨੁਸਾਰ ਰਿੰਕੂ ਨੇ ਇਸ ਮਾਮਲੇ ਵਿੱਚ ਆਪਣੀ ਸ਼ਮੂਲੀਅਤ ਕਬੂਲ ਕਰ ਲਈ ਹੈ।