Rain In Himachal: ਹਿਮਾਚਲ 'ਚ ਮੀਂਹ ਨੇ ਮਚਾਈ ਤਬਾਹੀ, ਕਈ ਜਗ੍ਹਾ ਹੜ੍ਹ ਆਏ, ਬੱਦਲ ਫਟੇ
ਤਿੰਨ ਪੁਲ ਟੁੱਟੇ, ਹੜ੍ਹ ਦੇ ਪਾਣੀ 'ਚ ਗੱਡੀਆਂ ਵਗ਼ੀਆਂ, ਕਈ ਘਰ ਵੀ ਹੋਏ ਤਬਾਹ
By : Annie Khokhar
Heavy Rain In Himachal: ਮੌਸਮ ਵਿਭਾਗ ਵੱਲੋਂ ਜਾਰੀ ਭਾਰੀ ਬਾਰਿਸ਼ ਦੇ ਓਰੇਂਜ ਅਲਰਟ ਦੇ ਵਿਚਕਾਰ, ਬੁੱਧਵਾਰ ਨੂੰ ਹਿਮਾਚਲ ਵਿੱਚ ਪੰਜ ਥਾਵਾਂ 'ਤੇ ਬੱਦਲ ਫਟ ਗਏ। ਸ਼੍ਰੀਖੰਡ ਦੇ ਭੀਮਦੁਵਾਰੀ ਅਤੇ ਨੰਤੀ, ਕਿਨੌਰ ਦੇ ਪੂਹ, ਲਾਹੌਲ ਦੇ ਮਯਾਦ ਅਤੇ ਕੁੱਲੂ ਦੀ ਤੀਰਥਨ ਘਾਟੀ ਵਿੱਚ ਬੱਦਲ ਫਟਣ ਨਾਲ ਭਾਰੀ ਨੁਕਸਾਨ ਹੋਇਆ ਹੈ। ਭੀਮਦੁਵਾਰੀ ਅਤੇ ਨੰਤੀ ਵਿੱਚ ਬੱਦਲ ਫਟਣ ਕਾਰਨ ਆਏ ਹੜ੍ਹ ਵਿੱਚ ਗਨਵੀ ਵਿੱਚ ਦੋ ਸ਼ੈੱਡ ਹੜ੍ਹ ਦੇ ਪਾਣੀਆਂ 'ਚ ਰੁੜ ਗਏ, ਜਦੋਂ ਕਿ ਛੇ ਪਾਣੀ ਵਿੱਚ ਡੁੱਬ ਗਏ। ਇੱਥੇ ਇੱਕ ਪੁਲ ਨੂੰ ਵੀ ਕਾਫ਼ੀ ਨੁਕਸਾਨ ਪਹੁੰਚਿਆ। ਇਸ ਦੇ ਨਾਲ ਨਾਲ ਇੱਕ ਪੁਲਿਸ ਚੌਕੀ ਵੀ ਹੜ੍ਹ ਦੇ ਪਾਣੀ 'ਚ ਰੁੜ ਗਈ।
ਤੀਰਥਨ ਘਾਟੀ ਦੇ ਬੰਜਾਰ ਵਿੱਚ ਟਿੱਲਾ ਅਤੇ ਡੋਗਰਾ ਪੁਲਾਂ ਨੂੰ ਵੀ ਨੁਕਸਾਨ ਪਹੁੰਚਿਆ ਹੈ। ਨਿਰਮੰਡ ਦੇ ਕੁਰਪਨ ਖੱਡ ਦੇ ਓਵਰਫਲੋਅ ਕਾਰਨ ਬਾਗੀਪੁਲ ਬਾਜ਼ਾਰ ਨੂੰ ਖਾਲੀ ਕਰਵਾ ਲਿਆ ਗਿਆ ਹੈ। ਕੁੱਲੂ ਦੀ ਤੀਰਥਨ ਘਾਟੀ ਵਿੱਚ ਪੰਜ ਵਾਹਨ ਅਤੇ ਚਾਰ ਝੌਂਪੜੀਆਂ ਰੁੜ ਗਈਆਂ। ਇਸ ਸਮੇਂ ਦੌਰਾਨ ਝੌਂਪੜੀ ਵਿੱਚ ਕੋਈ ਨਹੀਂ ਸੀ।
ਲਾਹੌਲ ਦੇ ਮਯਾਦ ਘਾਟੀ ਵਿੱਚ ਕਰਪਟ ਪਿੰਡ ਨੂੰ ਖਾਲੀ ਕਰਵਾ ਲਿਆ ਗਿਆ ਹੈ ਅਤੇ 22 ਪਰਿਵਾਰਾਂ ਨੂੰ ਸੁਰੱਖਿਅਤ ਥਾਵਾਂ 'ਤੇ ਭੇਜਿਆ ਗਿਆ ਹੈ। ਕਿੰਨੌਰ ਦੇ ਪੂਹ ਵਿੱਚ ਬੱਦਲ ਫਟਣ ਕਾਰਨ, ਆਈਟੀਬੀਪੀ ਕੈਂਪ ਲਈ ਰਿਸ਼ੀ ਡੋਗਰੀ ਸੜਕ ਦੇ ਨਿਰਮਾਣ ਵਿੱਚ ਲੱਗੀ ਕੰਪਨੀ ਦੀ ਮਸ਼ੀਨਰੀ ਹੋਜੋ ਨਾਲੇ ਵਿੱਚ ਹੜ੍ਹ ਵਿੱਚ ਵਹਿ ਗਈ। ਕੰਪਨੀ ਦੇ ਪੰਜ ਕਰਮਚਾਰੀ ਵੀ ਫਸ ਗਏ ਹਨ, ਉਨ੍ਹਾਂ ਨੂੰ ਬਚਾਇਆ ਜਾ ਰਿਹਾ ਹੈ। ਪੰਜ ਥਾਵਾਂ 'ਤੇ ਬੱਦਲ ਫਟਣ ਦੇ ਨਾਲ-ਨਾਲ, ਬੁੱਧਵਾਰ ਨੂੰ ਸ਼ਿਮਲਾ ਸਮੇਤ ਰਾਜ ਦੇ ਕਈ ਇਲਾਕਿਆਂ ਵਿੱਚ ਭਾਰੀ ਮੀਂਹ ਪਿਆ।
