Tiger Death: ਸ਼ਿਕਾਰੀਆਂ ਦੇ ਜਾਲ ਦਾ ਸ਼ਿਕਾਰ ਹੋਇਆ 7 ਸਾਲਾ ਟਾਈਗਰ, ਹੋਈ ਦਰਦਨਾਕ ਮੌਤ
ਜੰਗਲ ਵਿੱਚ ਮ੍ਰਿਤ ਪਾਇਆ ਗਿਆ
By : Annie Khokhar
Tiger Found Dead In Jungle: ਛੱਤੀਸਗੜ੍ਹ ਦੇ ਸੂਰਜਪੁਰ ਜ਼ਿਲ੍ਹੇ ਵਿੱਚ ਇੱਕ ਦੁਖਦਾਈ ਘਟਨਾ ਵਾਪਰੀ ਹੈ, ਜਿੱਥੇ ਘੂਈ ਜੰਗਲਾਤ ਰੇਂਜ ਵਿੱਚ ਇੱਕ 7 ਸਾਲ ਦੇ ਟਾਈਗਰ ਜਾਂ ਬਾਘ ਦੀ ਮੌਤ ਹੋ ਗਈ। ਟਾਈਗਰ ਦੀ ਮੌਤ ਸੰਭਾਵਤ ਤੌਰ 'ਤੇ ਬਿਜਲੀ ਦਾ ਕਰੰਟ ਲੱਗਣ ਕਾਰਨ ਹੋਈ ਹੈ। ਜੰਗਲਾਤ ਵਿਭਾਗ ਦੇ ਅਧਿਕਾਰੀਆਂ ਨੇ ਦੱਸਿਆ ਕਿ ਇਹ ਘਟਨਾ ਸੋਮਵਾਰ ਸਵੇਰੇ ਵਾਪਰੀ। ਘੂਈ ਜੰਗਲਾਤ ਰੇਂਜ ਦੇ ਭੈਂਸਮੁੰਡਾ ਪਿੰਡ ਦੇ ਜੰਗਲ ਵਿੱਚ ਲਗਭਗ ਸੱਤ ਸਾਲ ਦੇ ਬਾਘ ਦੀ ਲਾਸ਼ ਮਿਲੀ।
ਅਧਿਕਾਰੀਆਂ ਦੇ ਅਨੁਸਾਰ, ਜੰਗਲਾਤ ਵਿਭਾਗ ਨੂੰ ਜੰਗਲ ਵਿੱਚ ਬਾਘ ਦੀ ਮੌਤ ਬਾਰੇ ਸੂਚਨਾ ਮਿਲੀ, ਜਿਸ ਤੋਂ ਬਾਅਦ ਇੱਕ ਟੀਮ ਤੁਰੰਤ ਘਟਨਾ ਸਥਾਨ 'ਤੇ ਭੇਜੀ ਗਈ। ਜੰਗਲਾਤ ਕਰਮਚਾਰੀਆਂ ਨੇ ਮ੍ਰਿਤਕ ਬਾਘ ਨੂੰ ਬਰਾਮਦ ਕਰ ਲਿਆ ਅਤੇ ਜਾਂਚ ਲਈ ਪੂਰੇ ਖੇਤਰ ਨੂੰ ਸੁਰੱਖਿਅਤ ਕਰ ਲਿਆ।
ਬਿਜਲੀ ਦੀਆਂ ਤਾਰਾਂ ਦਾ ਸ਼ਿਕਾਰ ਹੋਇਆ ਟਾਈਗਰ
ਅਧਿਕਾਰੀਆਂ ਨੇ ਬਾਘ ਦੀ ਮੌਤ ਦੇ ਸ਼ੁਰੂਆਤੀ ਕਾਰਨਾਂ ਬਾਰੇ ਸ਼ੱਕ ਪ੍ਰਗਟ ਕਰਦੇ ਹੋਏ ਕਿਹਾ, "ਸ਼ੁਰੂਆਤੀ ਜਾਂਚ ਵਿੱਚ ਇਹ ਲੱਗ ਰਿਹਾ ਹੈ ਕਿ ਬਾਘ ਦੀ ਮੌਤ ਸ਼ਿਕਾਰੀਆਂ ਦੁਆਰਾ ਜੰਗਲੀ ਸੂਰਾਂ ਵਰਗੇ ਛੋਟੇ ਜਾਨਵਰਾਂ ਨੂੰ ਮਾਰਨ ਲਈ ਗੈਰ-ਕਾਨੂੰਨੀ ਤੌਰ 'ਤੇ ਵਿਛਾਈ ਗਈ ਬਿਜਲੀ ਦੀ ਤਾਰ ਦੇ ਸੰਪਰਕ ਵਿੱਚ ਆਉਣ ਕਾਰਨ ਹੋਈ। ਇਹ ਜੰਗਲੀ ਜੀਵਾਂ ਦਾ ਸ਼ਿਕਾਰ ਕਰਨ ਦਾ ਇੱਕ ਆਮ ਤਰੀਕਾ ਹੈ।" ਹਾਲਾਂਕਿ, ਅਧਿਕਾਰੀਆਂ ਨੇ ਸਪੱਸ਼ਟ ਕੀਤਾ ਕਿ ਪੋਸਟਮਾਰਟਮ ਰਿਪੋਰਟ ਆਉਣ ਤੋਂ ਬਾਅਦ ਹੀ ਬਾਘ ਦੀ ਮੌਤ ਦਾ ਸਹੀ ਕਾਰਨ ਪਤਾ ਲੱਗੇਗਾ।
ਜਾਂਚ ਲਈ ਇੱਕ ਬਣਾਈ ਗਈ ਟੀਮ
ਜੰਗਲਾਤ ਵਿਭਾਗ ਨੇ ਮ੍ਰਿਤਕ ਬਾਘ ਦਾ ਪੋਸਟਮਾਰਟਮ ਕਰਨ ਲਈ ਇੱਕ ਵਿਸ਼ੇਸ਼ ਟੀਮ ਬਣਾਈ ਹੈ। ਪੋਸਟਮਾਰਟਮ ਰਿਪੋਰਟ ਤੋਂ ਬਾਅਦ ਹੀ ਇਹ ਪੁਸ਼ਟੀ ਹੋ ਸਕੇਗੀ ਕਿ ਬਾਘ ਦੀ ਮੌਤ ਬਿਜਲੀ ਦੇ ਕਰੰਟ ਨਾਲ ਹੋਈ ਹੈ ਜਾਂ ਕਿਸੇ ਹੋਰ ਕਾਰਨ ਕਰਕੇ। ਜੰਗਲਾਤ ਵਿਭਾਗ ਨੇ ਇਸ ਮਾਮਲੇ ਵਿੱਚ ਸ਼ਿਕਾਰੀਆਂ ਦੀ ਸ਼ਮੂਲੀਅਤ ਦੀ ਵੀ ਡੂੰਘਾਈ ਨਾਲ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।
