ਇਜ਼ਰਾਈਲ ਨੇ ਗਾਜ਼ਾ ਦੇ ਕੁੱਝ ਖੇਤਰਾਂ ’ਤੇ ਕੀਤਾ ਕਬਜ਼ਾ

ਯੇਰੂਸ਼ਲਮ, 12 ਅਕਤੂਬਰ, ਨਿਰਮਲ : ਇਜ਼ਰਾਈਲ ਤੇ ਹਮਾਸ ਵਿਚ ਜੰਗ ਲਤਾਗਾਰ ਚਲ ਰਹੀ ਹੈ। ਇਸ ਦੌਰਾਨ ਇਜ਼ਰਾਇਲੀ ਬੰਬਾਰੀ ਕਾਰਨ ਗਾਜ਼ਾ ਸ਼ਹਿਰ ਖੰਡਰ ਵਿੱਚ ਬਦਲ ਗਿਆ ਹੈ। ਇਜ਼ਰਾਇਲੀ ਹਵਾਈ ਸੈਨਾ ਨੇ ਬੁੱਧਵਾਰ ਨੂੰ 200 ਟਿਕਾਣਿਆਂ ’ਤੇ ਬੰਬਾਰੀ ਕੀਤੀ। ਇਜ਼ਰਾਈਲ ’ਤੇ ਹਮਲੇ ਦੇ ਮਾਸਟਰਮਾਈਂਡ ਹਮਾਸ ਦੇ ਫੌਜੀ ਮੁਖੀ ਮੁਹੰਮਦ ਦੀਫ ਦੇ ਪਿਤਾ ਦਾ ਘਰ ਢਾਹ ਦਿੱਤਾ ਗਿਆ ਸੀ। ਇਸ ਵਿੱਚ ਦੀਫ ਦੇ ਪਿਤਾ, ਭਰਾ ਅਤੇ ਰਿਸ਼ਤੇਦਾਰਾਂ ਦੀ ਮੌਤ ਹੋ ਗਈ ਸੀ। ਇਸਲਾਮਿਕ ਯੂਨੀਵਰਸਿਟੀ ’ਤੇ ਵੀ ਬੰਬਾਰੀ ਕੀਤੀ, ਜਿੱਥੇ ਹਮਾਸ ਅੱਤਵਾਦੀਆਂ ਨੂੰ ਸਿਖਲਾਈ ਦਿੰਦਾ ਸੀ ਅਤੇ ਹਥਿਆਰ ਬਣਾਉਂਦਾ ਸੀ। ਨਾਲ ਹੀ ਪੂਰੇ ਗਾਜ਼ਾ ਨੂੰ ਟੈਂਟ ਸਿਟੀ ਵਿੱਚ ਬਦਲਣ ਦੀ ਚਿਤਾਵਨੀ ਦਿੱਤੀ ਹੈ।

ਇਸ ਦੌਰਾਨ ਪ੍ਰਧਾਨ ਮੰਤਰੀ ਬੈਂਜਾਮਿਨ ਨੇਤਨਯਾਹੂ ਅਤੇ ਵਿਰੋਧੀ ਧਿਰ ਦੇ ਨੇਤਾ ਬੈਨੀ ਗੈਂਟਜ਼ ਨੇ ਹਮਾਸ ਵਿਰੁੱਧ ਮੁਹਿੰਮ ਦੀ ਨਿਗਰਾਨੀ ਕਰਨ ਲਈ ਐਮਰਜੈਂਸੀ ਏਕਤਾ ਸਰਕਾਰ ਬਣਾਈ ਹੈ। ਰੱਖਿਆ ਮੰਤਰੀ ਦੇ ਨਾਲ ਦੋ ਹੋਰ ਉੱਚ ਅਧਿਕਾਰੀ ਵੀ ਹੋਣਗੇ। ਦੂਜੇ ਪਾਸੇ ਇਜ਼ਰਾਈਲ ਨੇ ਗਾਜ਼ਾ ਨਾਲ ਹਰ ਪਾਸਿਓਂ ਸੰਪਰਕ ਕੱਟ ਦਿੱਤਾ ਹੈ। ਗਾਜ਼ਾ ਦਾ ਇਕਲੌਤਾ ਪਾਵਰ ਪਲਾਂਟ ਵੀ ਈਂਧਨ ਖਤਮ ਹੋਣ ਕਾਰਨ ਠੱਪ ਹੋ ਗਿਆ। ਫਿਲਸਤੀਨੀ ਆਪਣੀ ਜਾਨ ਬਚਾਉਣ ਲਈ ਗਾਜ਼ਾ ਪੱਟੀ ਤੋਂ ਭੱਜ ਰਹੇ ਹਨ।