ਭਾਰੀ ਮੀਂਹ ਅਤੇ ਜ਼ਮੀਨ ਖਿਸਕਣ ਕਾਰਨ ਰਾਜ ਵਿੱਚ ਦੋ ਰਾਸ਼ਟਰੀ ਰਾਜਮਾਰਗਾਂ (ਨੈਸ਼ਨਲ ਹਾਈਵੇ) ਸਮੇਤ 323 ਸੜਕਾਂ ਬੰਦ ਹੋ ਗਈਆਂ ਹਨ। ਇਸ ਦੇ ਨਾਲ ਹੀ, 70 ਬਿਜਲੀ ਟ੍ਰਾਂਸਫਾਰਮਰ ਅਤੇ 130 ਪੀਣ ਵਾਲੇ ਪਾਣੀ ਦੀਆਂ ਯੋਜਨਾਵਾਂ ਠੱਪ ਹੋ ਗਈਆਂ ਹਨ। ਕਈ ਇਲਾਕਿਆਂ ਵਿੱਚ ਬਿਜਲੀ ਬੰਦ ਹੋਣ ਦੇ ਨਾਲ-ਨਾਲ ਪੀਣ ਵਾਲੇ ਪਾਣੀ ਦਾ ਸੰਕਟ ਵੀ ਹੈ।
ਮੌਸਮ ਵਿਭਾਗ ਨੇ ਹਿਮਾਚਲ ਦੇ ਤਿੰਨ ਜ਼ਿਲ੍ਹਿਆਂ, ਚੰਬਾ, ਕਾਂਗੜਾ ਅਤੇ ਮੰਡੀ ਦੇ ਕਈ ਇਲਾਕਿਆਂ ਵਿੱਚ ਵੀਰਵਾਰ ਨੂੰ ਭਾਰੀ ਬਾਰਿਸ਼ ਲਈ ਓਰੇਂਜ ਅਲਰਟ ਜਾਰੀ ਕੀਤਾ ਹੈ। ਹੋਰ ਜ਼ਿਲ੍ਹਿਆਂ ਵਿੱਚ ਯੈਲੋ ਅਲਰਟ ਜਾਰੀ ਰਹੇਗਾ। 15 ਅਗਸਤ ਨੂੰ ਸਿਰਮੌਰ, ਸ਼ਿਮਲਾ, ਮੰਡੀ, ਕੁੱਲੂ, ਕਾਂਗੜਾ ਅਤੇ ਚੰਬਾ ਜ਼ਿਲ੍ਹਿਆਂ ਵਿੱਚ ਹਲਕੀ ਬਾਰਿਸ਼ ਹੋਣ ਦੀ ਸੰਭਾਵਨਾ ਹੈ। ਸੂਬੇ ਵਿੱਚ 19 ਅਗਸਤ ਤੱਕ ਬਾਰਿਸ਼ ਜਾਰੀ ਰਹਿਣ ਦੀ ਭਵਿੱਖਬਾਣੀ ਕੀਤੀ ਗਈ ਹੈ।
ਹਿਮਾਚਲ ਵਿੱਚ, ਇਸ ਮਾਨਸੂਨ ਸੀਜ਼ਨ ਵਿੱਚ 20 ਜੂਨ ਤੋਂ 12 ਅਗਸਤ ਤੱਕ 241 ਲੋਕਾਂ ਦੀ ਜਾਨ ਗਈ ਹੈ। 326 ਲੋਕ ਜ਼ਖਮੀ ਹੋਏ ਹਨ। 36 ਲੋਕ ਅਜੇ ਵੀ ਲਾਪਤਾ ਹਨ। ਇਸ ਸਮੇਂ ਦੌਰਾਨ ਸੜਕ ਹਾਦਸਿਆਂ ਵਿੱਚ 115 ਲੋਕਾਂ ਦੀ ਮੌਤ ਹੋ ਗਈ ਹੈ। ਬੱਦਲ ਫਟਣ, ਜ਼ਮੀਨ ਖਿਸਕਣ ਅਤੇ ਹੜ੍ਹਾਂ ਕਾਰਨ ਹੁਣ ਤੱਕ 2,507 ਕੱਚੇ ਅਤੇ ਪੱਕੇ ਘਰ ਅਤੇ ਦੁਕਾਨਾਂ ਨੂੰ ਨੁਕਸਾਨ ਪਹੁੰਚਿਆ ਹੈ। 2,043 ਗਊਸ਼ਾਲਾਵਾਂ ਨੂੰ ਵੀ ਨੁਕਸਾਨ ਪਹੁੰਚਿਆ ਹੈ। ਨੁਕਸਾਨ ਦਾ ਕੁੱਲ ਅੰਕੜਾ 2,031 ਕਰੋੜ ਰੁਪਏ ਤੱਕ ਪਹੁੰਚ ਗਿਆ ਹੈ।
