ਕੁੱਲੂ 'ਚ ਵੱਡਾ ਹਾਦਸਾ: ਜ਼ਮੀਨ ਖਿਸਕਣ ਨਾਲ ਕਰੋੜਾਂ ਦੀ ਇਮਾਰਤ ਢਹਿ-ਢੇਰੀ

ਨਾਲ ਲੱਗਦਾ ਹੋਟਲ ਖਾਲੀ ਕਰਵਾਇਆ

ਜਵਾਹਰ ਨਵੋਦਿਆ ਵਿਦਿਆਲਿਆ ਵੀ ਖ਼ਤਰੇ ਵਿਚ

ਕੁੱਲੂ: ਹਿਮਾਚਲ ਪ੍ਰਦੇਸ਼ ਦੇ ਕੁੱਲੂ ਵਿਚ ਵੀਰਵਾਰ ਦੁਪਹਿਰ ਨੂੰ ਇੱਕ ਵੱਡਾ ਹਾਦਸਾ ਵਾਪਰਿਆ। ਬੈਂਡਰੋਲ ਇਲਾਕੇ ਵਿਚ ਜ਼ਮੀਨ ਖਿਸਕਣ ਕਾਰਨ ਇੱਕ ਰਿਹਾਇਸ਼ੀ ਇਮਾਰਤ ਅਚਾਨਕ ਢਹਿ ਗਈ। ਇਸ ਇਮਾਰਤ ਵਿਚ ਕੋਈ ਵੀ ਨਹੀਂ ਰਹਿ ਰਿਹਾ ਸੀ, ਇਸ ਲਈ ਕਿਸੇ ਨੂੰ ਸੱਟ–ਫੇਟ ਲੱਗਣ ਤੋਂ ਬਚਾਅ ਹੋ ਗਿਆ। ਪਰ ਨਾਲ ਲੱਗਦਾ ਰੀਜੈਂਟਾ ਹੋਟਲ ਅਤੇ ਜਵਾਹਰ ਨਵੋਦਿਆ ਵਿਦਿਆਲਿਆ ਸਮੇਤ ਹੋਰ ਇਮਾਰਤਾਂ ਵੀ ਖ਼ਤਰੇ ਵਿਚ ਆ ਗਈਆਂ ਹਨ। ਪ੍ਰਸ਼ਾਸਨ ਨੇ ਸੈਲਾਨੀਆਂ ਨਾਲ਼ ਭਰੇ ਹੋਟਲ ਨੂੰ ਤੁਰੰਤ ਖਾਲੀ ਕਰਵਾ ਲਿਆ ਹੈ। ਇਲਾਕੇ ਵਿਚ ਦਹਿਸ਼ਤ ਦਾ ਮਾਹੌਲ ਬਣਿਆ ਹੋਇਆ ਹੈ।

ਹਿਮਾਚਲ ਪ੍ਰਦੇਸ਼ ਵਿਚ ਮੌਸਮ ਹਾਲ਼ੇ ਵੀ ਅਸਥਿਰ ਬਣਿਆ ਹੋਇਆ ਹੈ। ਉੱਚੀਆਂ ਥਾਵਾਂ ਉੱਤੇ ਮੀਂਹ ਅਤੇ ਬਰਫ਼ਬਾਰੀ ਤੋਂ ਬਾਅਦ ਵੀਰਵਾਰ ਦੁਪਹਿਰ ਨੂੰ ਮੌਸਮ ਥੋੜ੍ਹਾ ਸਾਫ਼ ਹੋਇਆ, ਪਰ ਉਸੇ ਵੇਲੇ ਕੁੱਲੂ ਤੋਂ ਲਗਭਗ 12 ਕਿਲੋਮੀਟਰ ਦੂਰ ਬੈਂਡਰੋਲ ਇਲਾਕੇ ਵਿਚ ਇੱਕ ਵੱਡੀ ਘਟਨਾ ਵਾਪਰ ਗਈ। ਇੱਕ ਰਿਹਾਇਸ਼ੀ ਇਮਾਰਤ ਅਚਾਨਕ ਜ਼ਮੀਨ ਖਿਸਕਣ ਕਾਰਨ ਪੂਰੀ ਤਰ੍ਹਾਂ ਢਹਿ-ਢੇਰੀ ਹੋ ਗਈ। ਇਹ ਇਮਾਰਤ ਰਾਧੇ ਸ਼ਿਆਮ ਪੁੱਤਰ ਤਾਨਾ ਰਾਮ ਦੀ ਸੀ। ਇਸ ਵਿਚ ਇੱਕ ਪਰਿਵਾਰ ਰਹਿ ਰਿਹਾ ਸੀ, ਪਰ ਘਟਨਾ ਵੇਲੇ ਘਰ ਖਾਲੀ ਸੀ, ਇਸ ਲਈ ਕੋਈ ਜਾਨੀ ਨੁਕਸਾਨ ਨਹੀਂ ਹੋਇਆ।

