ਜਗਨਨਾਥ ਪੁਰੀ ਮੰਦਰ ਵਿਚ 1 ਜਨਵਰੀ ਤੋਂ ਡਰੈਸ ਕੋਡ ਲਾਗੂ

ਪੁਰੀ, 10 ਅਕਤੂਬਰ, ਨਿਰਮਲ : ਓਡੀਸ਼ਾ ਦੇ ਜਗਨਨਾਥ ਮੰਦਰ ਦੇ ਦਰਸ਼ਨਾਂ ਲਈ ਜਾਣ ਵਾਲੇ ਸ਼ਰਧਾਲੂਆਂ ਨੂੰ ਹੁਣ ਡਰੈਸ ਕੋਡ ਦੀ ਪਾਲਣਾ ਕਰਨੀ ਪਵੇਗੀ। ਮੰਦਰ ਪ੍ਰਬੰਧਨ ਨੇ ਸੋਮਵਾਰ ਨੂੰ ਦੱਸਿਆ ਕਿ ਡਰੈੱਸ ਕੋਡ ਅਗਲੇ ਸਾਲ 1 ਜਨਵਰੀ ਤੋਂ ਲਾਗੂ ਹੋ ਜਾਵੇਗਾ। ਭਗਤਾਂ ਨੂੰ ਅੱਜ ਤੋਂ ਹੀ ਡਰੈੱਸ ਕੋਡ ਬਾਰੇ ਜਾਗਰੂਕ ਕੀਤਾ ਜਾਵੇਗਾ।

ਕੋਡ ਲਾਗੂ ਹੋਣ ਤੋਂ ਬਾਅਦ ਲੋਕ ਹਾਫ ਪੈਂਟ, ਫਟੇ ਜੀਨਸ, ਸਕਰਟ ਅਤੇ ਸਲੀਵਲੈਸ ਕੱਪੜੇ ਪਾ ਕੇ ਜਗਨਨਾਥ ਮੰਦਰ ਨਹੀਂ ਜਾ ਸਕਣਗੇ। ਇਹ ਫੈਸਲਾ ਮੰਦਰ ਦੀ ਨੀਤੀ ਸਬ-ਕਮੇਟੀ ਦੀ ਮੀਟਿੰਗ ਵਿੱਚ ਲਿਆ ਗਿਆ ਹੈ।

ਹਾਲਾਂਕਿ ਮੰਦਰ ’ਚ ਕਿਸ ਤਰ੍ਹਾਂ ਦੇ ਕੱਪੜੇ ਪਹਿਨਣ ਦੀ ਇਜਾਜ਼ਤ ਦਿੱਤੀ ਜਾਵੇਗੀ, ਇਸ ਬਾਰੇ ਅਜੇ ਫੈਸਲਾ ਨਹੀਂ ਹੋਇਆ ਹੈ। ਜਗਨਨਾਥ ਮੰਦਰ ਦੇ ਪ੍ਰਬੰਧਕੀ ਮੁਖੀ ਰੰਜਨ ਕੁਮਾਰ ਦਾਸ ਨੇ ਦੱਸਿਆ ਕਿ ਕੁਝ ਲੋਕ ਅਸ਼ਲੀਲ ਕੱਪੜੇ ਪਾ ਕੇ ਮੰਦਰ ਦੇ ਅੰਦਰ ਆਉਂਦੇ ਹਨ।

ਕੁਝ ਲੋਕ ਹਾਫ ਪੈਂਟ ਅਤੇ ਸਲੀਵਲੈਸ ਕੱਪੜਿਆਂ ਵਿਚ ਇਸ ਤਰ੍ਹਾਂ ਆਉਂਦੇ ਹਨ, ਜਿਵੇਂ ਉਹ ਬੀਚ ਜਾਂ ਪਾਰਕ ਵਿਚ ਸੈਰ ਕਰਨ ਆਏ ਹੋਣ। ਇਹ ਮਨੋਰੰਜਨ ਲਈ ਜਗ੍ਹਾ ਨਹੀਂ ਹੈ। ਇਸ ਨਾਲ ਹੋਰਨਾਂ ਲੋਕਾਂ ਦੀਆਂ ਧਾਰਮਿਕ ਭਾਵਨਾਵਾਂ ਨੂੰ ਠੇਸ ਪਹੁੰਚਦੀ ਹੈ। ਜਗਨਨਾਥ ਮੰਦਰ ਪ੍ਰਬੰਧਕਾਂ ਦੇ ਮੁਖੀ ਨੇ ਕਿਹਾ ਕਿ ਮੰਦਰ ਦੀ ਮਰਿਆਦਾ ਅਤੇ ਪਵਿੱਤਰਤਾ ਨੂੰ ਕਾਇਮ ਰੱਖਣਾ ਸਾਡੀ ਜ਼ਿੰਮੇਵਾਰੀ ਹੈ। ਇਸ ਲਈ 1 ਜਨਵਰੀ 2024 ਤੋਂ ਡਰੈਸ ਕੋਡ ਦੀ ਸਖ਼ਤੀ ਨਾਲ ਪਾਲਣਾ ਕੀਤੀ ਜਾਵੇਗੀ। ਇਸ ਦੀ ਨਿਗਰਾਨੀ ਮੰਦਰ ਦੇ ਸ਼ੇਰ ਗੇਟ ’ਤੇ ਤਾਇਨਾਤ ਸੁਰੱਖਿਆ ਬਲਾਂ ਅਤੇ ਮੰਦਰ ਦੇ ਅੰਦਰ ਪ੍ਰਤੀਹਾਰੀ ਸੇਵਕਾਂ ਵੱਲੋਂ ਕੀਤੀ ਜਾਵੇਗੀ।