ਇਜ਼ਰਾਈਲ ਦੇ ਰੱਖਿਆ ਮੰਤਰੀ ਯੋਵ ਗੈਲੈਂਟ ਨੇ ਕਿਹਾ ਕਿ ਗਾਜ਼ਾ ਹੁਣ ਉਹ ਨਹੀਂ ਰਹੇਗਾ ਜੋ ਪਹਿਲਾਂ ਸੀ। ਹੁਣ ਅਸਮਾਨ ਤੋਂ ਹਮਲੇ ਹੋਏ ਹਨ, ਹੁਣ ਜ਼ਮੀਨ ਤੋਂ ਵੀ ਹਮਲੇ ਹੋਣਗੇ। ਇਜ਼ਰਾਇਲੀ ਫੌਜ ਦੇ ਬੁਲਾਰੇ ਲੈਫਟੀਨੈਂਟ. ਕਰਨਲ ਜੋਨਾਥਨ ਕੋਨਰਿਕਸ ਨੇ ਕਿਹਾ, ਗਾਜ਼ਾ ਸਰਹੱਦ ’ਤੇ ਬਖਤਰਬੰਦ ਵਾਹਨਾਂ ਅਤੇ ਤੋਪਖਾਨੇ ਨਾਲ ਲੈਸ ਤਿੰਨ ਲੱਖ ਸੈਨਿਕ ਤਾਇਨਾਤ ਹਨ। ਆਰਡਰ ਮਿਲਦੇ ਹੀ ਉਹ ਕਾਰਵਾਈ ਸ਼ੁਰੂ ਕਰ ਦੇਣਗੇ। ਸਾਡਾ ਟੀਚਾ ਹਮਾਸ ਦੀ ਫੌਜੀ ਸਮਰੱਥਾ ਨੂੰ ਪੂਰੀ ਤਰ੍ਹਾਂ ਨਸ਼ਟ ਕਰਨਾ ਹੈ ਤਾਂ ਜੋ ਇਹ ਭਵਿੱਖ ਵਿੱਚ ਖ਼ਤਰਾ ਨਾ ਬਣ ਸਕੇ। ਦੂਜੇ ਪਾਸੇ ਲੇਬਨਾਨ ਤੋਂ ਵੀ ਇਜ਼ਰਾਇਲੀ ਇਲਾਕਿਆਂ ’ਤੇ ਹਮਲੇ ਜਾਰੀ ਹਨ। ਇਜ਼ਰਾਇਲੀ ਫੌਜੀ ਚੌਕੀ ’ਤੇ ਐਂਟੀ-ਟੈਂਕ ਮਿਜ਼ਾਈਲਾਂ ਵੀ ਦਾਗੀਆਂ ਗਈਆਂ।

ਗਾਜ਼ਾ ਪੱਟੀ ’ਤੇ ਇਜ਼ਰਾਇਲੀ ਜੰਗੀ ਜਹਾਜ਼ਾਂ ਦੀ ਬੰਬਾਰੀ ਕਾਰਨ ਇਮਾਰਤਾਂ ਮਲਬੇ ’ਚ ਬਦਲ ਗਈਆਂ। ਲੋਕਾਂ ਨੂੰ ਇੱਕ ਛੋਟੇ ਅਤੇ ਸੀਲ ਖੇਤਰ ਵਿੱਚ ਸੁਰੱਖਿਆ ਲੱਭਣ ਲਈ ਭੇਜਿਆ ਗਿਆ ਸੀ। ਸ਼ਨੀਵਾਰ ਨੂੰ ਹਮਾਸ ਦੇ ਅੱਤਵਾਦੀਆਂ ਵੱਲੋਂ ਸ਼ੁਰੂ ਕੀਤੀ ਗਈ ਜੰਗ ਤੋਂ ਬਾਅਦ ਇੱਥੋਂ ਦੇ ਲੋਕਾਂ ਨੂੰ ਇਜ਼ਰਾਈਲ ਦੀ ਸਖਤ ਜਵਾਬੀ ਕਾਰਵਾਈ ਦਾ ਸਾਹਮਣਾ ਕਰਨ ਲਈ ਮਜਬੂਰ ਹੋਣਾ ਪੈ ਰਿਹਾ ਹੈ। ਮਾਨਵਤਾਵਾਦੀ ਸਮੂਹਾਂ ਨੇ ਗਾਜ਼ਾ ਵਿੱਚ ਸਹਾਇਤਾ ਪ੍ਰਾਪਤ ਕਰਨ ਲਈ ਗਲਿਆਰੇ ਬਣਾਉਣ ਦੀ ਅਪੀਲ ਕੀਤੀ ਅਤੇ ਚੇਤਾਵਨੀ ਦਿੱਤੀ ਕਿ ਜ਼ਖਮੀਆਂ ਨਾਲ ਭਰੇ ਹਸਪਤਾਲਾਂ ਵਿੱਚ ਸਪਲਾਈ ਖਤਮ ਹੋ ਰਹੀ ਹੈ।