ਇਸ ਘਟਨਾ ਤੋਂ ਬਾਅਦ ਆਲੇ-ਦੁਆਲੇ ਵੱਡਾ ਖ਼ਤਰਾ ਬਣ ਗਿਆ ਹੈ। ਨਾਲ ਲੱਗਦਾ ਰੀਜੈਂਟਾ ਹੋਟਲ, ਜਵਾਹਰ ਨਵੋਦਿਆ ਵਿਦਿਆਲਿਆ ਅਤੇ ਹੋਰ ਕਈ ਇਮਾਰਤਾਂ ਵੀ ਖ਼ਤਰੇ ਵਿਚ ਆ ਗਈਆਂ ਹਨ। ਇਸ ਲਈ ਪ੍ਰਸ਼ਾਸਨ ਨੇ ਤੁਰੰਤ ਐਕਸ਼ਨ ਲੈਂਦਿਆਂ ਹੋਟਲ ਨੂੰ ਖਾਲੀ ਕਰਵਾ ਲਿਆ ਅਤੇ ਸੈਲਾਨੀਆਂ ਨੂੰ ਸੁਰੱਖਿਅਤ ਥਾਂ ਉੱਤੇ ਭੇਜ ਦਿੱਤਾ। ਲੋਕਾਂ ਵਿਚ ਭਯ ਫੈਲ ਗਿਆ ਹੈ ਕਿਉਂਕਿ ਇਲਾਕਾ ਲਗਾਤਾਰ ਖਿਸਕਣ ਵਾਲੀ ਜ਼ਮੀਨ ਵਾਲਾ ਮੰਨਿਆ ਜਾਂਦਾ ਹੈ।

ਇਹ ਘਟਨਾ ਕੁੱਲੂ ਜ਼ਿਲ੍ਹਾ ਹੈੱਡਕੁਆਰਟਰ ਤੋਂ ਮਾਤਰ 12 ਕਿਲੋਮੀਟਰ ਦੂਰ ਵਾਪਰੀ ਹੈ ਅਤੇ ਇਸ ਨੇ ਇਲਾਕੇ ਵਿਚ ਫਿਰ ਤੋਂ ਚਿਤਾਵਨੀ ਦਿੱਤੀ ਹੈ। ਪਿਛਲੀਆਂ ਘਟਨਾਵਾਂ ਯਾਦ ਕਰਵਾਉਂਦਿਆਂ ਲੋਕ ਆਖ ਰਹੇ ਹਨ ਕਿ 24 ਅਗਸਤ 2023 ਨੂੰ ਐਨੀ ਬੱਸ ਸਟੈਂਡ ਨੇੜੇ ਇੱਕੋ ਵਾਰ 8 ਬਹੁ-ਮੰਜ਼ਿਲਾ ਇਮਾਰਤਾਂ ਢਹਿ ਗਈਆਂ ਸਨ। ਹੁਣ ਫਿਰ ਇਸੇ ਤਰ੍ਹਾਂ ਦੀ ਸਥਿਤੀ ਬਣੀ ਹੋਈ ਹੈ।

ਮਣੀਕਰਨ ਘਾਟੀ ਵਿਚ ਵੀ ਹਾਲਾਤ ਨਾਜ਼ੁਕ ਬਣੇ ਹੋਏ ਹਨ। 6 ਅਪ੍ਰੈਲ ਦੀ ਰਾਤ ਨੂੰ ਬਰਸ਼ੌਨੀ ਸੜਕ ਦੇ ਘਾਟੀਗੜ੍ਹ ਇਲਾਕੇ ਵਿਚ ਜ਼ਮੀਨ ਖਿਸਕਣ ਕਾਰਨ ਇੱਕ ਕਾਰ ਮਲਬੇ ਹੇਠ ਫਸ ਗਈ ਸੀ। ਔਟ-ਲੂਰੀ-ਸੈਂਜ ਰਾਸ਼ਟਰੀ ਰਾਜਮਾਰਗ 305 ਉੱਤੇ ਵੀ ਅਪ੍ਰੈਲ ਮਹੀਨੇ ਵਿਚ ਤਿੰਨ ਵਾਰ ਵਾਹਨਾਂ ਦੀ ਆਵਾਜਾਈ ਰੁੱਕੀ ਹੈ। ਇਸ ਰਸਤੇ ਉੱਤੇ ਯਾਤਰਾ ਹਮੇਸ਼ਾ ਖ਼ਤਰਨਾਕ ਰਹਿੰਦੀ ਹੈ।

ਸਥਾਨਕ ਲੋਕਾਂ ਅਤੇ ਯਾਤਰੀਆਂ ਦੀ ਮੰਗ ਹੈ ਕਿ ਮੌਨਸੂਨ ਸੀਜ਼ਨ ਤੋਂ ਪਹਿਲਾਂ ਪ੍ਰਸ਼ਾਸਨ ਵੱਲੋਂ ਸਥਾਈ ਸੁਰੱਖਿਆ ਉਪਾਅ ਲਏ ਜਾਣ ਤਾਂ ਜੋ ਵੱਡੇ ਹਾਦਸਿਆਂ ਤੋਂ ਬਚਿਆ ਜਾ ਸਕੇ।

ਨਿਸ਼ਾਂਤ ਠਾਕੁਰ, ਐੱਸਡੀਐੱਮ ਕੁੱਲੂ ਨੇ ਕਿਹਾ, “ਕੁੱਲੂ ਦੇ ਬੈਂਡਰੋਲ ਵਿਚ ਜ਼ਮੀਨ ਖਿਸਕਣ ਕਾਰਨ ਇੱਕ ਮਕਾਨ ਢਹਿ ਗਿਆ ਹੈ। ਘਰ ਵਿਚ ਕੋਈ ਨਹੀਂ ਰਹਿ ਰਿਹਾ ਸੀ। ਨਾਲ ਲੱਗਦੇ ਇੱਕ ਹੋਟਲ ਨੂੰ ਵੀ ਖਾਲੀ ਕਰਵਾ ਲਿਆ ਗਿਆ ਹੈ।”