ਇਸ ਸਾਲ ਜੁਲਾਈ ’ਚ ਗੁਜਰਾਤ ਦੇ ਦਵਾਰਕਾਧੀਸ਼ ਮੰਦਰ ’ਚ ਸ਼ਰਧਾਲੂਆਂ ਲਈ ਡਰੈੱਸ ਕੋਡ ਲਾਗੂ ਕੀਤਾ ਗਿਆ ਸੀ। ਮੰਦਰ ਦੇ ਬਾਹਰ ਡਰੈਸ ਕੋਡ ਸਬੰਧੀ ਗੁਜਰਾਤੀ, ਹਿੰਦੀ ਅਤੇ ਅੰਗਰੇਜ਼ੀ ਵਿੱਚ ਲਿਖੇ ਬੋਰਡ ਵੀ ਲਾਏ ਗਏ ਸਨ। ਇਸ ’ਤੇ ਲਿਖਿਆ ਹੋਇਆ ਸੀ ਕਿ ਮੰਦਰ ਦਰਸ਼ਨ ਦੀ ਜਗ੍ਹਾ ਹੈ, ਪ੍ਰਦਰਸ਼ਨੀ ਲਈ ਨਹੀਂ। ਮੰਦਿਰ ਵਿੱਚ ਆਉਣ ਵਾਲੇ ਸਾਰੇ ਸ਼ਰਧਾਲੂਆਂ ਨੂੰ ਸਾਦੇ ਕੱਪੜਿਆਂ ਵਿੱਚ ਹੀ ਪ੍ਰਵੇਸ਼ ਕਰਨ ਦੀ ਅਪੀਲ ਕੀਤੀ ਜਾਂਦੀ ਹੈ। ਛੋਟੇ ਕੱਪੜੇ, ਹਾਫ ਪੈਂਟ, ਮਿੰਨੀ ਟਾਪ, ਮਿੰਨੀ ਸਕਰਟ, ਨਾਈਟ ਸੂਟ, ਫਰੌਕ ਅਤੇ ਰਿਪਡ ਜੀਨਸ ਵਰਗੇ ਕੱਪੜੇ ਪਹਿਨਣ ਵਾਲੇ ਲੋਕਾਂ ਨੂੰ ਮੰਦਰ ਵਿੱਚ ਦਾਖਲ ਹੋਣ ਦੀ ਇਜਾਜ਼ਤ ਨਹੀਂ ਹੋਵੇਗੀ।
ਮੱਧ ਪ੍ਰਦੇਸ਼ ਦੇ ਉਜੈਨ ਵਿੱਚ ਮਹਾਕਾਲ ਮੰਦਿਰ ਦੇ ਪਾਵਨ ਅਸਥਾਨ ਵਿੱਚ ਆਮ ਸ਼ਰਧਾਲੂਆਂ ਲਈ ਸਤੰਬਰ ਵਿੱਚ ਡਰੈੱਸ ਕੋਡ ਲਾਗੂ ਕੀਤਾ ਗਿਆ ਸੀ। ਡਰੈੱਸ ਕੋਡ ਤਹਿਤ ਮਰਦਾਂ ਨੂੰ ਧੋਤੀ-ਸੋਲਾ ਅਤੇ ਔਰਤਾਂ ਨੂੰ ਸਾੜ੍ਹੀ ਪਹਿਨਣੀ ਜ਼ਰੂਰੀ ਹੈ। ਇਸ ਤੋਂ ਪਹਿਲਾਂ, ਪਹਿਰਾਵੇ ਦਾ ਕੋਡ ਸਿਰਫ ਖਾਸ ਦਿਨਾਂ ’ਤੇ ਲਾਜ਼ਮੀ ਸੀ, ਭਾਵ ਜਦੋਂ ਪ੍ਰਕਾਸ਼ ਅਸਥਾਨ ’ਚ ਆਮ ਸ਼ਰਧਾਲੂਆਂ ਦਾ ਦਾਖਲਾ ਬੰਦ ਸੀ। ਭਾਵ, ਪਾਵਨ ਅਸਥਾਨ ਵਿੱਚ ਦਾਖਲ ਹੋਣ ਵਾਲਿਆਂ ਨੂੰ ਧੋਤੀ ਅਤੇ ਸੋਲਾ ਪਹਿਨਣਾ ਪੈਂਦਾ ਸੀ।